ரெண்டு காலும் நொறுங்கிடுச்சு.. வெங்கடேஷ் ஆறுமுகத்திற்கு என்ன ஆனது? தங்கை வெளியிட்ட அதிர்ச்சி தகவல்!
மதுரை: சின்னத்திரை பிரபலமும் நகைச்சுவை நடிகருமான மதுரை வெங்கடேஷ், கடத்தப்பட்டு கால்கள் உடைக்கப்பட்ட நிலையில் பாஜக நிர்வாகிகள் உட்பட 6 பேர் கைது செய்யப்பட்டுள்ளனர். தனது அண்ணனுக்கு என்ன நடந்தது என வெங்கடேஷ் ஆறுமுகத்தின் தங்கை உமா மகேஸ்வரி ஃபேஸ்புக்கில் பதிவிட்டுள்ளார்.
டிவி நகைச்சுவை நிகழ்ச்சிகளில் பங்கேற்று பிரபலமான வெங்கடேஷ் ஆறுமுகம், சில திரைப்படங்களிலும் நடித்துள்ளார். தற்போது மதுரை தபால் தந்தி நகரில் வசித்து வரும் வெங்கடேஷ், இரண்டு நாட்களுக்கு முன்பாக மர்ம நபர்கள் சிலரால், அலுவலகம் விட்டு வீடு திரும்பும் வழியில் காரில் கடத்திச் செல்லப்பட்டார்.
நாராயணாபுரம் கண்மாய் பகுதிக்கு கொண்டு சென்று, அவரை கடுமையாகத் தாக்கியதோடு, அவரது இரு கால்களையும் உடைத்துவிட்டு அந்த கும்பல் தப்பியது. இச்சம்பவம் தொடர்பாக பாஜக நிர்வாகிகள் 3 பேர், வெங்கடேஷ் ஆறுமுகத்தின் மனைவி பானுமதி உள்ளிட்ட 6 பேர் கைது செய்யப்பட்டுள்ளனர்.
இந்நிலையில் வெங்கடேஷ் ஆறுமுகத்தின் தங்கை உமா மகேஸ்வரி, தனது அண்ணனுக்கு என்ன நடந்தது, அவரது தற்போதைய நிலை பற்றி ஃபேஸ்புக்கில் விளக்கமாகப் பதிவிட்டுள்ளார்.
அவரது பதிவில், "அண்ணன் வெங்கடேஷ் ஆறுமுகம் உடல்நிலை பற்றிய பதிவு. மூன்று நாட்களுக்கு முன்பு என் அண்ணன் அலுவலகத்திலிருந்து வீடு திரும்பும் வழியில், சில ரவுடிகளால் வழிமறிக்கப்பட்டு, கடத்திச் செல்லப்பட்டு கடுமையான தாக்குதலுக்கு உள்ளானார். இரண்டு கால்களும் மூட்டுக்கு கீழ் கடுமையாக சேதமாகியிருக்கின்றன. தற்போது தீவிர சிகிச்சைப் பிரிவில் சிகிச்சை பெற்று வருகிறார். குணமடைய சில மாதங்கள் ஆகும்.
காவல்துறை விசாரணைகளும், நடவடிக்கைகளும் தொடர்கின்றன. இந்தச் சம்பவம் பற்றிய பின்னணி குறித்து, நாளை கோர்ட்டில் குற்றவாளிகள் ஆஜர்படுத்தப்பட்ட பிறகே முழுமையாகத் தெரியும். இந்த விபரம் புரியாமல், இந்த செய்தி ப்ராங்க்தான? நல்ல கதை என்றெல்லாம் சிலர் பேசி வருவது வேதனை.
அதனால்தான் இவ்விஷயம் பற்றி வெங்கடேஷின் உடன்பிறந்த தங்கை நான் பதிவிடுகிறேன். நான் இப்போது அண்ணனுடன்தான் இருக்கிறேன். உங்களால் இயன்றால் அண்ணன் விரைவில் குணமடைய பிரார்த்தியுங்கள். நேற்று வெளியான வீடியோ இந்த கேஸில் அரெஸ்ட் ஆகிச் சென்றவர்கள்தான். பாஜக என அடையாளப்படுத்திக் கொண்டே இதைச் செய்துள்ளனர்." எனத் தெரிவித்துள்ளார்.
Click it and Unblock the Notifications
Sign in with Google