ட்விஸ்ட்.. தமிழக பாஜக தலைவர் மாற்றம்? நயினாருக்கு பதில் இவரா? ரேசில் 4 பேர்.. டிக் அடிக்கும் டெல்லி!

Published: Sunday, June 14, 2026, 7:22 [IST]

Subscribe to Oneindia Tamil

சென்னை: தமிழக பாஜகவில் விரைவில் முக்கிய மாற்றங்கள் நடக்கலாம் என்ற தகவல் அரசியல் வட்டாரங்களில் பரபரப்பை ஏற்படுத்தியுள்ளது. சட்டப்பேரவைத் தேர்தலில் கட்சி எதிர்பார்த்த வெற்றியைப் பெறத் தவறியதுடன், முன்னாள் மாநிலத் தலைவர் அண்ணாமலை கட்சியில் இருந்து விலகி புதிய இயக்கத்தை தொடங்கியிருப்பது, பாஜகவுக்குள் பல்வேறு கேள்விகளை எழுப்பியுள்ளது. இந்த சூழலில், தமிழக பாஜக அமைப்பை மறுசீரமைக்கும் நடவடிக்கைகளை தேசிய தலைமை தீவிரப்படுத்தியுள்ளதாக கூறப்படுகிறது.

சமீபத்தில் நடைபெற்ற சட்டப்பேரவைத் தேர்தலில் பாஜக மிகப்பெரிய எதிர்பார்ப்புடன் களமிறங்கியது. ஆனால், கட்சி ஒரு தொகுதியில் மட்டுமே வெற்றி பெற்று பின்னடைவை சந்தித்தது. இந்த தோல்விக்குப் பிறகு கட்சிக்குள் பல்வேறு கருத்துகள் முன்வைக்கப்பட்டன.

குறிப்பாக தேர்தல் வியூகம், கூட்டணி அரசியல் மற்றும் அமைப்பு செயல்பாடுகள் தொடர்பாக பல நிர்வாகிகள் அதிருப்தி தெரிவித்ததாக கூறப்படுகிறது. இதற்கிடையில், முன்னாள் மாநிலத் தலைவர் அண்ணாமலை கட்சியில் இருந்து விலகி 'வீ த லீடர்ஸ்' என்ற புதிய இயக்கத்தை தொடங்கியது பாஜக தலைமையை கவலையடையச் செய்துள்ளது.

தமிழக பாஜக

அண்ணாமலையுடன் நெருக்கமாக செயல்பட்ட சில நிர்வாகிகளும் கட்சியை விட்டு வெளியேறியதால், மாநில அமைப்பை மீண்டும் பலப்படுத்த வேண்டிய அவசியம் ஏற்பட்டுள்ளதாக அரசியல் நோக்கர்கள் கருதுகின்றனர். இந்த நிலையில், தற்போதைய மாநிலத் தலைவர் நயினார் நாகேந்திரன் விரைவில் மாற்றப்படலாம் என்ற தகவல் வெளியாகியுள்ளது. அவருக்கு தேசிய அளவில் அல்லது மத்திய அரசில் முக்கிய பொறுப்பு வழங்கப்படலாம் என்றும் கூறப்படுகிறது.

ராம சீனிவாசன்

இதனால் புதிய மாநிலத் தலைவரை தேர்வு செய்வதற்கான ஆலோசனைகள் டெல்லியில் நடைபெற்று வருவதாக தகவல்கள் தெரிவிக்கின்றன. புதிய தலைவருக்கான போட்டியில் நான்கு முக்கிய நிர்வாகிகளின் பெயர்கள் பரிசீலனையில் இருப்பதாக கூறப்படுகிறது. மாநில பொதுச் செயலாளர் பேராசிரியர் ராம சீனிவாசன், மாநிலச் செயலாளர் அஸ்வத்தாமன், மாநிலச் செயலாளர் வினோஜ் பி. செல்வம் மற்றும் தேசிய செயற்குழு உறுப்பினர் ஹெச். ராஜா ஆகியோரின் பெயர்கள் முன்னிலையில் இருப்பதாக தகவல்கள் வெளியாகியுள்ளன.

ஹெச் ராஜா

இதில் பேராசிரியர் ராம சீனிவாசன் பெயர் அதிகமாக பேசப்பட்டு வருகிறது. நீண்டகாலமாக கட்சியின் அமைப்பு பணிகளில் ஈடுபட்டு வருவதும், கல்வியாளர் என்ற அடையாளமும் அவருக்கு சாதகமாக பார்க்கப்படுகிறது. அதே நேரத்தில், கட்சியின் அடிப்படை அமைப்பில் செல்வாக்கு கொண்டவராக ஹெச். ராஜாவும் கருதப்படுகிறார். இளம் தலைமுறை பிரதிநிதித்துவத்தை கருத்தில் கொண்டு வினோஜ் பி. செல்வத்தின் பெயரும் பரிசீலிக்கப்படுவதாக கூறப்படுகிறது.

டெல்லி தலைமை

இந்தப் பட்டியல் டெல்லி தலைமையின் இறுதி ஒப்புதலுக்காக அனுப்பப்பட்டுள்ளதாகவும், இறுதி முடிவு எடுக்கப்பட்ட பிறகே அதிகாரப்பூர்வ அறிவிப்பு வெளியாகும் என்றும் தகவல்கள் தெரிவிக்கின்றன. இதற்கிடையே, தேசிய தலைவர் நிதின் நபின் மற்றும் மத்திய உள்துறை அமைச்சர் அமித் ஷா தலைமையில் டெல்லியில் முக்கிய ஆலோசனைக் கூட்டம் நடைபெற்றதாக கூறப்படுகிறது. இதில் மாநிலத் தலைவர் நயினார் நாகேந்திரன், மத்திய அமைச்சர் எல். முருகன், முன்னாள் மத்திய அமைச்சர் பொன். ராதாகிருஷ்ணன், தமிழிசை சவுந்தரராஜன், வானதி சீனிவாசன் உள்ளிட்ட பல முக்கிய நிர்வாகிகள் கலந்து கொண்டதாக தகவல்கள் வெளியாகியுள்ளன.

அண்ணாமலை

அந்தக் கூட்டத்தில் சட்டப்பேரவைத் தேர்தல் தோல்விக்கான காரணங்கள், அண்ணாமலை விலகலால் ஏற்பட்டுள்ள தாக்கம், கட்சியின் எதிர்கால திட்டங்கள் மற்றும் மாநில அமைப்பை வலுப்படுத்தும் நடவடிக்கைகள் குறித்து விரிவாக விவாதிக்கப்பட்டதாக கூறப்படுகிறது. இருப்பினும், மாநிலத் தலைவர் மாற்றம் தொடர்பாக இதுவரை பாஜக தலைமையிடம் இருந்து எந்த அதிகாரப்பூர்வ அறிவிப்பும் வெளியாகவில்லை. எனவே தற்போது வெளியாகும் தகவல்கள் அனைத்தும் கட்சி வட்டாரங்களில் பேசப்படும் தகவல்களாகவே பார்க்கப்படுகின்றன.

புதிய தலைவர் யார்?

ஆனால் அண்ணாமலை விலகலுக்குப் பிறகு தமிழக பாஜக சந்தித்து வரும் அரசியல் சவால்களை சமாளிக்க, கட்சியில் முக்கிய மாற்றங்கள் தவிர்க்க முடியாததாக மாறியுள்ளதாக அரசியல் பார்வையாளர்கள் கூறுகின்றனர். புதிய தலைவர் யார்? என்ற கேள்விக்கு விரைவில் விடை கிடைக்கும் என எதிர்பார்க்கப்படுகிறது.

Published On June 14, 2026