எந்த மாவட்டங்களில் சறுக்கும் தவெக? லீடிங்கில் பின்தங்கும் பகுதிகளின் முழுப் பட்டியல்

சென்னை: தமிழ்நாடு சட்டமன்ற தேர்தலில் வாக்கு எண்ணிக்கை தீவிரமாக நடைபெற்று வரும் நிலையில், தமிழக வெற்றிக் கழகம் (தவெக) மாநிலம் முழுவதும் முன்னிலை பெற்றுள்ளது. 234 தொகுதிகளில் 111 தொகுதிகளில் தவெக முன்னிலையில் உள்ளது. சில மண்டலங்களில் கட்சி அதிரடியான முன்னிலை பெற்று ஆச்சரியம் அளித்துள்ளது. எந்த மண்டலத்தில் தவெக பலவீனமாக உள்ளது. எந்த பகுதிகளில் எல்லாம் குறைவான லீடிங்கில் உள்ளது என்பது குறித்து இந்த தொகுப்பில் பார்க்கலாம்.

தமிழ்நாட்டில் 234 தொகுதிகளுக்கு ஒரே கட்டமாக தேர்தல் நடைபெற்ற நிலையில், 85.10% வாக்குகள் பதிவாகியுள்ளன. திமுக, அதிமுக, நாம் தமிழர் கட்சி மற்றும் தமிழக வெற்றிக் கழகம் (தவெக) ஆகியவை நான்கு முனைப் போட்டியில் களம் கண்டுள்ளன. எக்ஸிட் போல் முடிவுகள் திமுகவுக்கு சாதகமாக இருந்தாலும், 234 தொகுதிகளில் 111 தொகுதிகளில் தவெக முன்னிலையில் உள்ளது.

மாஸ் காட்டிய விஜய்

குறிப்பாக சென்னை மற்றும் சுற்றுவட்டார மாவட்டங்களில் தவெக மிகப்பெரிய பலத்தை காட்டியுள்ளது. சென்னை (16ல் 14), திருவள்ளூர் (10ல் 9), செங்கல்பட்டு (7ல் 5), காஞ்சிபுரம் (4ல் 3) போன்ற பகுதிகளில் கட்சி ஆதிக்கம் செலுத்தி வருகிறது. இதேபோல் மத்திய மற்றும் தென் மாவட்டங்களிலும் நல்ல முன்னிலை காணப்படுகிறது. திருச்சி (9ல் 7), மதுரை (10ல் 8), திருநெல்வேலி (5ல் 4), சிவகங்கை (4ல் 3), விருதுநகர் (7ல் 4) போன்ற இடங்களில் தவெக வலுவான நிலையைப் பதிவு செய்துள்ளது.

மேற்கு தமிழகத்தில் உள்ள கோவை (10ல் 6), திருப்பூர் (8ல் 5), ஈரோடு (8ல் 4), சேலம் (11ல் 5), நாமக்கல் (6ல் 3) ஆகிய பகுதிகளிலும் கட்சி கணிசமான முன்னிலை பெற்றுள்ளது. ஆனால் இதற்கு மாறாக, சில மாவட்டங்களில் தவெக மிகவும் பின்தங்கியுள்ளது.

லீடிங் குறைவாக உள்ள பகுதிகள் லிஸ்ட்

விழுப்புரம் (7ல் 0), அரியலூர் (2ல் 0), தருமபுரி (4ல் 0), நீலகிரி (3ல் 0), தென்காசி (5ல் 0), திருவாரூர் (4ல் 0), மயிலாடுதுறை (3ல் 0) போன்ற இடங்களில் கட்சி இதுவரை முன்னிலை பெறவில்லை. அதேபோல் தஞ்சாவூர் (8ல் 1), கடலூர் (9ல் 1), கன்னியாகுமரி (6ல் 1), திண்டுக்கல் (7ல் 1) போன்ற பகுதிகளில் மிகக் குறைந்த முன்னிலை மட்டுமே உள்ளது. இந்நிலையில், இறுதி முடிவுகள் வெளியாகும் வரை இந்த நிலைமை எவ்வாறு மாறும் என்பது அரசியல் வட்டாரங்களில் எதிர்பார்ப்பை ஏற்படுத்தியுள்ளது.

English summary

TVK Vijay: TVK is showing weak performance in several Tamil Nadu districts during vote counting, with no leads in places like Villupuram, Ariyalur, Dharmapuri, Nilgiris, Tenkasi, and Tiruvarur, and only minimal leads in a few others, highlighting regional imbalance in support.