TN Cabinet: தமிழக அமைச்சரவையில் காங்கிரஸ்! யார் அந்த அமைச்சர்கள்? இவர்கள் இருவர்தானா?

Updated: Friday, May 15, 2026, 9:03 [IST]

Subscribe to Oneindia Tamil

சென்னை: தமிழக அமைச்சரவையில் இடம் பெறும் காங்கிரஸ் கட்சிக்கு எத்தனை இடங்கள் வழங்கப்படும், யார் யாருக்கு அமைச்சர் பதவி கொடுக்கப்படும் என்பதை பார்க்கலாம்.

நடந்து முடிந்த தமிழக சட்டமன்றத் தேர்தலில் 108 தொகுதிகளில் வெற்றி பெற்ற தமிழக வெற்றிக் கழகம் (தவெக), தற்போது ஆட்சியைப் பிடித்துள்ளது. பெரும்பான்மைக்குத் தேவையான இடங்களைப் பெற, அக்கட்சியின் தலைவர் விஜய் மதச்சார்பற்ற கட்சிகளின் ஆதரவைக் கோரினார். அவரது அழைப்பை ஏற்று, பல தசாப்தங்களாக திமுகவுடன் இருந்த உறவை முறித்துக்கொண்டு காங்கிரஸ் கட்சி தவெகவுக்கு ஆதரவு அளித்தது.

அரசியல் விமர்சனங்களும் திமுகவின் கண்டனமும்

காங்கிரஸ் கட்சியின் இந்தத் திடீர் முடிவுக்கு திமுக தரப்பிலிருந்து கடும் எதிர்ப்பு கிளம்பியுள்ளது.

திமுக தலைவர் மு.க. ஸ்டாலின்: எவ்வித முன்னறிவிப்பும் இன்றி காங்கிரஸ் கட்சி ஒரே நாளில் கூட்டணியை முறித்துக் கொண்டதாக வருத்தம் தெரிவித்தார்.

உதயநிதி ஸ்டாலின்: தவெக மற்றும் காங்கிரஸின் இந்த அரசியல் நகர்வுகளைக் கடுமையாக விமர்சித்தார்.

டிடிவி தினகரன்: திமுக தலைவர்களின் இந்த நிலைப்பாட்டை வரவேற்று அவர்களுக்குத் தனது நன்றியைத் தெரிவித்தார்.

இருப்பினும், தேர்தலுக்கு முன்பே இக்கூட்டணி அமைந்திருக்க வேண்டும் என்றும், தற்போது எடுத்துள்ள முடிவு காங்கிரஸுக்குச் சரியானதே என்றும் அரசியல் ஆய்வாளர்கள் சிலர் கருதுகின்றனர்.

அமைச்சரவையில் காங்கிரஸ்

திமுக கூட்டணியில் 5 இடங்களில் வெற்றி பெற்றிருந்த காங்கிரஸ், தற்போது தவெக அரசுடன் கைகோர்த்துள்ள நிலையில், அமைச்சரவையில் அக்கட்சி இடம்பெறுவது குறித்த விவாதங்கள் எழுந்தன.

"முதல்வர் விஜய் தலைமையிலான அமைச்சரவையில் பங்கேற்க காங்கிரஸ் கட்சிக்கு அதிகாரப்பூர்வ அழைப்பு விடுக்கப்பட்டுள்ளது. இன்னும் ஓரிரு நாட்களில் அமைச்சர்களாகப் பதவியேற்கப் போகும் காங்கிரஸ் தலைவர்கள் யார் என்பது தெரிந்துவிடும்." என
கிரிஷ் சோடங்கர் தெரிவித்துள்ளார்.

ஏற்கனவே முதல்வர் விஜய் பதவியேற்றபோது 9 அமைச்சர்கள் பொறுப்பேற்றனர். தற்போது இரண்டாம் கட்டமாக காங்கிரஸ் உறுப்பினர்களும் அமைச்சரவையில் இணையவுள்ளது உறுதியாகியுள்ளது.

எதிர்காலத் திட்டம்

இந்தக் கூட்டணி வெறும் சட்டமன்றத்தோடு முடிந்துவிடாமல், வரவிருக்கும் மக்களவைத் தேர்தலிலும் தொடரும் எனத் தெரிகிறது. தவெக மற்றும் காங்கிரஸ் இணைந்து தேர்தலைச் சந்திக்கத் திட்டமிட்டுள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது. இம்மாற்றம் திமுக ஆதரவாளர்களிடையே கடும் அதிருப்தியை ஏற்படுத்தியுள்ள நிலையில், தமிழக அரசியல் களம் புதிய திருப்பத்தை நோக்கி நகர்கிறது.

சுமார் 60 ஆண்டுகள் கழித்து தமிழக அமைச்சரவையில் காங்கிரஸ் இணைய போவது அக்கட்சியின் நிர்வாகிகள் மகிழ்ச்சியாக உணர்கிறார்கள். யார் யாருக்கு இந்த அமைச்சரவையில் இடம் கிடைக்கும் என்பதை பார்க்கலாம்.

மயிலாடுதுறை யூனூஸ், மேலூர் விஸ்வநாதன், குளச்சல் தாரகை கத்பர்த், விளவங்கோடு பிரவீன், கிள்ளியூர் ராஜேஷ் குமார் ஆகியோர் வென்றுள்ளனர். காங்கிரஸுக்கு 2 அமைச்சர் பதவி கிடைக்கும் என தெரிகிறது. அதில் அதிக வாக்குகளில் வித்தியாசத்துடன் வெற்றி பெற்ற விளவங்கோடு பிரவீனுக்கு அமைச்சரவையில் இடம் கிடைக்கும் என தெரிகிறது. இன்னொருவர் விஸ்வநாதனா இல்லை ராஜேஷ் குமாரா என்பது தெரியவில்லை. சிலர் பெண் எம்எல்ஏ தாரகைக்கு கொடுக்கப்படலாம் என்கிறார்கள். ஆனால் ராஜேஷ் குமார், விஸ்வநாதன் உள்ளிட்ட சீனியர்கள் இருக்கும் போது தாரகைக்கு கிடைக்குமா என்ற சந்தேகம் எழுந்துள்ளது. எனினும் யாருக்கு கொடுக்கலாம் என்பது குறித்து ராகுல் காந்தி ஆலோசனை நடத்தி வருவதாக சொல்லப்படுகிறது.