தொங்கு சட்டசபை வந்தால்.. விஜய்தான் ஹீரோ.. ஆனால் பாஜக கையில்தான் குடுமி.. டெல்லி வைக்கும் செக்?

சென்னை: 2026 தமிழக சட்டமன்றத் தேர்தல் முடிவுகள் எந்தவொரு கட்சிக்கும் பெரும்பான்மை அளிக்காமல், ஒரு 'தொங்கு சட்டசபை' (Hung Assembly) சூழலை உருவாக்கினால், தமிழக அரசியலில் இதுவரை கண்டிராத திருப்பங்கள் ஏற்படக்கூடும்.

குறிப்பாக, நடிகர் விஜய்யின் தமிழக வெற்றி கழகம் (த.வெ.க) சுமார் 15 முதல் 20 இடங்களைக் கைப்பற்றும் பட்சத்தில், அவரே அடுத்த ஆட்சியைத் தீர்மானிக்கும் 'கிங்மேக்கராக' உருவெடுப்பார். உதாரணமாக இந்தியா டுடே - சி-வோட்டர் (C-Voter) Mood of the Nation ஆய்வு முடிவுகள், நடிகர் விஜய்யின் தமிழக வெற்றி கழகம் (TVK) கட்சிக்கு நல்ல வாக்கு வங்கி உள்ளதாக மறைமுகமாக தெரிவிக்கின்றன.

தற்போதைய சர்வேயின்படி, திமுகவின் இந்தியா கூட்டணி 45 சதவிகிதத்தையும், பாஜக என்டிஏ கூட்டணி 33% வாக்குகளையும் பெறும் என்று கணிக்கப்பட்டு உள்ளது. தவெக 15% முதல் 22% வரையிலான வாக்கு சதவீதத்தை எட்டக்கூடும் என அரசியல் நோக்கர்கள் கருதுகின்றனர். இந்த எண்கள் அதிகாரப்பூர்வமானவை அல்ல என்றாலும், கள நிலவரம் மற்றும் விஜய்யின் பொதுக்கூட்டங்களுக்குத் திரளும் தன்னார்வக் கூட்டம் இந்த ஊகங்களுக்கு வலு சேர்க்கின்றன.

ஆனால், இந்த அதிகாரம் அவருக்குச் சாதகமாக அமையுமா அல்லது மத்திய ஏஜென்சிகளின் நெருக்கடிக்கு வழிவகுக்குமா என்ற கேள்வி இப்போது எழுந்துள்ளது. தமிழகத்தைப் பொறுத்தவரை, திமுக மற்றும் அதிமுக ஆகிய இரு பெரும் துருவங்களுக்கு இடையிலான வெற்றி வித்தியாசம் என்பது வழக்கமாக 3% முதல் 5% வரை தான் இருக்கும். இத்தகைய சூழலில், ஒரு மூன்றாம் தரப்பு 20% வாக்குகளைத் தன்வசம் வைத்திருப்பது என்பது சாதாரணமான ஒன்றல்ல.

இந்த வாக்கு வங்கி விஜய்யிடம் இருக்குமானால், அவர் ஒரு "வீட்டோ" (Veto Power) அதிகாரத்தைப் பெற்றவராக மாறுகிறார். அதாவது, அவர் நினைத்தால் ஒரு கூட்டணியின் வெற்றியைத் தடுக்கவும் முடியும், அல்லது யார் ஆட்சி அமைக்கலாம் என்று முடிவு எடுக்க முடியும்.

நெருக்கடி கொடுக்கப்போகும் 'கரூர்' மற்றும் 'ஐடி' விவகாரங்கள்?

ஒருவேளை விஜய் யாருக்கு ஆதரவு அளிக்க வேண்டும் என்பதைத் தீர்மானிக்கும் சக்தியாக மாறினால், அவர் மீது பின்வரும் சட்ட ரீதியான அழுத்தங்கள் பிரயோகிக்கப்பட வாய்ப்புள்ளதாக அரசியல் நோக்கர்கள் கருதுகின்றனர்:

கரூர் சிபிஐ விசாரணை: 2025 செப்டம்பரில் கரூரில் நடந்த த.வெ.க மாநாட்டு நெரிசலில் 41 பேர் உயிரிழந்த சம்பவம் தொடர்பான வழக்கை தற்போது சிபிஐ விசாரித்து வருகிறது. ஒருவேளை தேர்தல் முடிவுகளுக்குப் பிறகு விஜய் எடுக்கும் முடிவு டெல்லி மேலிடத்திற்கு அதிருப்தி அளிப்பதாக இருந்தால், இந்த வழக்கில் விஜய் மற்றும் கட்சி நிர்வாகிகள் மீது கிரிமினல் அலட்சியம் போன்ற கடுமையான பிரிவுகளின் கீழ் நடவடிக்கை எடுக்கப்படலாம்.

வருமான வரி (IT) சிக்கல்கள்: விஜய்யின் பழைய வருமான வரித் தாக்கல் மற்றும் திரைப்பட வருமானங்கள் தொடர்பான அபராத வழக்குகளை (குறிப்பாக 2015-16 காலகட்டம்) வருமான வரித் துறை மீண்டும் கையில் எடுக்கக்கூடும். விஜய், வருமான வரித்துறையால் விதிக்கப்பட்ட ₹1.5 கோடி அபராதத்தை எதிர்த்துத் தொடுத்த வழக்கை, வருமான வரித்துறை கடுமையாக எதிர்த்துள்ளது. 2015-16 நிதியாண்டில் ₹15 கோடி கூடுதல் வருமானத்தை தாமாக முன்வந்து தெரிவிக்காததற்காக இந்த அபராதம் விதிக்கப்பட்டது.

இந்த வழக்கு விஜய்க்கு எதிராக செல்லும் வாய்ப்புகள் உள்ளன. 'கிங்மேக்கர்' அந்தஸ்தில் இருக்கும் ஒரு தலைவருக்கு இத்தகைய நிதி ரீதியான விசாரணைகள் பெரும் முட்டுக்கட்டையாக அமையலாம்.

"தொங்கு சட்டசபை அமையும் பட்சத்தில், விஜய் தன்னிச்சையாக முடிவெடுப்பதைத் தடுக்க மத்திய ஏஜென்சிகள் ஒரு கருவியாகப் பயன்படுத்தப்படலாம். இது விஜய்யின் அரசியல் முடிவுகளுக்கு விடப்படும் மிகப்பெரிய சவாலாக இருக்கும்," என்கிறார் மூத்த அரசியல் விமர்சகர்கள்.

விஜய்யின் முன்னால் இருக்கும் இக்கட்டான தேர்வுகள்

இத்தகைய அழுத்தங்கள் கொடுக்கப்பட்டால், விஜய்யின் முன் மூன்று வழிகள் மட்டுமே இருக்கும்:

திமுக-வுக்கு ஆதரவு அளித்தால்: இது பாஜக-வின் நேரடி எதிர்ப்பைத் தேடித்தரும். இதனால் சிபிஐ மற்றும் ஐடி விசாரணைகள் முன்பை விடத் தீவிரமடையக்கூடும்.

அதிமுக/பாஜக கூட்டணிக்கு ஆதரவு: இது ஒருவேளை அவருக்கு சட்ட ரீதியான நிம்மதியை தரலாம். ஆனால், விஜய்யின் "திராவிட-மதச்சார்பற்ற" கொள்கையை நம்பி வாக்களித்த இளைஞர்கள் மற்றும் சிறுபான்மையினரிடையே இது பெரும் பின்னடைவை ஏற்படுத்தும்.

ஆதரவு அளிக்க மறுத்தால்: இது தமிழகத்தில் மீண்டும் ஒரு தேர்தலுக்கு வழிவகுக்கும். நிதி ரீதியாகவும், நிர்வாக ரீதியாகவும் தவெக கட்சிக்கு இது பெரும் சுமையாக மாறும். 2026-ல் விஜய் ஒரு தீர்மானிக்கும் சக்தியாக உருவெடுக்கும்போது, அவர் தன் அரசியல் கொள்கையைக் காப்பாற்றிக் கொள்வாரா அல்லது சட்ட ரீதியான நெருக்குதல்களுக்குப் பணிவாரா என்பதைப் பொறுத்தே அவரின் அரசியல் அமையும்.

English summary

The Vijay Factor: Could the 'Kingmaker' Become a Target in a 2026 Hung Assembly?