தமிழ்நாடு உருவான நவம்பர் 1- தமிழ்நாடு தினமாக அரசு கொண்டாடனும்.. சிபிஎம் குரலுக்கு பாஜக ஆதரவு!

சென்னை: தமிழ்நாடு உருவான நவம்பர் 1-ஐ தமிழ்நாடு தினமாக தமிழ்நாடு அரசு கொண்டாட வேண்டும் என்று தமிழக பாஜக தலைவர் அண்ணாமலை வலியுறுத்தி உள்ளார்.

1956-ம் ஆண்டு நாட்டில் மொழிவாரி மாநிலங்கள் உருவாக்கப்பட்டன. இதனடிப்படையில் கர்நாடகா, கேரளா, ஆந்திரா உள்ளிட்ட பல மாநிலங்கள் உதயமாகின. அன்றைய சென்னை மாகாணமாகிய தமிழ்நாடு பல பகுதிகளை பறிகொடுத்தது. கர்நாடகா உள்ளிட்ட மாநிலங்கள் நவம்பர் 1-ந் தேதியை மாநிலங்கள் உருவாகிய நாளாக கொண்டாடுகின்றன. ஆனால் தமிழ்நாடு நிலங்களை இழந்த நாள் என்பதால் கொண்டாடுவதில்லை. அண்மை காலமாக நவம்பர் 1-ந் தேதியை தமிழ்நாடும் கொண்டாட வேண்டும் என்கிற குரல் வலுத்து வருகிறது.

அண்ணாமலை: இது தொடர்பாக அண்ணாமலை தமது எக்ஸ் பக்கத்தில் பதிவிட்டுள்ளதாவது: மொழி வாரியாக மாநிலங்களின் எல்லைகள் வரையறுக்கப்பட்டு, இன்றைய எல்லைப் பகுதிகளோடு நம் தமிழ் மொழிக்கான மாநிலமாக நம் மாநிலம் உருவாக்கப்பட்ட தமிழ்நாடு தினமான இன்று, தமிழக மக்கள் அனைவருக்கும்
தமிழக பாஜக சார்பாக வாழ்த்துக்களைத் தெரிவித்துக் கொள்கிறோம்.

தமிழ்நாடு தினம்: பெருமை மிகுந்த தமிழகம் இன்று, தெருவுக்குத் தெரு மதுக் கடைகளைத் திறந்து வைத்தும், சட்டம் ஒழுங்கு சீர்குலைந்தும் தனது பொலிவை இழந்து நிற்கிறது. தனது கையாலாகாத்தனத்தை மறைக்க, ஏதேதோ செய்து கொண்டிருக்கிறார் தமிழக முதலமைச்சர் ஸ்டாலின். அதில் ஒன்றுதான், தமிழகம் உருவான தினத்தை விட்டுவிட்டு, பெயர் மாற்றம் செய்த தினத்தைக் கொண்டாடுவது.

மாற்றுவது சரி அல்ல: மாவட்ட ஆட்சியர் அலுவலகம் என்று கூடப் பாராமல் தமிழகம் முழுவதும் அராஜகம் செய்து கொண்டிருக்கும் திமுகவினரை அடக்கி வைப்பதே, முதலமைச்சர் ஸ்டாலின் தமிழக மக்களுக்குச் செய்யும் பேருதவியாக இருக்குமே தவிர தன் விருப்பத்துக்கு, நம் மாநிலம் உருவாக்கப்பட்ட தினத்தை மாற்றுவது அல்ல. இவ்வாறு அண்ணாமலை கூறியுள்ளார்.

சிபிஎம்-க்கு ஆதரவு: முன்னதாக சிபிஎம் மாநில செயலாளர் கே.பாலகிருஷ்ணன், இதேபோல நவம்பர் 1 தினத்தை தமிழ்நாடு அமைப்பு தினமாக கொண்டாட வேண்டும் என வலியுறுத்தி இருந்தார். தற்போது சிபிஎம் குரலுக்கு தமிழ்நாடு பாஜகவும் ஆதரவு தெரிவித்துள்ளது குறிப்பிடத்தக்கது.

English summary

Tamil Nadu BJP President Annamalai also urged that the State Govt Should Celebrate Nov. 1 as TamilNadu Day.