மீண்டும் இலங்கை கடற்படையின் அட்டூழியம்.. பாம்பன் மீனவர்கள் 10 பேர் உள்பட 14 தமிழக மீனவர்கள் கைது

Updated: Wednesday, August 6, 2025, 8:46 [IST]

Subscribe to Oneindia Tamil

சென்னை: எல்லை தாண்டி மீன் பிடித்ததாகக் கூறி தமிழக மீனவர்களை இலங்கை கடற்படையினர் கைது செய்வதும், மீனவர்கள் மீது துப்பாக்கிச் சூடு நடத்தும் சம்பவங்களும் தொடர்ந்து அதிகரித்து வருகின்றன. இந்நிலையில், பாம்பனில் இருந்து மீன் பிடிக்கச் சென்ற 10 மீனவர்கள் உள்பட 14 தமிழக மீனவர்களை படகுடன் இலங்கை கடற்படையினர் கைது செய்துள்ளனர்.

தமிழகம் மற்றும் புதுச்சேரியைச் சேர்ந்த மீனவர்கள் கடலுக்கு மீன் பிடிக்கச் செல்லும்போதெல்லாம் எல்லை தாண்டி மீன் பிடித்ததாக கூறி மீனவர்கள் மீது இலங்கை கடற்படையினர் தாக்குதல் நடத்துவது, கைது செய்வது போன்ற சம்பவங்கள் தொடர்ந்து அதிகரித்து வருகின்றன. மீனவர்களின் மீன்பிடிப் படகுகளை பறிமுதல் செய்து அரசுடைமையாக்குவது போன்ற நடவடிக்கைகளும் மேற்கொள்ளப்படுகின்றன.

இதனால், மீனவர்கள் தங்களின் வாழ்வாதாரத்தையே இழக்கும் நிலை ஏற்பட்டுள்ளது. மீனவர்கள் தொடர்ந்து கைது செய்யப்படும் சம்பவங்களும், அபராதம் விதிக்கப்படுவதும், துப்பாக்கிச் சூடு நடத்துவதும் தொடர்ந்து அரங்கேறி வருகின்றன.

ஒவ்வொரு முறையும் தமிழக மீனவர்கள் கைது செய்யப்படும் போதும், மீன்பிடிப் படகுகள் பறிமுதல் செய்யப்படும்போதும், மீனவர்களையும், படகுகளையும் விடுவிக்கக் கோரி தமிழக முதல்வர் மு.க.ஸ்டாலின் பிரதமர் மோடிக்கு தொடர்ந்து கடிதம் எழுதி வருகிறார்.

இந்நிலையில், பாம்பன் தெற்கு மீன்பிடி துறைமுகத்தில் இருந்து மீன் பிடிப்பதற்காகச் சென்ற 10 மீனவர்கள் உள்பட 14 தமிழக மீனவர்களை படகுடன் இலங்கை கடற்படையினர் கற்பிட்டி கடற்பரப்பில் வைத்து கைது செய்துள்ளனர். இதைத்தொடர்ந்து, தமிழக மீனவர்களிடம் விசாரணை மேற்கொள்வதற்காக புத்தளம் கடற்படை முகாமிற்கு மீனவர்கள் அழைத்துச் செல்லப்பட்டுள்ளதாக தகவல் வெளியாகியுள்ளது.