ஸ்டாலின் காங்கிரஸுக்கு தந்த பவர்புல் ஷாக்! பாஜகவும் இல்லை.. அப்ப தேசிய அரசியலில் திமுகவின் ரூட் என்ன

Updated: Monday, June 8, 2026, 8:10 [IST]

Subscribe to Oneindia Tamil

சென்னை: டெல்லியில் இன்று நடைபெறவுள்ள இந்தியா கூட்டணியின் முக்கிய ஆலோசனைக் கூட்டத்தை திமுக புறக்கணித்துள்ளது... மாநில அளவிலான அரசியல் முரண்பாடுகளும், தேர்தல் கூட்டணிகளில் ஏற்பட்ட கசப்பான அனுபவங்களுமே இந்தத் திடீர் புறக்கணிப்புக்கு முதன்மைக் காரணமாக முன்வைக்கப்படுகின்றன. இந்த அதிரடிப் புறக்கணிப்பு, தேசிய அரசியலில் திமுக இனி என்ன செய்யப் போகிறது என்ற மிகப்பெரிய விவாதத்தையும், எதிர்பார்ப்பையும் ஏற்படுத்தியுள்ளது.

நாடாளுமன்றத் தேர்தல் முடிவுகள் வெளியாகி, மத்தியில் புதிய அரசு அமைவது குறித்த பேச்சுவார்த்தைகள் தீவிரமடைந்துள்ள சூழலில், திமுக எடுத்துள்ள இந்த அதிரடி முடிவு தேசிய அரசியலில் பெரும் பரபரப்பை ஏற்படுத்தியுள்ளது.

தேசிய அரசியலில் திமுக

தமிழகத்தில் தேர்தல் முடிவுகளுக்குப் பிறகு காங்கிரஸ் கட்சி தங்களுக்கு இழைத்த துரோகத்தால் தொண்டர்கள் அடைந்துள்ள மனக்காயங்களுக்கு மதிப்பளித்தே இந்த முடிவு எடுக்கப்பட்டுள்ளதாக திமுக தலைமை விளக்கியுள்ளது.

மத்தியில் ஆளும் பாஜக அரசை வீழ்த்த வேண்டும், எதிர்க்கட்சிகளின் வாக்குகள் சிதறிவிடக் கூடாது என்ற ஒற்றை நோக்கத்திற்காகவே, தங்களுக்குள் இருந்த பல மாநில அளவிலான முரண்பாடுகளையும் கடந்து இந்தியா கூட்டணியை உருவாக்க திமுக முன்னின்றது.

திமுக - காங்கிரஸ்

ஆனால், தேர்தல் முடிவுகள் வெளியான பிறகு, கூட்டணிக் கோட்பாடுகளை உடைக்கும் வகையில் காங்கிரஸ் கட்சி தன்னிச்சையாக எடுத்த சில முடிவுகள், பிராந்தியக் கட்சிகளின் நம்பிக்கையைச் சிதைத்துள்ளன. தமிழகத்தில் பல ஆண்டுகளாகத் தங்களுக்கு பக்கபலமாக இருந்த திமுகவிடம் எந்த ஆலோசனையும் நடத்தாமல், புதிய அரசியல் சூழலுக்கு ஏற்ப காங்கிரஸ் ஒருதலைப்பட்சமாக பிராந்திய அளவில் எடுத்த நகர்வுகள் இந்த அரசியல் விரிசலுக்குக் காரணமாக அமைந்துள்ளன.

இந்தியா கூட்டணியில் இருந்து ஒட்டுமொத்தமாக விலகுவது குறித்து திமுக இன்னும் இறுதி முடிவு எடுக்கவில்லை என்றாலும், இந்த தற்காலிக புறக்கணிப்பு என்பது காங்கிரஸ் தலைமைக்கு விடுக்கப்பட்ட ஒரு தெளிவான எச்சரிக்கை செய்தியாகவே பார்க்கப்படுகிறது.

இந்தியா கூட்டணி கூட்டம்

மத்தியில் காங்கிரஸ் கட்சி மட்டுமே ஒற்றை எதிர்க்கட்சியாக ஆதிக்கம் செலுத்துவதை திமுக விரும்பவில்லை. அதற்குப் பதிலாக, தேசிய அரசியலில் அனைத்து மாநில கட்சிகளின் குரல்களும் சம அளவில் ஒலிக்க வேண்டும் என்பதே திமுகவின் இப்போதைய பார்வையாக உள்ளது. காங்கிரஸின் இந்த அலட்சியப் போக்கின் மீது அதிருப்தியில் இருக்கும் பிற மாநிலக் கட்சிகளை ஒன்றிணைத்து, காங்கிரஸுக்கும் பாஜகவுக்கும் மாற்றாக ஒரு புதிய மூன்றாவது அணியை தேசிய அளவில் உருவாக்குவதற்கான சாத்தியக்கூறுகளை நோக்கி திமுக நகரக்கூடும்.

மத்தியில் கடந்த 10 வருஷத்துக்கும் மேலாக ஆட்சியில் இல்லாத நிலையிலும், பல்வேறு மாநிலங்களில் தங்களின் செல்வாக்கு சுருங்கிய பிறகும் கூட, காங்கிரஸ் கட்சி தங்களின் பழைய மேலாதிக்க அணுகுமுறையை மாற்றிக் கொள்ளவில்லை என்பதையே இப்போதைய நிகழ்வுகள் காட்டுவதாக அரசியல் விமர்சகர்கள் கருதுகிறார்கள்.

பாஜகவிடம் நெருக்கம்?

பிராந்தியக் கட்சிகளை அரவணைத்து செல்லும் முறையான கொள்கை திட்டமோ அல்லது கட்டமைப்போ காங்கிரஸிடம் இல்லாதது, ஆளும் தரப்பிற்கு எதிரான ஒட்டுமொத்தப் போராட்டத்தையே பலவீனமாக்குகிறது என்பதை திமுக சுட்டிக்காட்ட விரும்புகிறது.

அதே நேரத்தில், இப்போதைய ஆளும் பாஜக அரசுடன் திமுக இணக்கமான பாதையைத் தேர்ந்தெடுப்பதற்கான வாய்ப்புகள் மிகவும் குறைவு என்றே தெரிகிறது.. காரணம், பல ஆண்டுகளாக மத்தியில் ஆளும் பாஜகவின் கொள்கைகளுக்கும் திட்டங்களுக்கும் எதிராக தீவிரமான ஒற்றை அரசியல் பிம்பத்தையே திமுக கட்டமைத்து வந்துள்ளது. திடீரென டெல்லி ஆளும் தரப்பை நோக்கி நகர்வது என்பது, திமுகவின் சொந்த வாக்கு வங்கியிலும் கொள்கை பிடிப்பிலும் மிகப்பெரிய சரிவை ஏற்படுத்தக்கூடும் என்பதை அதன் தலைமை நன்றாகவே அறியும்.

மாநில கட்சிகளின் உரிமை

அதனால் கொள்கை ரீதியாக பாஜகவை எதிர்ப்பதில் திமுக உறுதியாக இருந்தாலும், தங்களை அலட்சியப்படுத்தும் காங்கிரஸ் கட்சியிடம் இருந்து தற்காலிகமாக விலகி நிற்கவே அது விரும்புகிறது.

இனிவரும் காலங்களில் தேசிய அளவில் காங்கிரஸ் கொண்டு வரும் திட்டங்களுக்குக் கண்மூடித்தனமாக ஆதரவளிக்காமல், பிரச்சினைகளின் அடிப்படையில் மட்டுமே ஆதரவளிக்கும் ஒரு முதிர்ச்சியான, சமதூர அரசியல் பாதையையே திமுக தேர்ந்தெடுக்க வாய்ப்புகள் அதிகம் உண்டு.

அதுமட்டுமல்ல, தேசிய அரசியலில் காங்கிரஸ் போன்ற பெரிய கட்சிகளின் தன்னிச்சையான ஆதிக்கத்தை உடைத்து, மாநிலக் கட்சிகளின் உரிமைகளையும் பிராந்திய அடையாளத்தையும் நிலைநிறுத்துவதற்கான ஒரு முதிர்ச்சியான, ராஜதந்திர நகர்வாகவே திமுகவின் இந்த முடிவு அமைந்துள்ளது.

சுருக்கமாக சொன்னால், டெல்லி ஆளும் தரப்பை நோக்கி நகராமல், தங்களை அலட்சியப்படுத்தும் காங்கிரஸுக்கும் அடிபணியாமல், தேசிய அளவில் பிரச்சினைகளின் அடிப்படையில் மட்டுமே முடிவெடுக்கும் அரசியல் பாதையை நோக்கி தன் பயணத்தைத் தொடங்கியுள்ளது என்றே தெரிகிறது... இதைதான் இன்றைய டெல்லி கூட்டப் புறக்கணிப்பும் நமக்கு தெளிவுபடுத்துகிறது... பொறுத்திருந்து பார்ப்போம்..!!