"உன் கூடவுமா அரசியல் பண்ணனும்"..இயக்குநர் போஸ் வெங்கட் மிட்நைட் டோஸ்.. ரவுண்டு கட்டிய விஜய் நண்பாஸ்

சென்னை: திமுகவைச் சேர்ந்த இயக்குநரும் நடிகருமான போஸ் வெங்கட், நடிகர் விஜய்-க்கு எதிராக நள்ளிரவில் பதிவிட்ட ட்வீட்டால் எக்ஸ் தளம் விடிய விடிய ரணகளமாகிவிட்டது. உன் கூடவுமா அரசியல் பண்ணனும் என்ற இயக்குநர் போஸ் வெங்கட்டின் இந்த பதிவுக்கு எதிராக விஜய் கட்சியான தமிழக வெற்றிக் கழகத்தின் தொண்டர்கள் தற்போது வரை தொடர்ந்து எதிர்வினையாற்றி வருகின்றனர்.

நடிகரான போஸ் வெங்கட், இயக்குநராக கன்னி மாடம் மற்றும் தற்போது வெளியான சார் திரைப்படங்களை இயக்கி உள்ளார். அண்மையில் கங்குவா பட இசைவெளியீட்டு விழாவில் நடிகர் சூர்யா, அரசியலுக்கு வர வேண்டும் என போஸ் வெங்கட் அழைப்பு விடுத்து பேசியது பேசுபொருளானது. திமுகவைச் சேர்ந்தவர் இயக்குநர் போஸ் வெங்கட்.

தற்போது விக்கிரவாண்டி வி.சாலையில் நடைபெற்ற தமிழக வெற்றிக் கழகத்தின் மாநாட்டில் நடிகர் விஜய் பேசிய பேச்சை போஸ் வெங்கட் கடுமையாக விமர்சித்து நள்ளிரவில் எக்ஸ் பக்கத்தில் ட்வீட் போட்டிருந்தார். அதில், "யப்பா.. உன் கூடவுமா அரசியல் பண்ணனும் .. பாவம் அரசியல்.. பள்ளிக்கூட ஒப்பிப்பு.. சினிமா நடிப்பு. மற்றும் அதீத ஞாபக சக்தி.. வியப்பு.. எழுதி கொடுத்தவன் நல்ல வாசிப்பாளன்.. முடிவு??? பாப்போம்" என்பதுதான் போஸ் வெங்கட் போட்ட ட்வீட்.

இந்த பதிவுக்கு உடனடியாகவே விஜய் கட்சியான தமிழக வெற்றிக் கழகத்தின் தொண்டர்கள் பதிலடி தர தொடங்கினர். தற்போது வரை இந்த அக்கப்போர் எக்ஸ் தளத்தில் பற்றி எரிந்து கொண்டிருக்கிறது. "யாரோ ஒரு நடிகரின் விழாவிற்கு அவரை பார்க்க வந்த சில ஆயிரம் ரசிகர்கள் முன்னிலையில் நடுவில் ஒரு நாலு வரி பேச நீ எவ்வளவு மனப்பாடமும் ஒப்பிப்பும் செய்தாய்? அப்போது தன்னை மட்டுமே பார்க்க வந்த ஐந்து லட்சம் ரசிகர்கள் முன்னிலையில் ஒரு மணி நேரம் பேச அவர் பல மடங்கு மனப்பாடமும் ஒப்பிப்பும் செய்வதில் எந்த தவறும் இல்லை!" என்பது உள்ளிட்ட பல பதில்கள் அந்த பதிவில் தரப்பட்டுள்ளன.

English summary

TVK Cadres Troll DMK's Director Bose Venkat tweet against Actor Vijay.