TET Exam: ஆசிரியர் தகுதி தேர்வு தேதிகள் அறிவிப்பு.. பிப்ரவரி 18 முதல் ஏப்ரல் 10 வரை விண்ணப்பிக்கலாம்

Updated: Saturday, February 14, 2026, 2:38 [IST]

Subscribe to Oneindia Tamil

சென்னை: தமிழ்நாட்டில் ஆசிரியர் தகுதிக்கான ‛டெட்' தேர்வு (TET Exam)தேதி இன்று அறிவிக்கப்பட்டுள்ளது. அதன்படி ஜூலை 4, 5 ஆகிய தேதிகளில் ‛டெட்' தேர்வு நடைபெறும் என்று ஆசிரியர் தேர்வு வாரியம் தெரிவித்துள்ளது.

தமிழ்நாட்டில் அரசு மற்றும் அரசு உதவி பெறும் பள்ளிகளில் ஆசிரியராக பணியாற்ற TET எனும் ஆசிரியர் தகுதி தேர்வில் பாஸாக வேண்டும். இந்த ‛டெட்' தேர்வு என்பது ஆண்டுக்கு இரண்டு முறை நடத்தப்பட்டு வருகிறது. அந்த வகையில் 2026ம் ஆண்டுக்கான ‛டெட்' தேர்வு தேதிகள் இன்று அறிவிக்கப்பட்டுள்ளன.

ஆசிரியர் தேர்வு வாரியம் சார்பில் தேர்வு தேதிகள், விண்ணப்பம் செய்வதற்கான கால அவகாசம் உள்ளிட்ட பிற விவரங்கள் இன்று அதிகாரப்பூர்வமாக அறிவிக்கப்பட்டுள்ளது.

ஜூலை 4, 5ல் தேர்வு

இதுதொடர்பாக ஆசிரியர் தேர்வு வாரியம் கூறியுள்ளதாவது: ‛‛தமிழகத்தில் ஜூலை 4, 5 ஆகிய தேதிகளில் ஆசிரியர் தகுதி தேர்வு நடைபெறும். ஜூலை 4ல் ‛டெட்' முதல் தாள் தேர்வும், ஜூலை 5ம் தேதி ‛டெட்' 2ம் தாள் தேர்வு நடைபெறும்.

தேர்வுக்கு பிப்ரவரி 18 ம் தேதி முதல் ஏப்ரல் 10 ம்தேதி வரை ஆன்லைனில் விண்ணப்பம் செய்யலாம். தேர்வுக்கு முந்தைய நடைமுறைகள் பின்பற்றப்படும்'' என்று தெரிவிக்கப்பட்டுள்ளது.

விண்ணப்பிப்பது எப்படி?

விண்ணப்பதாரர்கள் www.trb.tn.nic.in என்ற ஆசிரியர் தேர்வு வாரிய இணைய தளம் மூலம் இணையவழியில் மட்டுமே விண்ணப்பிக்க வேண்டும். விண்ணப்பதாரர் தங்களுடைய பதிவுடன் ஆதார் எண்ணை இணைப்பது கட்டாயமாகும். முந்தைய நடைமுறை தான் பின்பற்றப்படும் என்று கூறப்பட்டுள்ளதால் இதற்கு முன்பே போல் ஆசிரியர்கள் தங்களின் தேர்வுக்கு தயாராகலாம்.

டெட் தேர்வு பின்னணி

முன்னதாக தமிழகத்தில் தொடக்க கல்விக்கான இடைநிலை ஆசிரியர், உயர்நிலை மற்றும் மேல் நிலைப் பள்ளிகளுக்கான பட்டதாரி ஆசிரியர்கள் நியமனம், ஆசிரியர் தகுதித் தேர்வின் மூலமாக தேர்வு செய்யப்படுகிறார்கள். தேசிய ஆசிரியர் கல்வி நிறுவனத்தின் வழிமுறைகளைப் பின்பற்றி இத்தேர்வு நடைபெற்று வரும் நிலையில் இன்று தேர்வு தேதிகள் அறிவிக்கப்பட்டுள்ளது.