கோட்சே பேரன்களுக்கு எதிராக பெரியார் பேரன்கள்..அமைச்சர் உதயநிதி ஸ்டாலின் தெறிக்கவிட்ட ட்வீட்!

Updated: Wednesday, November 15, 2023, 16:41 [IST]

Subscribe to Oneindia Tamil

சென்னை: "கோட்சே தூக்கிலிடப்பட்ட இந்நாளில், கோட்சேவின் பேரன்களுக்கு எதிராக பெரியாரின் பேரன்கள் கன்னியாகுமரி காந்தி மண்டபத்திலிருந்து புறப்படுகிறோம்" என திமுக இளைஞரணி செயலாளரும் தமிழ்நாடு அமைச்சருமான உதயநிதி ஸ்டாலின் தமது எக்ஸ் பக்கத்தில் அனல்பறக்க பதிவிட்டிருப்பது பேசுபொருளாகி இருக்கிறது.

திமுக இளைஞரணியின் 2-வது மாநில மாநாடு டிசம்பர் 17-ந் தேதி சேலத்தில் நடைபெற உள்ளது. இந்த மாநாட்டை முன்னிட்டு திமுக இளைஞரணியினர் மாநிலம் தழுவிய இரு சக்கர வாகன பேரணியை மேற்கொண்டுள்ளனர். தமிழ்நாடு முழுவதும் 8,647 கிலோமீட்டர்.. 13 நாட்கள் இந்த இருசக்கர வாகன பேரணி நடைபெற உள்ளது. 234 தொகுதிகளிலும் வலம் வரும் 188 பேர் 188 வாகனங்களில் சுமார் 3 லட்சம் பேரை சந்திக்கின்றனர்.

Thanthai Periyars grandsons march against Godses grandsons: Udhayanidhi Stalin

இந்த 234 தொகுதிகளையும் வள்ளுவர் மண்டலம், பெரியார் மண்டலம், அண்ணா மண்டலம், கலைஞர் மண்டலம் என பிரித்து பெயரிட்டிருப்பதும் பெரும் கவனத்தை ஈர்த்துள்ளது. இப்பேரணியை இன்று கன்னியாகுமரியில் அமைச்சர் உதயநிதி ஸ்டாலின் தொடங்கி வைத்தார்.

மேலும் இந்தப் பேரணி தொடர்பாக தமது எக்ஸ் பக்கத்தில் அமைச்சர் உதயநிதி ஸ்டாலின் பதிவிட்டுள்ளதாவது: கோட்சே தூக்கிலிடப்பட்ட இந்நாளில், கோட்சேவின் பேரன்களுக்கு எதிராக பெரியாரின் பேரன்கள் கன்னியாகுமரி காந்தி மண்டபத்திலிருந்து புறப்படுகிறோம்!

மாநில உரிமை மீட்புக்கான கழக இளைஞர் அணியின் 2 ஆவது மாநில மாநாடு சேலத்தில் டிசம்பர் 17 ஆம் தேதி நடைபெறவுள்ளது. இந்த முக்கியத்துவமிக்க மாநாட்டின் முழக்கத்தை, தமிழ்நாட்டின் பட்டிதொட்டியெங்கும் சேர்க்கின்ற விதமாக, 188 இரு சக்கர வாகனங்களைக் கொண்ட #DMKriders-ன் வாகனப் பேரணியை கன்னியாகுமரி திருவள்ளுவர் சிலை எதிரே இன்று தொடங்கி வைத்தோம்.

13 நாட்கள் - 234 தொகுதிகள் - 504 பிரச்சார மையங்கள் - 8,647 கிலோமீட்டர் என லட்சோப லட்ச இளைஞர்களை சந்திக்கவுள்ள இந்த இருசக்கர வாகனப் பேரணி, கழக வரலாற்றில் என்றைக்கும் நிலைத்திருக்கும்.

இந்தப் பயணத்தை மேற்கொள்ளும் கழக இளைஞர் படைக்கு என் மனமார்ந்த வாழ்த்துகள்! பாசிஸ்ட்டுகளை விரட்டி - மாநில உரிமைகளை மீட்க உறுதியேற்போம். இவ்வாறு அமைச்சர் உதயநிதி ஸ்டாலின் பதிவிட்டுள்ளார்.