கரூரில் பாதிக்கப்பட்ட மக்களை சந்திப்பது எப்போது? அனுமதிக்காக காத்திருப்பதாக.. விஜய் அறிக்கை!

சென்னை: கரூரில் பாதிக்கப்பட்ட மக்களை விஜய் எப்போது சந்திப்பார் என்று கேள்விகள் எழுப்பப்பட்டு வரும் நிலையில், அனுமதி கிடைத்ததும் விரைவில் சந்திப்போம் என்று தமிழக வெற்றிக் கழகத்தின் தலைவர் விஜய் அறிக்கை விடுத்துள்ளார்.

இது குறித்து அவர் விடுத்துள்ள அறிக்கையில் தெரிவிக்கப்பட்டிருப்பதாவது, "என் நெஞ்சில் குடியிருக்கும் உங்களுக்கு, வணக்கம். கரூரில் ஏற்பட்ட தாங்க முடியாத வேதனையான நிகழ்வில் நம் குடும்ப உறவுகளை இழந்து தவிக்கிறோம். இந்தச் சூழலில் உங்களுக்கு ஆறுதலாகவும் ஆதரவாகவும் எல்லா வகையிலும் இருப்போம் என்பதை மீண்டும் உறுதிபடத் தெரிவித்துக்கொள்கிறோம்.

சென்ற வாரம் உங்களுடனான நம் துக்கத்தைப் பகிர்ந்துகொள்ள மேற்கொண்ட காணொளி அழைப்பில் நாம் சொன்னது போலவே, நமது சந்திப்பிற்காக. அதற்கான சட்டரீதியான அனுமதி முன்னெடுப்புகளை எடுத்து வருகிறோம். அனுமதி கிடைத்ததும் நிச்சயமாகச் சந்திப்போம்.

இதனிடையே, நாம் ஏற்கனவே (28.9.2025 அன்று) அறிவித்தபடி குடும்ப நல நிதியாக ரூ.20 லட்சத்தை வங்கியின் RTGS வழியாகத் தமிழக வெற்றிக் கழகத்தின் சார்பாக (18.10.2025) அனுப்பி வைத்துள்ளோம். அதை நமது உதவிக் கரமாக ஏற்குமாறு அன்புடன் கேட்டுக்கொள்கிறோம். இறைவன் அருளுடன் இந்தக் கடினமான தருணத்தைக் கடந்து வருவோம்" என்று கூறியுள்ளார்.

English summary

Vijay's Upcoming Meeting with Karur Stampede Victims: Actor-politician Vijay has finally broken his silence regarding the Karur stampede tragedy, announcing plans to personally meet affected families while carefully navigating both legal constraints and public expectations surrounding his role in the incident.