ஈரோடு கிழக்கு இடைத்தேர்தல் பிரசாரத்துக்கு குட்பை.. இலங்கைக்கு அண்ணாமலை திடீர் பயணம்!
தமிழ்நாடு பாஜக தலைவர் அண்ணாமலை இலங்கை செல்கிறார்.
சென்னை: ஈரோடு கிழக்கு தொகுதி இடைத்தேர்தல் பிரசாரம் மும்முரமாக நடைபெற்று வரும் நிலையில் தமிழ்நாடு பாஜக தலைவர் அண்ணாமலை திடீரென இலங்கைக்கு பயணம் மேற்கொள்வதாக அறிவித்துள்ளார்.
ஈரோடு கிழக்கு தொகுதி இடைத்தேர்தலில் பெரும் களேபரங்களுக்கு நடுவே அதிமுகவின் தென்னரசு, இரட்டை இலை சின்னத்தில் வேட்பாளராகப் போட்டியிடுகிறார். இன்று ஈரோட்டில் வேட்பாளர் அறிமுக கூட்டம் நடைபெறுகிறது.
இந்நிலையில் சென்னையில் இன்று செய்தியாளர்களிடம் பேசிய தமிழ்நாடு பாஜக தலைவர் அண்ணாமலை, தாம் இலங்கை பயணம் மேற்கொள்வதாக தெரிவித்துள்ளார். இது தொடர்பாக அண்ணாமலை கூறுகையில், இலங்கை அரசாங்கத்தின் அழைப்பின் பேரில் சிறப்பு விருந்தினராக மத்திய இணை அமைச்சர் எல்.முருகன் அந்நாட்டுக்கு செல்கிறார். இலங்கை அரசியல் கட்சிகளின் அழைப்பின் பேரில் நான் இலங்கைக்கு செல்கிறேன். இத்தகைய பயணங்களால் நமது இந்திய மீனவர்கள் பிரச்சனைக்கு தீர்வு காணப்படும் என நம்பிக்கை தெரிவித்தார்.
மேலும் ஈரோடு கிழக்கு தொகுதி இடைத்தேர்தல் அதிமுக வேட்பாளர் அறிமுக கூட்டத்தில் தமக்கு பதில் மூத்த பாஜக தலைவர் சிபி ராதாகிருஷ்ணன் பங்கேற்பார் எனவும் அண்ணாமலை தெரிவித்தார்.
அத்துடன், மத்தியில் பாஜக ஆட்சி அமைந்தது முதல் தமிழ்நாட்டு மீனவர்கள் மீதான இலங்கை கடற்படையின் துப்பாக்கிச் சூட்டு சம்பவங்கள் குறைந்துள்ளன; இலங்கை- இந்தியா இடையே விரைவில் கப்பல் போக்குவரத்து தொடங்கும் என்றார் அண்ணாமலை.
கடந்த சில நாட்களுக்கு முன்னர் திடீரென டெல்லி சென்ற அண்ணாமலை மத்திய வெளியுறவுத்துறை அமைச்சர் ஜெய்சங்கரை சந்தித்து பேசினார். அப்போது திடீரென இலங்கை தமிழர் பிரச்சனைக்கு அந்நாட்டு அரசியல் சாசனத்தின் 13-வது திருத்தத்தை அமல்படுத்த வேண்டும் என ஜெய்சங்கரிடம் மனு கொடுத்தார் அண்ணாமலை.
முன்னதாக கடந்த ஆண்டும் அண்ணாமலை இலங்கை பயணம் மேற்கொண்டிருந்தார். அப்போது இலங்கையில் பல்வேறு தரப்பு அரசியல் தலைவர்களை அண்ணாமலை சந்தித்து பேசினார். அண்ணாமலையின் அந்த பயண கால கட்டத்தில், இலங்கையிடம் இருந்து இந்தியா கச்சத்தீவை மீட்க நடவடிக்கை எடுப்பதாக தகவல்கள் வெளியாகி இருந்தன என்பதும் குறிப்பிடத்தக்கது. இந்த நிலையில் அண்ணாமலையின் தற்போதைய பயணம் முக்கியத்துவம் வாய்ந்ததாக பார்க்கப்படுகிறது.
Click it and Unblock the Notifications
Sign in with Google