மாறி மாறி.. படத்தை வாழ்த்திய அண்ணாமலை! பயணத்தை வாழ்த்திய நடிகர் சசிகுமார்!
சென்னை: சசிகுமார் நடித்து வெளியாகியிருந்த நந்தன் திரைப்படத்தை பார்த்த பாஜக தலைவர் அண்ணாமலை, இந்த திரைப்படம் சர்வாதிகார அரசியல்வாதிகளைத் தோலுரித்துக் காட்டியிருக்கிறது என்று ட்வீட் பதிவிட்டுள்ளார். மேலும், நடிகர் சசிகுமாருக்கு பாராட்டும் தெரிவித்து இருந்தார். இந்த நிலையில் அண்ணாமலைக்கு நன்றி சொல்லி நடிகர் சசிகுமார் ட்வீட் பதிவிட்டுள்ளார்.
சுப்பிரமணியபுரம், நாடோடிகள், சுந்தரபாண்டியன் என பல ஹிட் படங்களில் நடித்து தமிழ் திரையுலகின் குறிப்பிடத்தக்க நடிகர்களில் ஒருவராக இருப்பவர் சசிகுமார். இவரது நடிப்பில் உருவாகியுள்ள "நந்தன்" திரைப்படம் கடந்த செப்டம்பர் 20 ஆம் தேதி திரைக்கு வந்தது. கிராம பஞ்சாயத்து தேர்தலில் ஏற்படும் சாதியக் கொடுமைகளை மையமாக கொண்டு இந்த படம் அமைந்துள்ளது.
ரசிகர்கள் மத்தியில் இந்த படம் நல்ல வரவேற்பை பெற்றுள்ளது. தற்போது ஒடிடியில் இந்த படம் ரிலீஸ் ஆகியுள்ளது. சசிகுமாரின் நடிப்பும் இந்த படத்தில் பெரிதாக பேசப்பட்டது. சாதி ரீதியாகப் பட்டியலின மக்கள் அனுபவித்து வரும் வலிகளைப் பேசும் படமாக நந்தன் அமைந்து இருப்பதாக நெட்டிசன்களும் பாராட்டி வருகிறார்கள். நந்தன் படத்தை பார்த்த திரையுலக நட்சத்திரங்களும் அரசியல் தலைவர்களும் பாராட்டியுள்ளனர்.
பாமக தலைவர் அன்புமணி ராமதாஸ், நாம் தமிழர் கட்சி ஒருங்கிணைப்பாளர் சீமான் ஆகியோர் பாராட்டியிருந்தனர். இந்த நிலையில், லண்டனில் படிப்புக்காக சென்றுள்ள அண்ணாமலையும் நந்தன் படத்தை பார்த்து பாராட்டியுள்ளார். அண்ணாமலை இது தொடர்பாக தனது எக்ஸ் தளத்தில் கூறியிருப்பதாவது:-
OTT தளத்தில் 'நந்தன்’ திரைப்படத்தைப் பார்த்தேன். பட்டியலின மக்களை முன்னேற்றுகிறோம் என்ற பெயரில் தங்கள் சுயலாபத்திற்காகப் பட்டியலின மக்களைச் சுரண்டி ஆட்சி செய்யும் சர்வாதிகார அரசியல் வாதிகளைத் தோலுரித்துக் காட்டியிருக்கிறது இத்திரைப்படம். தனது தேர்ந்த நடிப்பின் மூலம் பட்டியலின ஊராட்சி மன்ற தலைவர்கள் படும் இன்னல்களை நம் கண்முன் கொண்டு வந்த நடிகர் சகோதரர் சசிகுமார் அவர்களுக்கு எனது மனமார்ந்த வாழ்த்துக்கள்.
பட்டியலின மக்களுக்காக ஒதுக்கப்பட்ட ஊராட்சிகளில் நடக்கும் அவல அரசியலை உள்ளபடியே காட்சிப்படுத்தியிருக்கும் இயக்குநர் திரு @erasaravanan அவர்களுக்கும் எனது மனமார்ந்த வாழ்த்துக்கள். பல ஆழமான கருத்துக்கள் நிறைந்த 'நந்தன்’ திரைப்படம் காலத்திற்கும் மக்கள் மனதில் இடம் பெற்றிருக்கும் என்பதில் சந்தேகமில்லை. இவ்வாறு அவர் கூறியிருந்தார்.
இந்த நிலையில் அண்ணாமலையின் எக்ஸ் தள ட்வீட்டுக்கு பாராட்டு தெரிவித்து நடிகர் சசிகுமார் ட்வீட் வெளியிட்டுள்ளார். அதில், "பல்வேறு பணிகளுக்கு மத்தியிலும் நேரம் ஒதுக்கி 'நந்தன்’ படத்தைப் பார்த்ததற்கும், பாராட்டியதற்கும் மனமார்ந்த நன்றிகள் சார்… உங்கள் பயணம் வெற்றிகரமாக அமையட்டும்" என்று சசிகுமார் பதிவிட்டுள்ளார்.
Click it and Unblock the Notifications
Sign in with Google