தக்காளி சாதம் போல் இனி சாம்பார் சாதமும் கிடைக்காது.. விண்ணை முட்டும் துவரம் பருப்பு விலை

சென்னை: துவரம் பருப்பின் விலை உயர்ந்துள்ளதால் இல்லத்தரசிகள் கடும் அதிர்ச்சிக்குள்ளாகியுள்ளனர்.

கடந்த சில தினங்களாக தக்காளியின் விலை விண்ணை முட்டும் அளவுக்கு உயர்ந்து காணப்படுகிறது. சில்லரை விற்பனையில் ஒரு கிலோ தக்காளி விலை ரூ 140 வரை விற்கப்படுகிறது. கோடை காலங்களில் கிலோ 10 ரூபாய்க்கு உதைப்பட்டு கொண்டிருக்கும் இந்த தக்காளியின் விலை தற்போது தங்கத்தை போல் உயர்ந்து வருகிறது.

இன்றைய நிலவரப்படி ரூ 5 குறைந்து தக்காளி ஒரு கிலோ ரூ 120 க்கு விற்பனை செய்யப்படுகிறது. இதைத் தொடர்ந்து மளிகை பொருட்களின் விலையும் கடும் உச்சத்தை தொட்டுள்ளதால் இல்லத்தரசிகள் கடும் வேதனையில் உள்ளனர்.

தமிழகத்தில் விளைச்சல் இருந்தாலும் பொதுமக்களின் தேவை கருதி ஆந்திரா, கேரளா, மகாராஷ்டிரா போன்ற அண்டை மாநிலங்களில் மளிகை பொருட்கள் விற்பனைக்காக கொண்டு வரப்படுகிறது. இந்த அண்டை மாநிலங்களிலும் விளைச்சல் குறைந்திருப்பதால் எதிரொலியாக தமிழகத்திற்கு வரும் மளிகை பொருட்கள் வராமல் உள்ளன.

இதனால்தான் உணவு பொருட்களின் விலை 20 சதவீதம் வரை உயர்ந்துள்ளது. குறிப்பாக துவரம் பருப்பு விலை வரலாறு காணாத வகையில் உயர்ந்திருக்கிறது. கடந்த வாரம் ரூ 90 க்கு விற்கப்பட்ட ஒரு கிலோ துவரம் பருப்பு ரூ 140 முதல் 170 வரை விற்பனையாகிறது.

அது போல் மிளகாய் தூள், சர்க்கரை, மிளகாய் உள்ளிட்டவைகளின் விலையும் அதிகரித்துள்ளது. அரிசி விலை உயர்ந்துள்ளது. அது போல் போக்குவரத்து வாகனம், சரக்கை ஏற்றி இறக்க ஆட்கள் கூலி உள்ளிட்டவை உயர்ந்துள்ளதாலும் மளிகை பொருட்கள் உயர்ந்துள்ளதாக தெரிகிறது.

மளிகை பொருட்கள் உயர்ந்தால் உணவகங்களில் உணவு பொருட்களின் விலையும் உயரும். இதனால் குடும்பத்தை விட்டு பிழைப்பாக வெளியூர்களில் தங்கி வேலை பார்ப்போர் ஹோட்டல்களில் சாப்பிடுவது கூடுதல் நிதிச்சுமையை கொடுக்கும் என தெரிகிறது. ஏற்கெனவே சிலிண்டர் விலை உயர்வு, பெட்ரோல் டீசல் விலை உயர்வால் மக்கள் விழிப்பிதுங்கி வரும் நிலையில் துவரம் பருப்பு விலை அதிகரிப்பால் அவதிக்குள்ளாகி வருகிறார்கள்.

English summary

Toor dal price hike in Tamilnadu. It hikes from Rs 90 to Rs 130 per kg.