5 மண்டலங்கள்.. கோவையில் முதல் பூத் கமிட்டி மாநாடு.. தேதி குறித்த விஜய்.. தவெக பரபர உத்தரவு!

Updated: Saturday, April 12, 2025, 11:16 [IST]

Subscribe to Oneindia Tamil

சென்னை: தமிழக வெற்றிக் கழகம் சார்பாக தமிழ்நாட்டின் 5 மண்டலங்களில் பூத் கமிட்டி மாநாடு நடத்த திட்டமிடப்பட்டுள்ளது. மேற்கு, வடக்கு, தெற்கு, டெல்டா மற்றும் மத்திய மாவட்டங்களில் பூத் கமிட்டி மாநாடு நடத்தப்பட உள்ள நிலையில், கோவையில் முதலாவது பூத் கமிட்டி பயிற்சி மாநாட்டை நடத்த திட்டமிடப்பட்டுள்ளதாக தகவல் கிடைத்துள்ளது.

கடந்த மாதம் தமிழக வெற்றிக் கழகம் சார்பாக பொதுக்குழு, செயற்குழு கூட்டம் நடத்தப்பட்டது. அதன்பின் மீண்டும் விஜய் வழக்கம் போல் அறிக்கைகளை மட்டுமே வெளியிட்டு வருகிறார். தமிழக அரசியல் களம் சூடுபிடித்துள்ள நிலையில், தவெக தலைவர் விஜய் இன்னும் களத்திற்கு வராமல் அரசியல் செய்து வருவது அக்கட்சி நிர்வாகிகளிடையே அதிருப்தியை ஏற்படுத்தியுள்ளது.

TVK Leader Vijay planning to conduct a Booth Committee conference in the 5 Zones in the Tamilnadu

மாதத்திற்கு ஒரு நிகழ்ச்சி

மாதத்திற்கு ஒரு விழா என்று விஜய் பங்கேற்று வருவது அக்கட்சியினர் மத்தியிலும் விவாத பொருளாக மாறியது. இதனால் தவெக தலைவர் விஜய் விரைவில் தமிழ்நாடு முழுக்க சுற்றுப்பயணம் மேற்கொள்ள வேண்டும் என்று பலரும் கூறி வருகின்றனர். இந்த நிலையில் நேற்று பனையூரில் தவெக மாவட்டச் செயலாளர்கள் கூட்டம் நடைபெற்றது.

பூத் கமிட்டி மாநாடு

விஜய் தலைமையில் நடைபெற்ற மாவட்டச் செயலாளர்கள் கூட்டத்தில் பல்வேறு முடிவுகள் எடுக்கப்பட்டுள்ளன. அதன்படி அடுத்ததாக தமிழக வெற்றிக் கழகம் சார்பாக பூத் கமிட்டி மாநாடு நடத்த திட்டமிடப்பட்டுள்ளது. ஒரே மாநாக அல்லாமல் தமிழ்நாட்டின் 5 மண்டலங்களில் பூத் கமிட்டி மாநாட்டை நடத்த தவெக முடிவு செய்திருக்கிறது.

5 மண்டலங்கள்

வடக்கு, தெற்கு, மேற்கு, டெல்டா மற்றும் மத்திய மண்டலங்களில் பூத் கமிட்டி மாநாட்டை நடத்த தமிழக வெற்றிக் கழகம் திட்டமிட்டுள்ளது. அதில் முதலாவதாக கோவையில் பூத் கமிட்டி பயிற்சி மாநாட்டை நடத்த உள்ளதாக தெரிவிக்கப்பட்டுள்ளது. இந்த பூத் கமிட்டி மாநாட்டில் பொதுமக்களுக்கு அனுமதியில்லை என்றும், பூத் கமிட்டி உறுப்பினர்களுக்கு மட்டுமே அனுமதி என்றும் தெரிவிக்கப்பட்டுள்ளது.

விஜய் சுற்றுப்பயணம்

அதுமட்டுமல்லாமல் ஜூன் மாதம் வரும் விஜய் பிறந்தநாள் முதல் தமிழ்நாடு முழுவதும் அவர் சுற்றுப்பயணம் தொடங்குவார் என்று கூறப்படுகிறது. இதனால் விஜய் சுற்றுப்பயணத்திற்கு ஏற்றவாறு மாவட்டச் செயலாளர்கள் தங்களின் மாவட்டங்களில் சுற்றுப்பயணம் தொடங்கும் இடம், நிகழ்ச்சி நடக்கும் இடம், மக்களை சந்திக்கும் இடம் மற்றும் உள்ளூர் பிரச்சனைகள் குறித்து அறிக்கை அளிக்கவும் உத்தரவிடப்பட்டுள்ளது.