திருமாவளவன் ட்வீட்டால் பரபர - பாஜகவில் இருந்து வெளியேறிய நடிகை காயத்ரி ரகுராமுக்கு ஆதரவு தரும் விசிக!

சென்னை: பாஜகவில் பெண்களுக்கு பாதுகாப்பு இல்லை என குற்றம்சாட்டி வெளியேறி இருக்கும் நடிகை காயத்ரி ரகுராமுக்கு விடுதலை சிறுத்தைகள் கட்சி ஆதரவுக் கரம் நீட்டியிருக்கிறது. பாஜகவில் இருந்து காயத்ரி ரகுராம் வெளியேறியதற்கு, இப்போதாவது ஞானம் வந்ததே.பாராட்டுகள் என விசிக தலைவர் தொல்.திருமாவளவன் பாராட்டியிருக்கிறார்.

தமிழக பாஜகவில் 8 ஆண்டுகளுக்கும் மேலாக பல பொறுப்புகளில் இருந்தவர் நடிகை காயத்ரி ரகுராம். ஒவ்வொரு முறையும் பாஜகவில் பதவி பெறுகிற போது பல சர்ச்சைகளில் காயத்ரி ரகுராம் பெயர் அடிபடுவது தொடர்ந்து கொண்டிருந்தது. பாஜகவின் வெளிநாடு வாழ் தமிழர்களின் நலன் மற்றும் தமிழ் வளர்ச்சி துறை பிரிவின் தலைவராக இருந்தார் காயத்ரி ரகுராம்.

ஆனால் காசி தமிழ் சங்கமம் உள்ளிட்ட நிகழ்ச்சிகளில் காயத்ரி ரகுராம் ஓரம்கட்டப்பட்டார் என கூறப்படுவது உண்டு. அத்துடன் தமிழக பாஜகவின் உட்கட்சி பூசல்களில் காயத்ரி ரகுராம் பரபரப்பாக பேசப்பட்டார் . திருச்சி சூர்யா- டெய்ஸி ஆபாச சர்ச்சை ஆடியோ விவகாரத்தில் நீதி கேட்டு ட்விட்டரில் பதிவிட்டார் காயத்ரி ரகுராம். இதனால் பாஜகவில் இருந்து அவரை சஸ்பெண்ட் செய்து உத்தரவிட்டார் தமிழக பாஜக தலைவர் அண்ணாமலை.

அதன்பின்னர் தொடர்ந்து தமிழக பாஜக தலைவர் அண்ணாமலையை கடுமையாக விமர்சித்து வந்தார் காயத்ரி. இந்த நிலையில் தாம் பாஜகவை விட்டு வெளியேறுவதாகவும் நேற்று காயத்ரி ரகுராம் அறிவித்தார். அப்போது செய்தியாளர்களிடம் பேசிய காயத்ரி ரகுராம், துபாய் ஹோட்டல் விவகாரத்தை முன்வைத்து தம்மை அண்ணாமலை அவமானப்படுத்தினார் என குற்றம்சாட்டினார்.

பின்னர் அதிமுக, விசிக என எந்த கட்சி அழைத்தாலும் பெண்களுக்கு உரிய பாதுகாப்பு அளித்தால் அந்த கட்சிக்கு சென்று இணைந்து பணியாற்ற தயார் எனவும் காயத்ரி ரகுராம் கூறியிருந்தார். இதனால் காயத்ரி ரகுராம் எந்த கட்சிக்குப் போவார் என்கிற விவாதமும் சமூக வலைதளங்களில் நடைபெற்று வருகிறது.

இந்த நிலையில் விசிக தலைவர் தொல்.திருமாவளவன் எம்பி தமது ட்விட்டர் பக்கத்தில், காயத்ரி ரகுராமுக்கு ஆதரவு தெரிவித்து பதிவிட்டுள்ளார். அதில், #BJP பெண்களுக்கு மட்டுமல்ல; ஒட்டுமொத்த இந்துக்களுக்கும் பாதுகாப்பற்ற கட்சி என 'வால் பிராணன் தலைக்கு ஏற' கத்திக்கொண்டே தானே இருக்கிறோம்.இப்போதாவது ஞானம் வந்ததே.பாராட்டுகள்! இந்துக்களின் மத நம்பிக்கையை அரசியல் ஆதாயத்துக்குப் பயன்படுத்தும் கட்சிதான் பாஜக. என தெரிவித்துள்ளார். அதாவது காயத்ரி ரகுராம், பாஜகவில் இருந்து வெளியேறியதை திருமாவளவன் வரவேற்றுள்ளார். திருமாவளவனின் இந்த ட்வீட் பதிவு சமூக வலைதளங்களில் விவாதப் பொருளாகி இருக்கிறது.

English summary

VCK Chief Thirumavalavan MP Supports to Gayathri Raghuram Who left from BJP. Thirumavalavan also slammed Tamilnadu BJP leader Annamalai.