பிரதமர் மோடி 74-வது பிறந்த நாள்: முதல்வர் மு.க.ஸ்டாலின், ஆளுநர் ரவி, ராமதாஸ், விஜய் வாழ்த்து!

Updated: Tuesday, September 17, 2024, 9:21 [IST]

Subscribe to Oneindia Tamil

சென்னை: பிரதமர் நரேந்திர மோடியின் 74-வது பிறந்த நாளை முன்னிட்டு தமிழ்நாடு முதல்வர் மு.க.ஸ்டாலின் வாழ்த்துத் தெரிவித்துள்ளார். தமிழ்நாடு ஆளுநர் ஆர்.என்.ரவி. வெளியிட்ட வாழ்த்துச் செய்தியில், பிரதமர் நரேந்திர மோடி, நீண்ட ஆயுளுடனும் ஆரோக்கியத்துடனும் வாழ தமிழ்நாட்டு மக்கள் மனமார்ந்த வாழ்த்துகளைத் தெரிவித்துக் கொள்கின்றனர் என்று தெரிவித்துள்ளார்.

பிரதமர் நரேந்திர மோடியின் 74-வது பிறந்த நாளை முன்னிட்டு தமிழ்நாடு முதல்வர் மு.க.ஸ்டாலின் தமது எக்ஸ் பக்கத்தில் வாழ்த்துத் தெரிவித்துள்ளார். அதில், நீண்ட ஆயுளுடனும் நல்ல உடல்நலத்துடனும் பணியாற்ற வாழ்த்துகளைத் தெரிவித்துளார் முதல்வர் ஸ்டாலின்.

தமிழ்நாடு ஆளுநர் ஆர்.என்.ரவி இன்று வெளியிட்டுள்ள வாழ்த்துச் செய்தி: நமது அன்புக்குரிய பிரதமர் நரேந்திர மோடி பிறந்தநாளில் அவர் நீண்ட ஆயுளுடனும் ஆரோக்கியத்துடனும் வாழ தமிழ்நாட்டு மக்கள் மனமார்ந்த வாழ்த்துகளைத் தெரிவித்துக் கொள்கின்றனர்.

அவரது புரட்சிகரமான மாற்றத்தை ஏற்படுத்தவல்ல தலைமையின் கீழ் தேசம் 2047-ம் ஆண்டுக்குள் வளர்ச்சியடைந்தபாரதம் என்ற அதன் இலக்கை நோக்கி தன்னம்பிக்கையுடன் முன்னேறி வருகிறது. நெடுஞ்சாலைகள், ரயில்வே, விமான நிலையங்கள், துறைமுகங்கள் மற்றும் மக்களுக்கான ஏராளமான நலத்திட்டங்கள் உள்ளிட்ட உள்கட்டமைப்பு மேம்பாட்டில் பிரதமர் உறுதியான கவனம் செலுத்துவது தமிழ்நாடு மீது அவர் கொண்டுள்ள ஆழ்ந்த அன்பைக் காட்டுகிறது.

சிங்கப்பூரில் திருவள்ளுவர் பண்பாட்டு மையம், மலேசியாவில் உள்ள பல்கலைக்கழகத்தில் திருவள்ளுவர் இருக்கை, பனாரஸ் இந்து பல்கலைக்கழகத்தில் சுப்பிரமணிய பாரதி இருக்கை, ஆண்டுதோறும் காசி தமிழ்ச் சங்கமம், செளராஷ்டிர தமிழ்ச் சங்கமம், நாடாளுமன்றத்தில் புனித செங்கோலை நிறுவியது ஆகியவை தமிழ் மொழி மற்றும் தமிழ் கலாசாரம் மீது பிரதமருக்கு இருக்கும் அளப்பரிய அன்பை வெளிப்படுத்துகின்றன.

தேசத்துக்கு அவரது தொலைநோக்குத் தலைமை என்றும் தொடர நமது பிரார்த்தனைகள். இவ்வாறு தமிழ்நாடு ஆளுநர் ஆர்.என்.ரவி தெரிவித்துள்ளார்.

இதேபோல பிரதமர் நரேந்திர மோடிக்கு தமிழக வெற்றிக் கழகத்தின் தலைவர் நடிகர் விஜய் உட்பட பல்வேறு அரசியல் கட்சிகளின் தலைவர்கள், மாநிலங்களின் முதல்வர்கள், மத்திய அமைச்சர்கள் வாழ்த்துகளைத் தெரிவித்து வருகின்றனர்.

பாமக நிறுவனர் டாக்டர் ராமதாஸ் தமது வாழ்த்துச் செய்தியில், இந்தியப் பிரதமர் நரேந்திர மோடி அவர்களின் 74-ஆம் பிறந்தநாளில் அவருக்கு எனது உளமார்ந்த வாழ்த்துகளைத் தெரிவித்துக் கொள்கிறேன். அவர் அனைத்து நலன்களுடன் நீண்ட காலம் மகிழ்ச்சியுடன் வாழ வேண்டும்; இந்தியத் திருநாட்டை வழிநடத்த வேண்டும் என்று வாழ்த்துகிறேன் என தெரிவித்துள்ளார்.