மே 28.. விஜய் போட்ட உத்தரவு.. “ஒரு நாள்” மாஸ் பிளான்.. 234 தொகுதிகளிலும் பரபரக்கும் ஏற்பாடுகள்!

சென்னை : உலக பட்டினி தினத்தை முன்னிட்டு ஏழை எளிய மக்களுக்கு உணவு வழங்குமாறு நடிகர் விஜய் தனது ரசிகர்களை கேட்டுக்கொண்டுள்ளார். அதன்படி, தமிழ்நாட்டில் உள்ள 234 தொகுதிகளிலும், அண்டை மாநிலங்களிலும் விஜய் மக்கள் இயக்கம் சார்பில் இலவச மதிய உணவு வழங்க ஏற்பாடு செய்யப்பட்டுள்ளது.

மே 28ஆம் தேதி அன்று உலக பட்டினி தினம் அனுசரிக்கப்படுகிறது. உலகளவில் நீண்டகால பட்டினியால் வாடும் மக்கள் குறித்தான விழிப்புணர்வை ஏற்படுத்தும் நோக்கத்துடன் இந்த நாள் ஆண்டுதோறும் உலக பட்டினி தினமாக அனுசரிக்கப்படுகிறது.

உலக பட்டினி தினத்தினை முன்னிட்டு ஏழைகளின் பசியைப் போக்கிடும் வகையில் விழிப்புணர்வுக்காக, விஜய் மக்கள் இயக்கம் சார்பாக 'தளபதி ஒரு நாள் மதிய உணவு சேவையகம்' என்ற திட்டம் மூலமாக ஏழை, எளிய மக்களுக்காக உணவு வழங்குமாறு நடிகர் விஜய் உத்தரவிட்டுள்ளார். அதன்படி விஜய் மக்கள் இயக்கம் அறிவிப்பை வெளியிட்டுள்ளது.

இது தொடர்பாக விஜய் மக்கள் இயக்கத்தின் பொதுச் செயலாளர் புஸ்ஸி ஆனந்த் வெளியிட்டுள்ள அறிவிப்பில், "விஜய் சொல்லுக்கிணங்க, உலக பட்டினி தினத்தை முன்னிட்டு பசி எனும் பிணி போக்கிடும் விழிப்புணர்வு ஏற்படுத்தும் வகையில், தளபதி விஜய் மக்கள் இயக்கம் சார்பாக 'தளபதி விஜய் ஒரு நாள் மதிய உணவு சேவையகம்' திட்டம் மூலம் இலவச மதிய உணவு வழங்கப்படும்.

வரும் மே 28ஆம் தேதி ஞாயிற்றுக்கிழமை அன்று பகல் 11 மணியளவில் தமிழ்நாட்டில் உள்ள 234 தொகுதிகளிலும் நகரம், ஒன்றியம் மற்றும் இதர பகுதிகளில் உள்ள ஏழை எளியோருக்கு ஒருவேளை உணவு வழங்க ஏற்பாடு செய்யப்பட்டுள்ளது.

தமிழ்நாடு மட்டுமன்றி புதுச்சேரி, கேரளா, கர்நாடகா, ஆந்திரா மற்றும் மகாராஷ்டிரா உள்ளிட்ட மாநிலங்களிலும், தளபதி விஜய் மக்கள் இயக்கம் சார்பாக பட்டினி தினத்தை முன்னிட்டு ஒரு நாள் மதிய உணவு வழங்க ஏற்பாடுகள் செய்யப்பட்டுள்ளன.

இதன் மூலம் பசியால் வாடும் மக்களுக்கு இயன்றவரை உணவளித்து பசியினை போக்கும் விழிப்புணர்வினை சமுதாயத்தில் ஏற்படுத்தும் நோக்கத்துடன் தளபதி விஜய் மக்கள் இயக்கம் இந்த நலப்பணியை மேற்கொள்கிறது" என்று தெரிவிக்கப்பட்டுள்ளது.

English summary

Actor Vijay has asked his fans to donate food to the poor on the occasion of World Hunger Day May 28. Accordingly, arrangements have been made to provide free lunch on behalf of Vijay People's Movement in 234 constituencies in Tamil Nadu and neighboring states.