ஜனவரியில் அரிதாக மழை.. காரணம் என்ன?.. 4 நாட்கள் 22 மி.மீ. மழை.. தமிழ்நாடு வெதர்மேன் போஸ்ட்!

Updated: Tuesday, January 5, 2021, 13:31 [IST]

Subscribe to Oneindia Tamil

சென்னை: தமிழகத்தில் இன்றும் நாளையும் பரவலாக நல்ல மழை பெய்யும் என தமிழ்நாடு வெதர்மேன் தெரிவித்துள்ளார்.

வளி மண்டல மேலடுக்கு சுழற்சி காரணமாக தமிழகம் மற்றும் புதுவையில் மழை பெய்யும் என சென்னை வானிலை மையம் தெரிவித்துள்ளது. இந்த நிலையில் இன்று காலை முதல் சென்னையில் பரவலாக மழை பெய்து வருகிறது.

இதுகுறித்து தமிழ்நாடு வெதர்மேன் தனது பேஸ்புக் பதிவில் கூறுகையில் இந்தோ பசிபிக் பகுதியிலிருந்து காற்று வீசுவதால் பருவக்காற்று ஜனவரியிலும் தொடர்ந்து வீசுவதாக 2021 மிகவும் அரிதான ஆண்டு என்றே சொல்லலாம்.

வட அரைக் கோளம்

தென் அரைக் கோளத்தின் பக்கம் எம்ஜேஓ சுழற்சி இருப்பதால் வட அரைக் கோளத்தில் எளிதாக மழை பெய்கிறது. ஜனவரி மாதமான தற்போது நாம் தமிழகத்தில் 22 மி.மீ. மழையை பெற்றுள்ளோம். அப்படியென்றால் ஜனவரி மாதத்தில் வழக்கமாக பெய்யும் 18 மிமீ மழை அளவை விட அதிகமாக வெறும் 4 நாட்களில் பெற்றுள்ளோம்.

மிதமான மழை

இனி பெய்யும் மழையெல்லாம் தமிழகத்திற்கு போனஸாகத்தான் இருக்கும். இந்த மழை இன்றும் நாளையோடு மட்டும் நின்றுவிடாது. இன்னும் தொடரும் என்றே எதிர்பார்க்கப்படுகிறது. அதில் ஜனவரி 5, 6 நல்ல மழையை கொடுக்கும். அடுத்த சில நாட்களில் தமிழகம், கேரளாவில் நல்ல மழை பொழிவு இருக்கும். அவை பெரும்பாலும் மிதமான மழையாகவே இருக்கும்.

மலை பகுதிகள்

தமிழகத்தில் வட கடலோர மாவட்டங்கள், வட உள் மாவட்டங்களில் டெல்டா வரை மழை பெய்யும். மேற்கு காற்று வட இந்தியாவை நோக்கி வருகிறது. இதனால் கேரளா மற்றும் தமிழகத்தின் உள் மாவட்டங்களான கொங்கு பகுதி, கர்நாடகா மலை பகுதிகளில் இடியுடன் கூடிய மழை பெய்யும்.

வட உள்மாவட்டங்கள்

சென்னை, காஞ்சிபுரம், செங்கல்பட்டு, திருவள்ளூர் முதல் டெல்டா கடலோர மாவட்டங்கள், வட உள்மாவட்டங்களில் அடுத்த இரு தினங்களுக்கு நல்ல மழை பெய்யும். டெல்டா விவசாயிகளுக்கு இது காலம் கடந்த மழையாகும். அடுத்த இரு தினங்களுக்கு குடையுடன் வெளியே செல்லுங்கள். இந்த மழை 6 ஆம் தேதிக்கு மேலும் தொடர்ந்து 8 அல்லது 9 தேதிகளில் அதிகமாக இருக்கும்.

சாதனை

ஜனவரி மாதத்தில் 2017-ஆம் ஆண்டு 37.3 மி.மீ மழை பெய்துள்ளது. 2000 ஆம் ஆண்டில் 30.3, 1990- இல் 86.5, 1986- இல் 65.3 , 1985- இல் 89.6, 1984-இல் 34.5 மி.மீ. மழை பெய்துள்ளது. இந்த ஆண்டு ஜனவரி தொடங்கி 4 நாட்களில் 22 மி.மீ. மழை பெய்துள்ளது. 1921 ஆம் ஆண்டு ஜனவரி மாதம் 141 மி.மீ. பெய்த மழையே பெரும் சாதனையாக இருந்தது. 4 நாட்கள்தானே ஆகிறது. இந்த மாதம் முடியும் வரை பொறுத்திருந்து பார்ப்போம் என பிரதீப் ஜான் தெரிவித்துள்ளார்.