அப்போ விரிசல் உண்மைதான் போல.. மோடி கூட விஷ் பண்ணிட்டாரே.. ஸ்டாலினை தாமதாக வாழ்த்திய ராகுல்
சென்னை: தமிழக முதலமைச்சரும், திமுக தலைவருமான மு.க.ஸ்டாலின் இன்று தமது 73வது பிறந்தநாளைக் கொண்டாடுகிறார். இதையடுத்து அவருக்கு தலைவர்கள் பலரும் வாழ்த்தி வருகிறார்கள். ஆனால், கோட்டை வட்டாரத்திலும் அண்ணா அறிவாலயத்திலும் இன்று ஒரு பேச்சுதான் பலமாக அடிபடுகிறது. அது - "ராகுல் காந்தி ஏன் இவ்வளவு லேட்?"
வழக்கமாக, முதலமைச்சர் ஸ்டாலினின் பிறந்தநாள் என்றால் டெல்லியில் இருந்து முதல் வாழ்த்து ராகுலிடம் இருந்துதான் வரும். "என் அன்புச் சகோதரர் ஸ்டாலின் அவர்களுக்கு..." என உருகும் ராகுல், இந்த முறை ஏனோ ரொம்பவே 'அமைதி' ஆகிவிட்டார்.
பிரதமர் நரேந்திர மோடியே காலையிலேயே, "தமிழக முதல்வர் திரு. மு.க.ஸ்டாலின் அவர்களுக்கு பிறந்தநாள் வாழ்த்துகள். அவர் நீண்ட ஆயுளுடனும் ஆரோக்கியத்துடனும் வாழப் பிரார்த்திக்கிறேன்" என எக்ஸ் (X) தளத்தில் பதிவிட்டு நாகரிகம் காக்க, ராகுல் காந்தியோ சுமார் 50 நிமிடங்களுக்கு முன்புதான் மிகச் சாதாரணமாக ஒரு வாழ்த்தைப் பகிர்ந்துள்ளார்.
இதில் கவனிக்க வேண்டிய விஷயம் என்னவென்றால், அந்தப் பதிவில் 'சகோதரர்' (Brother) என்ற வார்த்தை மிஸ்ஸிங்! "தமிழக முதல்வர் மு.க.ஸ்டாலின் அவர்களுக்கு பிறந்தநாள் வாழ்த்துகள்..." என ஒரு சம்பிரதாயமான வாழ்த்தோடு முடித்துக் கொண்டார் ராகுல். கடந்த முறை "ரத்த உறவு அல்ல, கொள்கை உறவு" எனப் பேசிய ராகுல், இப்போது ஏன் இவ்வளவு இடைவெளி காட்டுகிறார் என்பதுதான் கூட்டணிக் கட்சிகளிடையே மில்லியன் டாலர் கேள்வி.
தொகுதிப் பங்கீடு: கசக்கும் 'கை' - பிடிவாதம் காட்டும் 'உதயசூரியன்'
இந்த வாழ்த்துத் தாமதத்திற்குப் பின்னால் 2026 சட்டமன்றத் தேர்தலுக்கான 'சீட்' பஞ்சாயத்துதான் காரணம் என்கிறார்கள் விவரம் அறிந்தவர்கள்.
காங்கிரஸின் டிமாண்ட்: கடந்த தேர்தலை விட இந்த முறை செல்வாக்கு கூடியிருப்பதாகக் கருதும் காங்கிரஸ், 45 இடங்களைக் கேட்டு அடம் பிடிக்கிறது.
திமுகவின் கணக்கு: ஆனால், கூட்டணியில் தவெக (விஜய் கட்சி) ஏற்படுத்தக்கூடிய தாக்கத்தைக் கருத்தில் கொண்டு, திமுக தனது பிடியைத் தளர்த்தத் தயாராக இல்லை. காங்கிரஸுக்கு 25 முதல் 27 இடங்களுக்கு மேல் ஒதுக்க முடியாது என்பதில் ஸ்டாலின் தரப்பு கறாராக இருக்கிறது.
ராஜ்யசபா செக்: வரும் ஏப்ரலில் காலியாகும் ராஜ்யசபா இடங்களில் தங்களுக்கு இரண்டு இடங்கள் வேண்டும் என காங்கிரஸ் கேட்க, "ஒன்றுதான் தர முடியும்" என திமுக 'செக்' வைத்துள்ளது.
இந்த இழுபறி ஒருபுறம் இருக்க, தமிழக காங்கிரஸ் தலைவர்கள் சிலர் "அதிகாரப் பகிர்வு (Cabinet Berth) வேண்டும்" என வெளிப்படையாகவே பேசத் தொடங்கியிருப்பது திமுக மேலிடத்தை அப்செட் ஆக்கியிருக்கிறது.
நடிகர் விஜய்யின் தமிழக வெற்றி கழகம் (TVK) இந்தத் தேர்தலில் ஒரு 'X-Factor' ஆக இருக்கும் என எதிர்பார்க்கப்படுகிறது. விஜய்யின் வருகையால் வாக்குகள் சிதறக்கூடும் என்பதால், கூட்டணிக் கட்சிகளைத் தக்கவைத்துக் கொள்ள வேண்டிய கட்டாயம் திமுகவிற்கு உள்ளது. அதே சமயம், அதிக இடங்களை கூட்டணிக் கட்சிகளுக்குக் கொடுத்துவிட்டு, திமுகவின் பலத்தைக் குறைத்துக்கொள்ளவும் ஸ்டாலின் விரும்பவில்லை.
"நாங்கள் இல்லாமல் உங்களால் வெல்ல முடியாது" என காங்கிரஸ் காட்ட, "வேண்டுமானால் நீங்கள் தனியாகவோ அல்லது வேறு இடத்திலோ பார்த்துக் கொள்ளலாம்" என திமுக மறைமுகமாக உணர்த்துவதையே ராகுலின் இந்த 'தாமத வாழ்த்து' பிரதிபலிப்பதாக அரசியல் விமர்சகர்கள் கிசுகிசுக்கிறார்கள்.
ஸ்டாலினின் பிறந்தநாள் கொண்டாட்டங்களுக்கு நடுவே, இந்தக் கூட்டணி விரிசல் 'மாறுமா அல்லது 'ஸ்வீட் பாக்ஸ்' கொடுத்து சமாதானம் ஆவார்களா என்பதைப் பொறுத்திருந்துதான் பார்க்க வேண்டும்
Click it and Unblock the Notifications
Sign in with Google