800 கோடி மோதல்.. 2 இளம் துருப்புச்சீட்டுகள்.. அதிகம் கவனிக்கப்படும் தொகுதி.. விவகார வில்லிவாக்கம்
சென்னை: தமிழக சட்டமன்றத் தேர்தல் களம் சூடுபிடித்துள்ள நிலையில், பலரின் பார்வையும் இப்போது சென்னை வில்லிவாக்கம் தொகுதியின் பக்கம் திரும்பியுள்ளது. இதுவரை ஒரு சாதாரண தொகுதியாகப் பார்க்கப்பட்ட வில்லிவாக்கம், இந்த முறை பெரும் பணக்கார வேட்பாளர்களின் மோதல் மற்றும் அரசியல் வாரிசு vs புதிய வியூகதாரி என ஒரு 'மெகா ஸ்டார்' தொகுதியாக உருவெடுத்துள்ளது.
800 கோடி ரூபாய் மோதல்: வில்லிவாக்கம் மிரளுகிறதா?
வில்லிவாக்கம் தொகுதி இன்று தமிழகத்தின் மிகவும் "காஸ்ட்லி" தொகுதிகளில் ஒன்றாக மாறியுள்ளது. இதற்குக் காரணம் வேட்பாளர்கள் தாக்கல் செய்துள்ள சொத்து விவரங்கள்.
தமிழக வெற்றிக் கழகம் சார்பில் போட்டியிடும் ஆதவ் அர்ஜுனா, தனது வேட்புமனுவில் தனக்கு சுமார் 534 கோடி ரூபாய் மதிப்பிலான சொத்துக்கள் இருப்பதாகத் தெரிவித்துள்ளார். மறுபுறம், திமுக சார்பில் போட்டியிடும் கார்த்திக் மோகன், தமக்கு சுமார் 346 கோடி ரூபாய் மதிப்பிலான சொத்துக்கள் இருப்பதாகக் குறிப்பிட்டுள்ளார்.
இந்த இரு வேட்பாளர்களின் சொத்து மதிப்பைக் கூட்டினால் சுமார் 880 கோடி ரூபாயைத் தாண்டுகிறது. ஒரு தொகுதியில் களமிறங்கும் இரு முக்கிய வேட்பாளர்கள் இவ்வளவு பெரிய கோடீஸ்வரர்களாக இருப்பது அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.
திமுகவின் இளம் புயல்: கார்த்திக் மோகன்
திமுகவின் கோட்டையாகக் கருதப்படும் வில்லிவாக்கத்தில், அந்த மரபைத் தக்கவைக்கக் களமிறங்கியிருப்பவர் கார்த்திக் மோகன். இவர் திமுகவின் முன்னாள் மாவட்டச் செயலாளரும், முன்னாள் எம்.எல்.ஏ-வுமான பி.கே. மோகனின் மகன் ஆவார். அண்ணா நகர் கார்த்தி என்று அறியப்பட்டவர் ஆதவை வீழத்த வேண்டும் என்று திமுக மூலம் வில்லிவாக்கத்தில் களமிறக்கப்பட்டு உள்ளார்.
நீண்ட காலமாக திமுகவின் அடிமட்டத் தொண்டராகவும், இளைஞரணி நிர்வாகியாகவும் பணியாற்றிய அனுபவம் இவருக்கு உண்டு. முதலமைச்சர் மு.க.ஸ்டாலின் மற்றும் துணை முதலமைச்சர் உதயநிதி ஸ்டாலினின் நம்பிக்கைக்குரிய இளம் தலைவராக கார்த்திக் மோகன் பார்க்கப்படுகிறார். தொகுதியில் மோகன் குடும்பத்திற்கு இருக்கும் நீண்டகாலத் தொடர்பு மற்றும் திமுகவின் வலுவான வாக்கு வங்கி இவருக்குப் பெரும் பலம். உதயநிதி ஸ்டாலினின் மிக நெருக்கமான நட்பு வட்டத்தில் இருப்பதால், இளைஞர்களைக் கவரும் வகையில் இவரது பிரச்சாரங்கள் அமைந்துள்ளன.
தவெக-வின் புதிய பவர் பிளேயர்: ஆதவ் அர்ஜுனா
விஜய்யின் தமிழக வெற்றிக் கழகத்தில் இணைந்த குறுகிய காலத்திலேயே, கட்சியின் முக்கிய அதிகார மையமாக மாறியிருப்பவர் ஆதவ் அர்ஜுனா. இவர் வெறும் வேட்பாளர் மட்டுமல்ல, விஜய்யின் அரசியல் நகர்வுகளுக்குப் பின்னால் இருக்கும் ஒரு முக்கிய மூளையாகவும் பார்க்கப்படுகிறார்.
முன்னர் விசிக-வில் இருந்த ஆதவ் அர்ஜுனா, பின்னர் தவெக-வின் தேர்தல் மேலாண்மைச் செயலாளராகப் பொறுப்பேற்றார். இந்திய கூடைப்பந்து சம்மேளனத்தின் தலைவராகவும் இருக்கும் இவர், ஒரு வெற்றிகரமான தொழிலதிபர். 'மாற்றம்' என்ற முழக்கத்தோடு களமிறங்கும் தவெக-வின் முகமாக ஆதவ் அர்ஜுனா வில்லிவாக்கத்தில் நிற்கிறார். திமுகவின் கோட்டைக்குள் புகுந்து, ஒரு புதிய அரசியல் அலையை உருவாக்க அவர் எடுக்கும் முயற்சிகள் கவனிக்கத்தக்கவை.
வில்லிவாக்கம் முடிவெடுப்பது என்ன?
பழம்பெரும் அரசியல் பாரம்பரியம் கொண்ட திமுகவின் கார்த்திக் மோகனா? அல்லது நவீன வியூகங்களுடன் களமிறங்கும் டிவிகே-வின் ஆதவ் அர்ஜுனாவா? என்ற போட்டி இப்போது உச்சகட்டத்தை எட்டியுள்ளது.
கோடிக்கணக்கான சொத்துக்கள், நட்சத்திர அந்தஸ்து, அதிகார பலம் என அனைத்தும் ஒருங்கே அமைந்திருக்கும் வில்லிவாக்கம் தொகுதி, தமிழகத்தின் தேர்தல் முடிவுகளில் ஒரு முக்கிய திசைகாட்டியாக அமையும் என்பதில் சந்தேகமில்லை. பண பலமா? அல்லது மக்கள் ஆதரவா? என்ற கேள்விக்கு வில்லிவாக்கம் வாக்காளர்கள் அளிக்கும் தீர்ப்பே விடையாக அமையும்.
Click it and Unblock the Notifications
Sign in with Google