டாக்டர் ராமதாஸூடன் மீண்டும் கை கோர்க்கும் வேல்முருகன்! சென்னையில் 'சைலண்ட்டாக' நடந்த பரபர சந்திப்பு!

சென்னை: தமிழக வாழ்வுரிமைக் கட்சியின் தலைவர் (தவாக) பண்ருட்டி தி.வேல்முருகன் எம்,.எல்.ஏ.வை பாட்டாளி மக்கள் கட்சி நிறுவனர் (பாமக) டாக்டர் ராமதாஸ் அறிவுறுத்தலின் பேரில் பாட்டாளி மக்கள் கட்சி நிர்வாகிகள் சென்னையில் இன்று சந்தித்தது அரசியல் களத்தில் கவனம் பெற்றுள்ளது. பாமகவில் இருந்து வெளியேறி டாக்டர் ராமதாஸுக்கு எதிராக அரசியல் கட்சி நடத்தி வரும் நிலையில் வேல்முருகனுடன் பாமக நிர்வாகிகள் ஆலோசனை நடத்தியிருப்பது பேசுபொருளாகி இருக்கிறது.

பாட்டாளி மக்கள் கட்சியில் டாக்டர் ராமதாஸ், அன்புமணி ராமதாஸுக்கு அடுத்ததாக அணிவகுத்த 2-ம் கட்ட தலைவர்களில் பண்ருட்டி எம்.எல்.ஏ.வாக இருந்த வேல்முருகன் முதன்மையானவர். பாமகவின் எம்.எல்.ஏ.வாக 2001. 2006 தேர்தல்களில் வென்றவர். பாமகவின் இணை பொதுச்செயலாளராகவும் பதவி வகித்தார் வேல்முருகன். 2011-ம் ஆண்டு பாமகவில் இருந்து வேல்முருகன் நீக்கப்பட்டார்.

ஈழத் தமிழர் பிரச்சனையில் பாமக தலைமையுடன் ஏற்பட்ட கருத்து வேறுபாட்டால் அக்கட்சியில் இருந்து வேல்முருகன் நீக்கப்பட்டதாக கூறப்பட்டது. ஆனால் வேல்முருகனுக்குப் பின்னால் வட தமிழ்நாட்டில் பெருந்திரளான இளைஞர்கள் அணிதிரண்டனர். இதனையடுத்து பாட்டாளி மக்கள் கட்சியில் இருந்த வேல்முருகன் ஆதரவாளர்கள் அனைவரும் ஒருங்கிணைக்கப்பட்டு 2012-ல் தமிழக வாழ்வுரிமைக் கட்சி உருவானது. இதேபோல பல்வேறு அரசியல் கட்சிகளை உள்ளடக்கிய தமிழர் வாழ்வுரிமைக் கூட்டமைப்பு ஒன்றும் உருவாக்கப்பட்டது.

கடந்த 13 ஆண்டுகளாக பாமகவுக்கு எதிராக வட தமிழகத்தில் செல்வாக்குடன் இயங்கி வருகிறது தமிழக வாழ்வுரிமைக் கட்சி. கடந்த சில மாதங்களாக பல்வேறு தமிழ் தேசிய இயக்கத்தினர், கட்சிகள் தங்களை தமிழக வாழ்வுரிமைக் கட்சியில் இணைத்தும் வருகின்றனர். சீமானின் நாம் தமிழர் கட்சியில் இருந்து வெளியேறிய பெரும்பாலானோர் வேல்முருகன் தலைமையிலான தமிழக வாழ்வுரிமைக் கட்சியில்தான் இணைந்தும் வருகின்றனர்.

பாட்டாளி மக்கள் கட்சியின் சார்பில் வெளியிடப்பட்டுள்ள 2025 - 2026 ஆம் ஆண்டுக்கான நிழல் நிதிநிலை அறிக்கை மற்றும் வேளாண் நிழல் நிதிநிலை அறிக்கையை பாட்டாளி மக்கள் கட்சியின் மாநில தேர்தல் பணிக்குழு செயலாளர் திரு.ஜெயராமன். அவர்களின் தலைமையில் சென்னை மாவட்ட முக்கிய நிர்வாகிகள் என்னை… pic.twitter.com/1wVsxIEPDo

— Velmurugan.T (@VelmuruganTVK) March 12, 2025

தற்போது வேல்முருகனின் தமிழக வாழ்வுரிமைக் கட்சி, திமுக தலைமையிலான கூட்டணியில் நீடித்து வருகிறது. அண்மையில் திமுக தலைமையை வேல்முருகன் கடுமையாக விமர்சித்தாலும் தற்போது திமுக தலைமையுடன் நல்லுறவுடன் இருந்து வருகிறார்.

இந்த நிலையில் வேல்முருகனை இன்று பாமக நிர்வாகிகள் திடீரென சந்தித்தனர். இந்த சந்திப்பின் போது பாமக வெளியிட்ட நிழல் நிதி அறிக்கை மற்றும் வேளாண் நிழல் நிதி அறிக்கை ஆகியவற்றை வேல்முருகனிடம் பாமக நிர்வாகிகள் வழங்கினர்.

இந்த சந்திப்பு தொடர்பான படங்களை வேல்முருகன் தமது எக்ஸ் பக்கத்தில் பகிர்ந்துள்ளதுடன், பாட்டாளி மக்கள் கட்சியின் சார்பில் வெளியிடப்பட்டுள்ள 2025 - 2026 ஆம் ஆண்டுக்கான நிழல் நிதிநிலை அறிக்கை மற்றும் வேளாண் நிழல் நிதிநிலை அறிக்கையை பாட்டாளி மக்கள் கட்சியின் மாநில தேர்தல் பணிக்குழு செயலாளர் ஜெயராமன் தலைமையில் சென்னை மாவட்ட முக்கிய நிர்வாகிகள் என்னை நேரில் சந்தித்து வழங்கினார்கள். நிதிநிலை அறிக்கைகளை என்னை நேரில் சந்தித்து வழங்க அறிவுறுத்திய மருத்துவர் அய்யா மற்றும் மருத்துவர் சின்னய்யா ஆகியோருக்கு நன்றி என தெரிவித்துள்ளார்.

2026-ல் தமிழ்நாடு சட்டசபை தேர்தல் நடைபெறும் நிலையில் பாஜக தலைமையிலான கூட்டணியில் இடம் பெற்றுள்ள பாமக, திமுக தலைமையிலான கூட்டணியில் இடம் பெற்றுள்ள தமிழக வாழ்வுரிமைக் கட்சிக்கு நேசக் கரம் நீட்டியிருப்பது பெரும் கவனம் பெற்றிருக்கிறது.

English summary

The founder of the Pattali Makkal Katchi (PMK), Dr. Ramadoss, instructed PMK leaders to meet Tamilaga Vazhvurimai Katchi (TVK) leader and MLA Panruti T. Velmurugan in Chennai today, drawing significant political attention. As Velmurugan had previously exited PMK and formed his own party opposing Dr. Ramadoss, the discussions between PMK leaders and Velmurugan have become a major topic of political debate.