“சர்காரில் அம்மா லேப்டாப்பை உடைப்பது போல சீன்.. என்ன ஆச்சுன்னு தெரியுமில்ல விஜய்?”-ராஜன் செல்லப்பா

Updated: Monday, January 26, 2026, 19:32 [IST]

Subscribe to Oneindia Tamil

சென்னை: சர்க்கார் திரைப்படத்தில், ஜெயலலிதா கொடுத்த லேப்டாப்பை உடைப்பதை போன்ற சீன் வந்திருந்தபோது.. மதுரையில் என்ன நடந்தது என்பதை மறந்துவிட வேண்டாம் என அதிமுக எம்எல்ஏ வி.வி.ராஜன் செல்லப்பா, விஜய்க்கு எச்சரிக்கை விடுத்துள்ளார்.

இலவசங்கள் அல்லது விலையில்லா நலத்திட்டங்கள் என்பது, மக்களை சோம்பேறிகளாக மாற்றுகிறது என்கிற மேல்தட்டு சிந்தனையை திரையில் கொண்டுவர முயன்றவர்களில் விஜய்யும் முக்கியமானவர். அப்படித்தான் சர்கார் திரைப்படத்தில் அரசு லேப்டாப்பை போட்டு உடைப்பதை போன்ற சீன் இருந்தது. இது கடும் எதிர்ப்புக்கு பின்னர் நீக்கப்பட்டது.

சர்கார் திரைப்படம்

இப்படி இருக்கையில், சமீபத்தில் அதிமுகவை ஊழல் கட்சி என்று விஜய் விமர்சித்திருந்தார். இந்த விமர்சனத்திற்கு அதிமுகவினர் கடும் பதிலடி கொடுத்து வருகின்றனர். குறிப்பாக வி.வி.ராஜன் செல்லப்பா, சர்க்கார் திரைப்படத்தில், ஜெயலலிதா கொடுத்த லேப்டாப்பை உடைப்பதை போன்ற சீன் வந்திருந்தபோது.. மதுரையில் என்ன நடந்தது என்பதை மறந்துவிட வேண்டாம் என விஜய்க்கு எச்சரித்துள்ளார்.

திட்டம் என்ன?

இது தொடர்பாக அவர் பேசியதாவது, "புதிய கட்சிக்காரர்களை கூட நான் விமர்சிக்க வேண்டும் என்று நினைக்கிறேன். இதுவரை நான் சொன்னதே கிடையாது. அண்ணா திமுகவை தொட்டுவிட்டார். இனி சும்மா இருக்க முடியாது என்கிற நிலை வந்துவிட்டது. நீங்கள் புதிய கட்சியை தொடங்கியிருக்கிறீர்கள். அப்படியெனில் நீங்கள் ஏதேனும் ஒரு திட்டத்தை சொல்ல வேண்டும் அல்லவா. எங்களுடைய கொள்கை இது.. நாங்கள் ஆட்சிக்கு வந்தால் இந்த திட்டத்தை செயல்படுத்துவோம் என்று சொல்லியிருக்க வேண்டும்.

படத்தை ஓட விடாமல் செய்தோம்

நீங்கள் யாரும் மறந்திருக்க மாட்டீர்கள்.. உங்கள் அனைவருக்கும் தெரிந்திருக்கும்.. சர்கார் என ஒரு திரைப்படம் வந்தது. அதில், அம்மா கொண்டு வந்த லேப்டாப் திட்டத்தில் வழங்கப்பட்ட லேப்டாப்பை போட்டு உடைத்தார்கள். இதனையடுத்து நாங்கள் அந்த படத்தை ஓட விடாமல் செய்தோம்" என்று கூறியுள்ளார்.

விஜய்க்கு வார்னிங்

இவ்வாறு பேசிய வீடியோவை பகிர்ந்த, ராஜன் செல்லப்பா.. "சர்க்கார் படம், அம்மா அவர்கள் வழங்கிய லேப்டாப் திட்டத்தை உடைப்பது போல் காட்சியுடன் வெளியான போது மதுரையில் என்ன நடந்தது என்பதை மறந்துவிட வேண்டாம்" என பதிவிட்டு விஜய்யை டேக் செய்து எச்சரித்துள்ளார்.