ஜிகே வாசன் கொடுத்த சிக்னல்! அதிரும் பாஜக! அதிமுக பக்கம் சாய்கிறதா தமாக? இன்று நடந்த முக்கிய மீட்டிங்

சென்னை: அதிமுக பொதுச்செயலாளர் எடப்பாடி பழனிசாமியை தமிழ் மாநில காங்கிரஸ் தலைவர் ஜிகே வாசன் சந்தித்து பேசினார். வரவிருக்கும் நாடாளுமன்ற தேர்தல் தொடர்பாக இரு தலைவர்களும் ஆலோசித்து இருக்கலாம் என சொல்லப்படுகிறது.

நாடாளுமன்ற தேர்தலுக்கு இன்னும் சில மாதங்களே எஞ்சியுள்ள நிலையில், தேர்தல் களம் அனல் பறக்க தொடங்கிவிட்டது. திமுக தனது கூட்டணி கட்சிகளுடன் தொகுதி பங்கீடு குறித்த பேச்சுவார்த்தையை தொடங்கிவிட்டது. மறுபக்கம் அதிமுகவும் தேர்தலை எதிர்கொள்ள ஆயத்தமாகி வருகிறது. அரசியல் கட்சியை தொடங்கியுள்ள நடிகர் விஜய், நாடாளுமன்ற தேர்தலில் போட்டியில்லை என்று அறிவித்து இருக்கிறார்.

இதனால் நாடாளுமன்ற தேர்தல் களத்தில் விஜயின் தமிழக வெற்றி கழகம் இல்லை. பாஜகவை கூட்டணியில் இருந்து அதிமுக கழற்றிவிட்டதால் தனித்து விடப்பட்டு இருக்கும் பாஜக, தனியாக ஒரு கூட்டணி அமைத்து தேர்தலை எதிர்கொள்ள திட்டமிட்டுள்ளதாக தெரிகிறது. இதனால், தமிழகத்தில் மும்முனை போட்டி நிலவும் என எதிர்பார்க்கப்படுகிறது.

அதிமுக கூட்டணியில் தற்போது வரை எந்த கட்சியுடனும் அதிகாரப்பூர்வ பேச்சுவார்த்தையை தொடங்கவில்லை. பாமக மற்றும் தேமுதிகவுடன் ரகசிய பேச்சுவார்த்தை நடப்பதாக அரசியல் வட்டாரத்தில் பேசப்படுகிறது. தமிழ் மாநில காங்கிரஸ் கட்சி பாஜக கூட்டணியுடன் செல்லுமா அல்லது அதிமுகவுடன் கூட்டணி அமைத்து செல்லுமா என்பது குறித்த எதிர்பார்ப்பு அரசியல் வட்டாரத்தில் நீடிக்கிறது.

இந்த நிலையில், அதிமுக பொதுச்செயலாளர் எடப்பாடி பழனிசாமியை தமிழ் மாநில காங்கிரஸ் தலைவர் ஜிகே வாசன் சந்தித்து பேசினார். சென்னை பசுமை வழிச்சாலையில் உள்ள எடப்பாடி பழனிசாமியின் இல்லத்தில் வைத்து அரை மணி நேரம் சந்திப்பு நடைபெற்றதாக தகவல் வெளியாகியுள்ளது. மேலும், இந்த சந்திப்பில் வரவிருக்கும் நாடாளுமன்ற தேர்தல் தொடர்பாக இரு தலைவர்களும் ஆலோசித்து இருக்கலாம் என சொல்லப்படுகிறது.

English summary

Tamil State Congress President GK Vasan met AIADMK General Secretary Edappadi Palaniswami. It is said that the two leaders may be discussing the upcoming parliamentary elections.