VIjay Speech: நோட் பண்ணிக்கோங்க.. 2026ல் திமுக vs தவெக இடையில் மட்டுமே போட்டி.. தவெக தலைவர் விஜய் பேச்சு!

Updated: Friday, March 28, 2025, 14:28 [IST]

Subscribe to Oneindia Tamil

சென்னை: 2026 சட்டமன்றத் தேர்தலில் திமுக மற்றும் தவெக இடையில் மட்டுமே போட்டி என்று தமிழக வெற்றிக் கழகத் தலைவர் விஜய் தெரிவித்துள்ளார். அடுத்த ஆண்டு தமிழ்நாடு இதுவரை சந்திக்காத ஒரு தேர்தலை சந்திக்கும் என்று கூறியுள்ள விஜய், திமுக மற்றும் பாஜக மறைமுக கூட்டணியை வைத்து ஆட்சி செய்து வருவதாகவும் விமர்சித்துள்ளார்.

தமிழக வெற்றிக் கழகத்தின் முதல் பொதுக்குழு கூட்டம் சென்னையில் உள்ள ஸ்ரீராமச்சந்திரா ஹாலில் நடைபெற்றது. இந்த பொதுக்குழு கூட்டத்திற்கு சிறப்பு விருந்தினர்களாக தவெக தலைவர் விஜய்-ன் தந்தை எஸ்.ஏ.சந்திரசேகர் மற்றும் தாய் ஷோபா ஆகியோர் பங்கேற்றனர். இந்த பொதுக்குழு கூட்டத்தில் தவெக தலைவர் விஜய் பேசுகையில், ஒவ்வொரு குடும்பமும் நன்றாக வாழ வேண்டும் என்று நினைப்பது தானே அரசியல்.. அதுதான் தவெக அரசியல்.

ஆனால் திராவிட மாடல் என்று மக்கள் விரோத ஆட்சியை மன்னராட்சியை போல் நடத்தும் இவர்கள், நமக்கு எதிராக ஏராளமான செயல்களில் ஈடுபட்டு வருகிறார்கள். மாநாடு தொடங்கி புத்தக வெளியீட்டு விழா, 2வது ஆண்டு விழா, இப்போது பொதுக்குழு வரை எத்தனை தடைகளை உருவாக்குகிறார்கள்? அத்தனை தடைகளை கடந்தும் தவெக நிகழ்ச்சிகள் நடந்து கொண்டே இருக்கிறது. இதனை யாராலும் தடுக்க முடியாது என்று தெரிவித்தார்.

தொடர்ந்து, திமுகவின் சீக்ரெட் ஓனர்.. மாண்புமிகு மோடிஜி அவர்களே.. என்னமோ உங்களின் பெயரை சொல்வதற்கு எங்களுக்கு என்ன பயம்? பெயரை சொல்ல வேண்டும், பெயர் சொல்ல வேண்டும் என்று.. எப்படி ஒரு படத்தில் லியோவை பார்க்கணும்.. லியோவை பார்க்கணும் என்று சொல்லி கொண்டிருப்பார்களோ, அப்படிதான் இருக்கு.. ஓட்டுக்காக காங்கிரஸ் உடன் கூட்டணி.. ஊழலுக்காக பாஜகவுடன் மறைமுக கூட்டணியை திமுக வைத்துள்ளது.

தமிழ்நாடு என்றால் ஏன்ஜி உங்களுக்கு அலர்ஜி? ஜிஎஸ்டி வருமானத்தை வாங்கி கொண்டு, நிதியை வழங்க மறுக்கிறீர்கள்.. ஒரே நாடு ஒரே தேர்தல் என்று தொடங்கிய போதே உங்களின் திட்டம் தெரிந்துவிட்டது.. தமிழ்நாட்டை கொஞ்சம் கவனமாக கையாள வேண்டும். ஏனென்றால் தமிழ்நாடு பலருக்கும் தண்ணி காட்டிய மாநிலம். 2026ல் தமிழ்நாடு சந்திக்காத வித்தியாசமான தேர்தலை சந்திக்கும்.. இந்த தேர்தல் 2 பேருக்கு இடையிலான போட்டி மட்டும்தான்.. அது தவெக.. மற்றொன்று திமுக.. வெற்றி நிச்சயம் என்று தெரிவித்துள்ளார்.