விவசாய சட்டத்துல கமாவை கூட மாத்த முடியாது-இது பாஜக ஆட்சின்னு கெத்து காட்டிய அண்ணாமலை வீடியோ வைரல்

Updated: Friday, November 19, 2021, 21:27 [IST]

Subscribe to Oneindia Tamil

சென்னை: மத்திய அரசின் விவசாய சட்டங்களை முழு வீச்சில் ஆதரித்து பேசிய பாஜக தலைவர்களின் வீடியோக்கள் இப்போது சமூக வலைதளங்களில் வைரலாகி வருகிறது. தமிழக பாஜக தலைவர் அண்ணாமலை, விவசாய சட்டத்தில் ஒரு கமாவை கூட மாத்த முடியாதுன்னு பேசிய வீடியோவும் வைரலாக ஷேர் செய்யப்பட்டு வருகிறது.

விவசாய சட்டம் வாபஸ்

இந்த நிலையில்தான் இன்று நாட்டு மக்களுக்கு உரையாற்றிய பிரதமர் மோடி, மூன்று விவசாய சட்டங்களையும் திரும்பப் பெறுவதாக அறிவித்தார். மேலும் நாடாளுமன்றத்தில் மூன்று விவசாய சட்டங்களையும் அதிகாரப்பூர்வமாக ரத்து செய்ய நடவடிக்கை எடுக்கப்படும் என்றார். அத்துடன் டெல்லியில் போராடும் விவசாயிகள் தங்களது போராட்டத்தைக் கைவிட வேண்டும் என்றும் வலியுறுத்தி இருந்தார்.

பழைய பேச்சுகள் மீம்ஸ்

பிரதமர் மோடியின் இந்த அறிவிப்புக்கு அனைத்து அரசியல் கட்சித் தலைவர்களும் வரவேற்பு தெரிவித்துள்ளனர். இந்த நிலையில்தான் தமிழக பாஜக மற்றும் அதன் கூட்டணி கட்சித் தலைவர்களின் விவசாய சட்டங்களுக்கான ஆதரவு பேச்சுகள் இப்போது மீம்ஸ்களில் உருட்டப்பட்டு வருகிறது.

முதல்வர் ஸ்டாலின் அறிக்கை

இன்று முதல்வர் மு.க.ஸ்டாலின் தமது அறிக்கையில், மூன்று வேளாண் சட்டங்களுக்கு ஆதரவாக அ.தி.மு.க. பரப்புரையில் ஈடுபட்டது. அந்தச் சட்டங்களில் என்ன தவறு இருக்கிறது என்று பத்திரிகையாளர்களை வாதத்திற்கு அழைத்தார் அன்றைய முதலமைச்சர் பழனிசாமி. பா.ஜ.க.வைவிட அதிகமாக அவர்தான் ஆதரித்தார். இவரை அழைத்துச் சென்று டெல்லியில் போராடி வரும் உழவர்களுக்கு விளக்கம் சொல்ல வைக்கலாமே என்று நான் அப்போது சொன்னேன். அந்தளவுக்கு அ.தி.மு.க. அந்தச் சட்டங்களை ஆதரிப்பதில் தனது அடிமை விசுவாசத்தைக் காட்டியது என சுட்டிக்காட்டியுள்ளார்.

அண்ணாமலையின் கெத்து பேச்சு

இதேபோல் தமிழக பாஜக தலைவர் அண்ணாமலை பெடு கெத்தாக விவசாய சட்டங்களை ஆதரித்து பேசினார். அவரது வீடியோ பேச்சுதான் இப்போது வைரலாக சமூக வலைதளங்களில் ஷேர் செய்யப்பட்டு வருகிறது. அந்த வீடியோவில், நம்முடைய அரசு என்ன சொல்கிறது என்றால் 500 வருஷம் போராட்டம் பண்ணினாலும் இந்த சட்டத்தில் (விவசாய சட்டங்களின் நகல்களை கையில் எடுத்து காண்பித்தபடி) ஒரு கமாவை கூட மாத்தமாட்டோம். ஏனென்றால் இது காங்கிரஸ் ஆட்சி கிடையாது. இது பாஜகவின் ஆட்சி. யாருக்கும் பயப்படமாட்டோம். இது மக்களுக்காக கொண்டுவரப்பட்ட சட்டம். மக்களுக்கு நல்லது செய்யக் கூடிய சட்டம். என்னதான் நீங்க மிரட்டி உருட்டி ஷூட்டிங் நடத்தி பச்சை துண்டு போட்டாலும் எதுவும் செய்ய முடியாது என கூறியிருக்கிறார்.