பெரியார் பெயருக்கு பின்னால் ‘சாதி’.. யுபிஎஸ்சி தேர்வு வினாத்தாளில் சர்ச்சை! அதிர்ந்துபோன தேர்வர்கள்!

Updated: Sunday, May 25, 2025, 16:00 [IST]

Subscribe to Oneindia Tamil

சென்னை: மத்திய அரசின் UPSC தேர்வாணையம் நடத்தும் சிவில் சர்வீசஸ் முதல்நிலை தேர்வு வினாத்தாளில் தந்தை பெரியாரின் பெயருக்கு பின், சாதியை குறிப்பிட்டு கேள்வி கேட்கப்பட்டுள்ளதால் சர்ச்சை எழுந்துள்ளது.

1929 ஆம் ஆண்டு நடைபெற்ற செங்கல்பட்டு மாநாட்டில் தனது பெயருக்கு பின்னால் இருக்கும் சாதி பெயரை நீக்குவதாக அறிவித்திருந்தார் பெரியார். ஆனால், யுபிஎஸ்சி தேர்வு வினாத்தாளில் பெரியார் பெயருக்குப் பின்பு சாதிப் பெயர் குறிப்பிடப்பட்டு உள்ளதால் தேர்வர்கள் அதிர்ச்சி அடைந்துள்ளனர்.

UPSC Under Fire for Mentioning Caste in Question on Periyar

ஐ.ஏ.எஸ், ஐ.பி.எஸ், ஐ.எஃப்.எஸ் உள்ளிட்ட பதவிகளுக்காக, மத்திய அரசு பணியாளர் தேர்வாணையம் (UPSC) ஆண்டுதோறும் சிவில் சர்வீசஸ் தேர்வை நடத்துகிறது. யுபிஎஸ்சி சிவில் சர்வீஸ் தேர்வு - முதல்நிலை, முதன்மை மற்றும் நேர்முகத் தேர்வு என மூன்று கட்டமாக நடத்தப்படுகிறது. இந்த ஆண்டிற்கான சிவில் சர்வீசஸ் முதல்நிலை தேர்வுக்கான ஹால்டிக்கெட் கடந்த 13ஆம் தேதி வெளியானது.

இந்நிலையில், யுபிஎஸ்சி முதல்நிலை தேர்வு இன்று நாடு முழுவதும் நடைபெறுகிறது. காலை 9.30 மணி மற்றும் மதியம் 2.30 மணி என இரண்டு தாள் தேர்வுகளாக நடைபெறுகிறது. இந்த தேர்வை, சென்னையில் மட்டும் மாற்றுத்திறனாளி தேர்வர்கள் உட்பட 24,364 பேர் எழுதுகின்றனர்.

இன்று காலை தொடங்கி நடைபெற்ற யுபிஎஸ்சி முதல் நிலை தேர்வு வினாத்தாளில் தந்தை பெரியார் பெயருக்கு பின்னால் சாதிப் பெயர் குறிப்பிடப்பட்டு கேள்வி கேட்கப்பட்டுள்ளது சர்ச்சையை கிளப்பியுள்ளது.

யுபிஎஸ்சி முதல் நிலை தேர்வு வினாத்தாளில் இடம்பெற்ற ஒரு கேள்வியில், 'சுயமரியாதை இயக்கத்தை தொடங்கியவர் யார்?' என கேள்வி கேட்கப்பட்டுள்ளது. அதன் கீழ் 4 ஆப்ஷன்கள் கொடுக்கப்பட்டுள்ளன. அதில் பெரியார் ஈ.வெ.ராமசாமி நாயக்கர், பி.ஆர்.அம்பேத்கர், பாஸ்கர் ராவ் ஜாதவ், தினகர் ராவ் ஜவால்கர் ஆகியோரின் பெயர்கள் இடம்பெற்றுள்ளன.

1929 ஆம் ஆண்டு நடைபெற்ற செங்கல்பட்டு மாநாட்டில் தனது பெயருக்கு பின்னால் இருக்கும் சாதி பெயரை நீக்குவதாக அறிவித்திருந்தார் பெரியார். சாதி ஒழிப்புக்காக போராடிய ஈ.வெ.ராமசாமியின் பெயருக்கு பின்னால் சாதி பெயர் குறிப்பிடப்பட்டு யுபிஎஸ்சி தேர்வு வினாத்தாளில் கேள்வி கேட்கப்பட்டுள்ளதால் தேர்வர்கள் அதிர்ச்சி அடைந்துள்ளனர்.