கோபத்தில் தொண்டரை கன்னத்தில் அறைந்த திருமாவளவன்.. தேனியில் பரபரப்பு.. நடந்தது என்ன?

தேனி: தேனியில் விடுதலை சிறுத்தைகள் கட்சித் தலைவர் திருமாவளவன் தனது கட்சித் தொண்டர் ஒருவரை கன்னத்தில் அறைந்த சம்பவம் சமூக வலைதளங்களில் பெரும் சலசலப்புகளை ஏற்படுத்தியுள்ளது.

தேனி மாவட்டம் பெரியகுளம் சட்டமன்ற தனி தொகுதியில் விடுதலை சிறுத்தைகள் கட்சியின் வேட்பாளர் சக்திவேல் என்பவர் பானை சின்னத்தில் போட்டியிடுகிறார். விசிக வேட்பாளர் சக்திவேலுக்கு ஆதரவாக வாக்கு சேகரிப்பதற்காக விடுதலை சிறுத்தை கட்சியின் தலைவர் தொல்.திருமாவளவன் நேற்று பெரியகுளம் பகுதிக்கு வருகை தந்து பானை சின்னத்துக்கு வாக்கு சேகரிக்கும் பணியில் ஈடுபட்டார்.

அப்போது அவர் வந்த பிரச்சார வாகனத்தில் விடுதலை சிறுத்தை கட்சியினர் சிலர் மது போதையில் வாகனத்தில் ஏறி அவரை பேச விடாமல் தொடர்ந்து ரகளையில் ஈடுபட்டனர். அப்போது விசிக தலைவர் தொல் திருமாவளவன் கீழே இறங்குமாறு பலமுறை கூறியும் அவரது பேச்சைக் கேட்காமல் தொடர்ந்து அவரது கட்சியினர் மது போதையில் வாகனத்தில் ஏறி அவரை பேசவிடாமல் தொடர்ந்து ரகளையில் ஈடுபட்டனர்.

இதனால் ஆத்திரம் அடைந்த திருமாவளவன், வாகனத்தில் மது போதையில் இருந்த கட்சி இளைஞர் ஒருவரை கன்னத்தில் அறைந்து அவர்களை இறங்குமாறு கண்டித்தார். மேலும், திருமாவளவன் கடும் கோபமாக நான் பேசவா? வேண்டாமா? எனக் கேட்டார். அதனைத் தொடர்ந்தும் கூட, வாகனத்தை விட்டு இறங்காமல் இளைஞர்கள் அவர் பேசும்போது பின்னால் நின்று கொண்டு வாகனத்தில் கூச்சலிட்டவாறு தொடர்ந்து ரகளையில் ஈடுபட்டனர்.

இந்த சம்பவத்தால் அங்கு சிறிது நேரம் பரபரப்பான சூழ்நிலை நிலவியது. பின்னர் கட்சி நிர்வாகிகள் தலையிட்டு நிலைமையை கட்டுக்குள் கொண்டு வந்தனர். அதனைத் தொடர்ந்து அவர் பேசி முடித்த நிலையில் பழைய பேருந்து நிலையத்தில் உள்ள டாக்டர் அம்பேத்கர் சிலைக்கு மாலை அணிவிப்பார் என எதிர்பார்த்து அக்கட்சி தொண்டர்கள் காத்திருந்த நிலையில் மாலை அணிவிக்காமல் சென்றது குறிப்பிடத்தக்கது.

English summary

The incident in Theni, where VCK leader Thirumavalavan slapped a party cadre on the cheek, has sparked a major uproar on social media.