Madras Day: சென்னை மக்களுக்கு முதல்வர் ஸ்டாலின் வாழ்த்து! பழைய போட்டோக்களை பகிர்ந்த தெற்கு ரயில்வே!

Updated: Sunday, August 22, 2021, 17:58 [IST]

Subscribe to Oneindia Tamil

சென்னை: சென்னை பெருநகர மக்களுக்கு Madras Day வாழ்த்துகளை முதல்வர் மு.க.ஸ்டாலின் தெரிவித்துள்ளார். Madras Day-வை முன்னிட்டு எழும்பூர், ராயபுரம் உள்ளிட்ட ரயில் நிலையங்களின் பழைய படங்களை பகிர்ந்து வாழ்த்து தெரிவித்திருக்கிறது தெற்கு ரயில்வே.

மு.க.ஸ்டாலின் வாழ்த்து

இதனிடையே சென்னை மாநகர மக்களுக்கு முதல்வர் மு.க.ஸ்டாலின் Madras Day வாழ்த்துகளை தெரிவித்துள்ளார். அவர் தமது ட்விட்டர் பக்கத்தில் பதிவிட்டுள்ளதாவது: சீர்மிகு, சிங்கார - வந்தாரை வாழவைக்கும் தருமமிகு சென்னை, பல அடையாளங்களுக்கும் சிறப்புகளுக்கும் சொந்தமானது. தொலைநோக்குப் பார்வையுடன் சென்னையின் வளர்ச்சிக்குப் பங்களித்தது திமுக அரசு; இனியும் தொடரும்.சென்னை மாநகர மக்களுக்கு #MadrasDay வாழ்த்துகள்!. இவ்வாறு முதல்வர் மு.க.ஸ்டாலின் பதிவிட்டுள்ளார்.

கனிமொழி ட்வீட்

திமுக லோக்சபா எம்.பி. கனிமொழி தமது ட்விட்டர் பக்கத்தில் பதிவிட்டுள்ளதாவது: சென்னை தமிழகத்தின் தலைநகரமாக மட்டுமல்லாமல் கலை நகரமாகவும் கலாச்சார நகரமாகவும் திகழ்கிறது. சென்னையை வாழவைத்துக் கொண்டிருக்கும் அனைத்து சென்னை வாசிகளுக்கும் 382-வது சென்னை தின வாழ்த்துகள். சென்னை வரலாறு குறித்தும் கலாச்சார சிறப்பு குறித்தும் அழுத்தமாக பதிவு செய்த திரு.சு. முத்தையா அவர்கள் தான் முதன்முதலில் சென்னை தின கொண்டாட்டத்தை முன்னெடுக்கச் செய்தவர் என்பதை இத்தருணத்தில் நினைவு கூர விரும்புகிறேன். இவ்வாறு கனிமொழி எம்.பி. பதிவிட்டுள்ளார்.

எஸ்.பி. வேலுமணி வாழ்த்து

அதிமுக முன்னாள் அமைச்சர் எஸ்.பி.வேலுமணி தமது ஃபேஸ்புக் பக்கத்தில் வெளியிட்டுள்ள வாழ்த்து: கனவுகளோடு நாடி வருபவர்களுக்கு முகவரி தேடித்தரும் "சென்னை நகரம்" தோற்றுவிக்கப்பட்ட தினம் இன்று. உழைப்பிற்கு அடையாளமாக பெயர் பெற்ற சென்னையின் வரலாற்றை பேணிக்காப்போம்! சென்னையின் பெருமையை போற்றுவோம்! அனைவருக்கும் சென்னை தின வாழ்த்துகள்! இவ்வாறு வேலுமணி வாழ்த்து தெரிவித்துள்ளார்.

தெற்கு ரயில்வே புகைப்படங்கள்

மேலும் தெற்கு ரயில்வே நிர்வாகம் தமது ட்விட்டர் பக்கத்தில் சென்னை எழும்பூர், சென்னை சென்ட்ரல் மற்றும் பழமைவாய்ந்த ராயபுரம் ஆகிய ரயில் நிலையங்களின் படங்களை பகிர்ந்துள்ளது. சென்னை மக்களுக்கு Madras Day வாழ்த்துகள் சொல்லும் விதமாக இந்த படங்கள் வெளியிடப்பட்டுள்ளன.