பாஜக பஞ்சாயத்து ஓவர்..டேக் ஆஃப் ஆகுமா அதிமுக கூட்டணி! ப்ளானை மாற்றிய ’டெல்லி’ தலை! திடீர் ட்விஸ்ட்!

சென்னை: 2026 சட்டமன்றத் தேர்தலை முன்னிட்டு திமுக தனது கூட்டணி கட்சிகளுடன் தொகுதி பங்கிட்டை பாதி முடித்துள்ளது இந்த நிலையில் அதிமுக பாஜக கூட்டணியில் இன்னும் தொகுதி பங்கிட்டு பேச்சு வார்த்தை முடிவுக்கு வரவில்லை எடப்பாடி பழனிச்சாமி டெல்லி பயணம் மேற்கொண்டுள்ள நிலையில் இன்று பாஜக தேர்தல் பொறுப்பாளரான பியூஸ் கோயில் தமிழகம் வருவார் எனவும், இதன் மூலம் தொகுதி பங்கீடு குறித்த முக்கிய அறிவிப்பு வெளியாகலாம் என எதிர்பார்க்கப்பட்டது. இந்நிலையில், பியூஷ் கோயலின் சென்னை பயணம் திடீரென ஒத்தி வைக்கப்பட்டுள்ளதாக தகவல் வெளியாகியுள்ளது.

தமிழ்நாடு, கேரளா, அசாம், மேற்கு மற்றும் புதுச்சேரி உள்ளிட்ட ஐந்து மாநிலங்களுக்கு ஏப்ரல் மாதம் சட்டமன்றத் தேர்தல் நடைபெற உள்ளது. தமிழ்நாட்டில் மொத்தம் 234 சட்டமன்றத் தொகுதிகளில் ஒரே கட்டமாக வரும் ஏப்ரல் 23ஆம் தேதி வாக்குப்பதிவு நடைபெறும் என்று அறிவிக்கப்பட்டுள்ளது.

இதனால் மாநில அரசியல் களம் தற்போது மிகுந்த பரபரப்புடன் இயங்கி வருகிறது. இதற்கிடையில், ஆளுங்கட்சியான திமுக தனது கூட்டணி கட்சிகளுடன் தொகுதி பங்கீடு பேச்சுவார்த்தைகளை பெரும்பாலும் நிறைவு செய்துள்ளதாக கூறப்படுகிறது.

2026 தமிழக சட்டசபை தேர்தல்

ஆனால் எதிர்க்கட்சியான அதிமுக தலைமையிலான கூட்டணியில், குறிப்பாக பாஜகவுடன் நடைபெற்று வரும் பேச்சுவார்த்தைகள் இன்னும் இறுதியாகவில்லை என்பது குறிப்பிடத்தக்கது. இந்த சூழ்நிலையில், தமிழக பாஜக தேர்தல் பொறுப்பாளரான பியூஷ் கோயல் இன்று மதியம் சுமார் 12 மணியளவில் சென்னை வருவதாக தகவல் வெளியாகியுள்ளது. அவர் நாளை மாலை அதிமுக பொதுச் செயலாளர் எடப்பாடி பழனிசாமியை நேரில் சந்தித்து தொகுதி பங்கீடு தொடர்பாக முக்கிய ஆலோசனை நடத்த உள்ளதாக கூறப்படுகிறது.

அதிமுக பாஜக கூட்டணி

இந்த சந்திப்பின் போது பாஜகவுக்கு தமிழகத்தில் 27 முதல் 29 தொகுதிகள் வரை ஒதுக்கப்பட வாய்ப்புள்ளதாக அரசியல் வட்டாரங்களில் பேசப்படுகிறது. குறிப்பாக சென்னை நகரில் உள்ள முக்கிய தொகுதிகளான வேளச்சேரி, மயிலாப்பூர் மற்றும் தியாகராய நகர் போன்ற இடங்களை பாஜக கோரியுள்ளதாக தகவல்கள் வெளியாகியுள்ளன. இந்த தொகுதிகள் நகர்ப்புற வாக்காளர்கள் அதிகம் உள்ள முக்கிய பகுதிகள் என்பதால், இவை குறித்து கடுமையான பேச்சுவார்த்தைகள் நடைபெற்று வருவதாக கூறப்படுகிறது.

தொகுதி பங்கீடு

மற்றொருபுறம், அதிமுக சார்பில் ஏற்கனவே தொகுதி பங்கீட்டிற்கான குழு அமைக்கப்பட்டுள்ளது. இந்த குழுவில் முன்னாள் அமைச்சர்களான கேபி முனுசாமி மற்றும் திண்டுக்கல் சீனிவாசன் உள்ளிட்ட மூத்த தலைவர்கள் இடம் பெற்றுள்ளனர். இக்குழு, கூட்டணியில் இடம்பெற்றுள்ள அன்புமணி ராமதாஸ் தலைமையிலான பாட்டாளி மக்கள் கட்சி உள்ளிட்ட கட்சிகளுடன் தொடர்ச்சியாக ஆலோசனை நடத்தி வருகிறது.

தேசிய ஜனநாயக கூட்டணி

இந்த அரசியல் நகர்வுகளுக்கிடையில், அதிமுக பொதுச்செயலாளர் எடப்பாடி பழனிசாமி சமீபத்தில் டெல்லி பயணம் மேற்கொண்டது முக்கிய கவனம் பெற்றது. தேசிய ஜனநாயக கூட்டணியின் முக்கிய ஆலோசனைக் கூட்டத்தில் பங்கேற்பதற்காக அவர் டெல்லி சென்றதாக கூறப்படுகிறது. அப்போது மத்திய உள்துறை அமைச்சர் அமித் ஷாவை சந்தித்து தொகுதி பங்கீடு தொடர்பாக ஆலோசனை நடத்தியதாக தகவல்கள் வெளியாகியுள்ளன.

அன்புமணி ராமதாஸ், டிடிவி தினகரன்

அதேபோல், அன்புமணி ராமதாஸ் மற்றும் டிடிவி தினகரன் ஆகியோரும் டெல்லிக்கு பயணம் மேற்கொண்டிருப்பது கூட்டணியில் மேலும் பரபரப்பை ஏற்படுத்தியுள்ளது. இந்நிலையில், இன்று கூட்டணியில் இடம்பெறும் கட்சிகளுக்கு இடையிலான தொகுதி பங்கீடு குறித்து இறுதி முடிவுகள் விரைவில் வெளியாகும் என்ற எதிர்பார்ப்பை உருவாக்கியுள்ளது.

பியூஷ் கோயல் வருகை

இந்நிலையில், இன்று பியூஷ் கோயலின் சென்னை வருவார் என அறிவிக்கப்பட்டிருந்தது. இதனால் அதிமுக-பாஜக கூட்டணிக்குள் நிலவி வரும் தொகுதி பங்கீடு குழப்பங்களுக்கு தீர்வு காணப்படும் எனவும், இந்த சந்திப்புக்குப் பிறகு, இரு கட்சிகளுக்கும் இடையிலான அதிகாரப்பூர்வ தொகுதி பங்கீடு ஒப்பந்தம் விரைவில் அறிவிக்கப்படலாம் அதிமுக- பாஜகவினரும், கூட்டணி கட்சியினரும் எதிர்பார்த்தனர். ஆனால், இந்நிலையில், பியூஷ் கோயலின் சென்னை பயணம் திடீரென ஒத்தி வைக்கப்பட்டுள்ளதாக தகவல் வெளியாகியுள்ளது. கூட்டணி கட்சி தலைவர்களுடன் கோயல் இன்று பேச்சுவார்த்தை நடத்த திட்டமிட்டுருந்த நிலையில், இன்று
அன்புமணி, டிடிவி தினகரன் ஆகியோர் டெல்லியில் அமித்ஷாவை சந்திக்கவுள்ளனர். இதனால் கோயலின் சென்னை பயணம் ஒத்திவைக்கப்பட்டுள்ளதாக தகவல் வெளியாகியுள்ளது.

English summary

Tamil Nadu Assembly Election 2026: Piyush Goyal postpones Chennai visit as AIADMK–BJP seat-sharing talks face unexpected delay.