50+ சேவை.. மின்சார பில் டூ குடிநீர் புகார் வரை.. இனி வாட்ஸ் ஆப் வழியாகவே பெறலாம்! தமிழக அரசு அதிரடி

Updated: Wednesday, August 20, 2025, 9:51 [IST]

Subscribe to Oneindia Tamil

சென்னை: தமிழ்நாடு அரசு சேவைகளை எளிதாகப் பெறும் வகையில், வாட்ஸ் அப் செயலி வழியாகப் புதிய சேவை முறை அறிமுகமாகவுள்ளது. தமிழக அரசின் தகவல் தொழில்நுட்பத் துறை இந்தப் புதிய முயற்சியை மேற்கொண்டுள்ளது.

இதன் முதற்கட்டமாக, சுமார் 50 அரசு சேவைகள் வாட்ஸ் அப் மூலமாக வழங்கப்படும் எனத் தெரிவிக்கப்பட்டுள்ளது. இந்தத் திட்டத்தைச் செயல்படுத்துவதற்காக, மெட்டா நிறுவனத்துடன் தகவல் தொழில்நுட்பத் துறை புரிந்துணர்வு ஒப்பந்தம் செய்துள்ளது.

இந்த ஒப்பந்தத்தின் மூலம், மக்கள் தங்கள் கைபேசி வாயிலாகவே அரசு சேவைகளைப் பெற முடியும். இது நவீன டிஜிட்டல் தொழில்நுட்பத்தைப் பயன்படுத்தி, அரசின் சேவைகளை மக்களுக்கு எளிதாகக் கொண்டு சேர்க்கும் ஒரு முக்கியப் படியாகக் கருதப்படுகிறது.

வாட்ஸ் ஆப் வழியாக தமிழக அரசு சேவை

சென்னையில் தொடங்கப்பட்ட இந்தச் சேவை, மின்சார மற்றும் குடிநீர் கட்டணங்கள், மாநகராட்சி வரிகள் செலுத்துதல், குறைகள் நிவர்த்தி செய்தல், மற்றும் மெட்ரோ ரயில் டிக்கெட் முன்பதிவு போன்ற வசதிகளை வழங்குகிறது. இவை அனைத்தும் தமிழ் மற்றும் ஆங்கிலம் ஆகிய இரு மொழிகளிலும் செயல்படும் சாட்பாட் மூலம் கிடைக்கின்றன.

இந்தத் திட்டத்திற்கான புரிந்துணர்வு ஒப்பந்தத்தில், தமிழ்நாடு மின் ஆளுமை முகமையின் தலைமைச் செயல் அதிகாரி ஆல்பி ஜான் வர்கீஸ் மற்றும் மெட்டாவின் ரவி கார்க் ஆகியோர் கையெழுத்திட்டனர். தகவல் தொழில்நுட்பத் துறை அமைச்சர் பழனிவேல் தியாகராஜன் முன்னிலையில் இந்த நிகழ்வு நடைபெற்றது.

டிஜிட்டல் மயமாகும் சேவைகள்

குடிமக்களுக்கான சேவைகளை டிஜிட்டல் மயமாக்குவதிலும், செயல்திறனை மேம்படுத்துவதிலும் ஒரு முக்கிய முன்னெடுப்பாக, தமிழ்நாடு அரசு இன்று மெட்டா நிறுவனத்துடன் ஒரு புரிந்துணர்வு ஒப்பந்தத்தில் கையெழுத்திட்டது. இதன் மூலம் வாட்ஸ்அப் அடிப்படையிலான குடிமக்கள் சேவைகள் தொடங்கப்படவுள்ளன. இந்தியாவின் டிஜிட்டல் மாற்றத்தில் தமிழகம் முன்னிலை வகிப்பதன் மூலம், நிர்வாகம் மக்களை மையப்படுத்தியதாக அமையும்.

ஒரே எண்ணின் மூலம் அணுகக்கூடிய இந்த சேவையின் முதல் கட்டமாக, மாநிலம் முழுவதும் உள்ள மக்கள் 50 அத்தியாவசிய அரசு சேவைகளை எந்த நேரத்திலும், எங்கிருந்தும் அணுக முடியும் என்று அதிகாரப்பூர்வ அறிவிப்பு தெரிவிக்கிறது.

தகவல் தொழில்நுட்பம் மற்றும் டிஜிட்டல் சேவைகள் துறை அமைச்சர் டாக்டர் பழனிவேல் தியாகராஜன் முன்னிலையில், தமிழ்நாடு அரசு சார்பில் தமிழ்நாடு மின்-ஆளுமை முகமையின் (TNeGA) தலைமைச் செயல் அதிகாரி டாக்டர் ஆல்பை ஜான் வர்கீஸ் மற்றும் மெட்டா இந்தியாவின் வணிகச் செய்திப்பிரிவு இயக்குநர் ரவி கார்க் ஆகியோர் இந்த புரிந்துணர்வு ஒப்பந்தத்தில் கையெழுத்திட்டனர்.

தமிழ்நாடு அரசின் புதிய சேட்பாட்

இந்தச் சேட்பாட் தமிழ் மற்றும் ஆங்கிலம் ஆகிய இரு மொழிகளிலும் கிடைக்கும். அதிகபட்ச அணுகலை உறுதி செய்ய, சேட்பாட் வழியாக சேவைகளை வழங்கும். குடிமக்கள் இதன் மூலம் புகார்களை பதிவு செய்யவும், மின்சாரம் மற்றும் குடிநீர் கட்டணங்கள் போன்ற பயன்பாட்டு பில்களை செலுத்தவும், மாநகராட்சி வரிகளை கட்டவும், மெட்ரோ ரயில் டிக்கெட்டுகளை முன்பதிவு செய்யவும் முடியும். அனைத்தும் ஒரே அரட்டை சாளரத்திற்குள் நிகழும்.

இதனால் அரசு சேவைகள் நேரடியாக மக்களின் கைக்கு வந்து சேரும், மேலும் சேவை மையங்களுக்கு பலமுறை செல்ல வேண்டிய அவசியம் இருக்காது.

இந்த நிகழ்வில் பேசிய அமைச்சர் பழனிவேல் தியாகராஜன், "மக்களை மையப்படுத்திய, வெளிப்படையான, அனைவரையும் உள்ளடக்கிய நிர்வாகத்தை உருவாக்குவதன் மூலம் இந்தியாவின் டிஜிட்டல் மாற்றத்திற்கு தலைமை தாங்கும் தெளிவான தொலைநோக்குப் பார்வையை மாநில அரசு கொண்டுள்ளது. மெட்டாவுடனான இந்த கூட்டணி அந்தப் பயணத்தில் ஒரு தீர்க்கமான படியாகும்" என்றார்.

அவர் மேலும் கூறுகையில், "இனி வாட்ஸ் ஆப் மூலம் எளிமையாக சேவைகளை பெற முடியும். மின்-ஆளுமைக்கான மாநிலத்தின் அர்ப்பணிப்பையும் வாட்ஸ்அப்பின் எளிமையையும், அதன் பரவலான சென்றடையும் தன்மையையும் இணைப்பதன் மூலம், தமிழ்நாட்டின் ஒவ்வொரு குடிமகனுக்கும் தொழில்நுட்பம் மிக எளிமையான முறையில் பயன்படுவதை உறுதி செய்கிறோம். இது மக்கள் குடிமக்கள் சேவைகளை அணுகும் விதத்தை மறுவரையறை செய்கிறது" என்றார்.

மெட்டா - தமிழ்நாடு ஒப்பந்தம்

மெட்டா இந்தியாவின் வணிகச் செய்திப்பிரிவு இயக்குநர் ரவி கார்க் கூறுகையில், "வாட்ஸ்அப் என்பது இந்தியா முழுவதும் உள்ள மக்களுக்குப் பரிச்சயமான ஒரு தளம், மேலும் அதன் எளிமையும் பயன்படுத்த எளிதான தன்மையும் அரசு சேவைகளுக்கான டிஜிட்டல் அணுகலை வழங்க இது ஒரு சிறந்த தளமாக அமைகிறது" என்றார்.

"குடிமக்கள் அரசு சேவைகளில் ஈடுபடும் முறையை மாற்றியமைக்கும் தமிழ்நாடு அரசின் முயற்சியில் இணைந்து பணியாற்றுவதில் நாங்கள் மகிழ்ச்சியடைகிறோம். இது சேவைகளை அனைவருக்கும் மிகவும் வசதியானதாகவும், திறமையானதாகவும், அணுகக்கூடியதாகவும் மாற்றுகிறது" என்று அவர் மேலும் தெரிவித்தார்.