சமஸ்கிருதத்திற்கு ரூ.2,533 கோடி செலவு செய்த பாஜக.. தமிழுக்கு இவ்வளவு தானா.. ஆர்டிஐ மூலமாக அம்பலம்!

டெல்லி: கடந்த 10 ஆண்டுகளில் சமஸ்கிருதத்தை மேம்படுத்த ரூ.2,533 கோடி மத்திய அரசு செலவிட்டிருப்பது ஆர்டிஐ மூலமாக அம்பலமாகி இருக்கிறது. ஆனால் தமிழ், தெலுங்கு, மலையாளம், கன்னடம் மற்றும் ஒடியா உள்ளிட்ட செம்மொழிகளுக்கு ஆண்டுக்கு வெறும் ரூ.13 கோடி மட்டுமே ஒதுக்கீடு செய்யப்பட்டிருப்பது தெரிய வந்துள்ளது.

உலகம் முழுவதும் பிரதமர் நரேந்திர மோடி தமிழின் பெருமைகளை பேசி வருவதாக பாஜகவினர் தொடர்ச்சியாக பேசி வருகின்றனர். இந்த நிலையில் கடந்த 10 ஆண்டுகளில் சமஸ்கிருதத்தை மேம்படுத்த ரூ.2,533.59 கோடி செலவு செய்யப்பட்டிருப்பது ஆர்டிஐ மூலமாக தெரிய வந்துள்ளது. அதாவது ஒவ்வொரு ஆண்டும் சமஸ்கிருத வளர்ச்சி ரூ.230.24 கோடியை மத்திய அரசு ஒதுக்கி இருக்கிறது.

அதேபோல் மற்ற 5 இந்திய செம்மொழிகளான தமிழ், கன்னடம், தெலுங்கு, ஒடியா மற்றும் மலையாளம் ஆகிய மொழிகளுக்கு ரூ.13.41 கோடி செலவு ஒதுக்கீடு செய்யப்பட்டுள்ளது. 2004ஆம் ஆண்டு தமிழ் மொழிக்கு செம்மொழி அந்தஸ்து அளிக்கப்பட்டது. இதன்பின் 2005ஆம் ஆண்டு சமஸ்கிருதத்திற்கு செம்மொழி அந்தஸ்து வழங்கப்பட்டது.

இந்த நிலையில் சமஸ்கிருதத்தை விடவும் 22 மடங்கு தமிழுக்கு குறைவாக நிதி ஒதுக்கப்பட்டுள்ளது. அதுமட்டுமல்லாமல் கன்னடம், ஒடியா, மலையாளம் மற்றும் தெலுங்கு ஆகிய மொழிகளுக்கு 2008 முதல் 2014 வரை செம்மொழி அந்தஸ்து கிடைத்தது. இந்த 4 மொழிகளுக்கும் மொத்தமாக சேர்த்து ரூ.34.08 கோடி ஒதுக்கப்பட்டிருப்பது தெரிய வந்தது.

கடந்த 10 ஆண்டுகளில் 5 செம்மொழிகளுக்கும் சேர்த்து ரூ.147 கோடி மட்டுமே ஒதுக்கீடு செய்யப்பட்டிருக்கிறது. இந்த 5 மொழிகளுக்கும் ஒதுக்கீடு செய்யப்பட்ட தொகையை விட சமஸ்கிருதத்திற்கு 17 மடங்கு கூடுதலாக செலவிடப்பட்டுள்ளது. இது தமிழக அரசியலில் விவாதப் பொருளாக மாறி இருக்கிறது. இதற்கு மதுரை எம்பியும், எழுத்தாளருமான சு.வெங்கடேசன் கண்டனம் தெரிவித்துள்ளார்.

இதுதொடர்பாக சு.வெங்கடேசன் தனது எக்ஸ் பக்கத்தில், பாஜக அரசு சமஸ்கிருதத்துக்கு ரூ.2532.59 கோடியும் தமிழ் உள்ளிட்ட பிற ஐந்து செம்மொழிகளுக்கும் சேர்த்து 147.56 கோடியும் ஒதுக்கியுள்ளது. தமிழ், தமிழ்நாட்டு மக்கள், தமிழ் கடவுள்கள் எல்லாம் பாஜக வுக்கு ஓட்டுக்கு மட்டும் தான். நோட்டுகள் எல்லாம் சமஸ்கிருதத்துக்கு தான். இது தான் பாஜகவின் அப்பட்டமான சமஸ்கிருத மேலாதிக்க வெறி என்று பதிவிட்டுள்ளார்.

English summary

RTI data reveals that the Union Government has spent Rs.2,533 crore on promoting Sanskrit in the last 10 years, while classical languages like Tamil, Telugu, Malayalam, Kannada, and Odia receive only Rs.13 crore per year. The disparity in funding raises questions on linguistic equality.