உங்களை விட்டு போக மாட்டோம்.. ஸ்டாலினிடம் உறுதியளித்த விசிக, கம்யூனிஸ்டுகள்.. ராகுல் மட்டும் டாட்டா?
சென்னை: தமிழக சட்டமன்றத் தேர்தல் முடிவுகள் ஒரு தொங்கு சட்டசபையை நோக்கிய சூழலை உருவாக்கியுள்ள நிலையில், அடுத்தகட்ட அரசியல் நகர்வுகள் மின்னல் வேகத்தில் நடந்து வருகின்றன. 108 இடங்களைப் பிடித்து தனிப்பெரும் கட்சியாக உருவெடுத்துள்ள தமிழக வெற்றிக் கழகம் (தவெக), ஆட்சி அமைக்கத் தேவையான 118 இடங்களை எட்ட இன்னும் 11 இடங்கள் தேவைப்படுகின்றன. இந்தச் சூழலில், திமுக கூட்டணியில் உள்ள கட்சிகளின் நிலைப்பாடு தமிழக அரசியலில் பெரும் புயலைக் கிளப்பியுள்ளது.
அண்ணா அறிவாலயத்தில் குவிந்த தலைவர்கள்
தேர்தல் முடிவுகள் வெளியான நிலையில், திமுகவின் எதிர்காலம் மற்றும் கூட்டணி ஒற்றுமை குறித்து விவாதிக்க முதலமைச்சர் ஸ்டாலினை கூட்டணிக் கட்சிகளின் தலைவர்கள் போனில் தொடர்பு கொண்டு பேசினர். விசிக தலைவர் திருமாவளவன், சிபிஎம் மற்றும் சிபிஐ மாநிலச் செயலாளர்கள் எனப் பலரும் அண்ணா அறிவாலயத்திற்கு வருகை தந்தனர்.
இந்தச் சந்திப்பிற்குப் பிறகு செய்தியாளர்களிடம் பேசிய தலைவர்கள், "நாங்கள் இப்போதும் திமுக கூட்டணியில்தான் நீடிக்கிறோம். எங்களின் ஆதரவு என்றும் ஸ்டாலினுக்கே" என உறுதிபடத் தெரிவித்துவிட்டுச் சென்றனர். திமுகவின் வாக்கு வங்கி சிதறாமல் இருப்பதையும், கூட்டணி பலமாக இருப்பதையும் வெளிக்காட்டவே இந்த அவசரச் சந்திப்பு நடத்தப்பட்டதாகத் தெரிகிறது.
செல்வப்பெருந்தகையின் 'தனி வழி'
இருப்பினும், இந்தச் சந்திப்பில் காங்கிரஸ் கமிட்டித் தலைவர் செல்வப்பெருந்தகையின் பேச்சு மட்டும் சற்றே மாறுபட்டு இருந்தது. மற்ற தலைவர்கள் திமுகவிற்குப் பகிரங்க ஆதரவை அறிவித்த நிலையில், செல்வப்பெருந்தகை கூறுகையில், "கூட்டணி குறித்து இப்போதே எதுவும் கூறிவிட முடியாது. அகில இந்திய காங்கிரஸ் கமிட்டியின் மேலிடம் என்ன முடிவு எடுக்கிறதோ, அதற்கேற்பவே எங்களின் அடுத்தகட்ட நகர்வு இருக்கும்," எனத் தெரிவித்தார்.
திமுக கூட்டணியில் நீண்டகாலமாகப் பயணித்து வரும் காங்கிரஸ், இந்த இக்கட்டான நேரத்தில் 'மேலிட முடிவு' எனக் கூறியிருப்பது அரசியல் வட்டாரத்தில் பலத்த சந்தேகங்களை எழுப்பியுள்ளது. இது திமுக தலைமைக்குப் பெரும் அதிர்ச்சியையும், சங்கடத்தையும் கொடுத்துள்ளது.
விஜய்யை ஆதரிக்கத் துடிக்கும் ராகுல் காந்தி?
டெல்லி வட்டாரங்களில் இருந்து கசியும் தகவல்கள், தமிழக அரசியலில் ஒரு மெகா மாற்றத்திற்கான அறிகுறியைக் காட்டுகின்றன. காங்கிரஸ் முன்னாள் தலைவர் ராகுல் காந்தி, தமிழகத்தில் ஒரு புதிய மாற்றத்தைக் கொண்டு வந்துள்ள விஜய்யை ஆதரிக்க விரும்புவதாகக் கூறப்படுகிறது.
விஜய்யின் தவெக பெற்றுள்ள 108 இடங்கள் என்பது ஒரு சாதாரண வெற்றியல்ல; அது மக்களிடம் ஏற்பட்டுள்ள மாற்றத்தின் அடையாளம் என ராகுல் கருதுகிறார். இளைஞர்களின் ஆதரவு விஜய்க்குப் பெருமளவில் இருப்பதை உணர்ந்துள்ள ராகுல் காந்தி, காங்கிரஸின் 5 சட்டமன்ற உறுப்பினர்களும் விஜய்க்கு ஆதரவு அளிப்பதன் மூலம், தமிழகத்தில் ஒரு புதிய அரசியல் அத்தியாயத்திற்கு வித்திடலாம் எனத் திட்டமிடுவதாகத் தெரிகிறது.
விஜய்யின் மௌனமும் பாஜகவின் நிழலும்
ஆனால், இங்கேதான் ஒரு சிக்கல் நீடிக்கிறது. ராகுல் காந்தி ஆதரவு அளிக்கத் தயாராக இருந்தாலும், விஜய் தரப்பு காங்கிரஸைத் தொடர்பு கொள்ள இதுவரை ஆர்வம் காட்டவில்லை. இதற்குக் காரணம், மத்தியில் ஆளும் பாஜகவின் நிலைப்பாடுதான். காங்கிரஸுடன் கைகோர்த்தால், அது டெல்லியில் உள்ள பாஜக தலைமையின் அதிருப்திக்கு ஆளாக நேரிடும் என்பது விஜய்யின் கணக்கு.
தமிழகத்தின் வளர்ச்சிக்கு மத்திய அரசின் ஒத்துழைப்பு அவசியம் என்பதால், ஆட்சிப் பொறுப்பேற்கும் முன்பே பாஜகவை பகைத்துக்கொள்ள விஜய் விரும்பவில்லை. இதனால் தான், ராகுல் காந்தியின் மறைமுகப் பச்சைக்கொடி இருந்தும், தவெக தரப்பு காங்கிரஸைத் தவிர்த்துவிட்டு, பாமக மற்றும் இதரச் சிறு கட்சிகளின் ஆதரவைப் பெறத் தீவிரமாக முயன்று வருகிறது.
முடிவு யாருடைய கையில்?
தற்போதுள்ள நிலையில், திமுக தனது கூட்டணிக் கட்சிகளைத் தக்கவைக்கப் போராடி வருகிறது. காங்கிரஸ் கட்சியின் 5 இடங்கள் இல்லாமல் போனால், திமுக கூட்டணியின் பலம் மேலும் குறையும். அதே நேரத்தில், விஜய் காங்கிரஸை ஏற்றுக்கொள்வாரா அல்லது பாஜகவின் கோபத்திற்கு அஞ்சி சிறு காட்சிகளை வைத்து பெரும்பான்மையை நிரூபிக்கப் போராடுவாரா என்பதுதான் தற்போதைய மில்லியன் டாலர் கேள்வி.
செல்வப்பெருந்தகையின் மௌனம், ராகுல் காந்தியின் விருப்பம் மற்றும் விஜய்யின் ராஜதந்திர நகர்வுகள் எனத் தமிழக அரசியல் களம் ஒரு பரபரப்பான கிளைமாக்ஸை நோக்கி நகர்ந்து கொண்டிருக்கிறது. அடுத்த சில நாட்களில் தமிழகத்தின் அடுத்த முதல்வர் யார் என்பதும், அமையப்போகும் அரசு நிலையானதாக இருக்குமா என்பதும் உறுதியாகிவிடும்.
Click it and Unblock the Notifications
Sign in with Google