தமிழக சட்டசபையில் இன்று! முடிவடையும் கூட்ட தொடர்! பட்ஜெட் மீதான விவாதங்களுக்கு அமைச்சர்கள் பதில்!

சென்னை: தமிழக சட்டசபையில் தாக்கலான பொது பட்ஜெட் மற்றும் வேளாண் பட்ஜெட் மீதான விவாதங்கள் நடந்த நிலையில் இன்று அமைச்சர்கள் தங்கம் தென்னரசுவும், எம்.ஆர்.கே. பன்னீர் செல்வமும் பதில் அளிக்கிறார்கள். அத்துடன் தமிழக சட்டசபை கூட்டத் தொடர் முடிவடைகிறது.

2024 ஆம் ஆண்டுக்கான தமிழக சட்டசபைக் கூட்டத் தொடர் கடந்த 12 ஆம் தேதி ஆளுநர் உரையுடன் தொடங்கியது. இதைத் தொடர்ந்து ஆளுநர் உரைக்கு நன்றி தெரிவிக்கும் தீர்மானத்தின் மீது விவாதம் நடந்தது.

கடந்த 15 ஆம் தேதி ஆளுநர் உரைக்கு நன்றி தெரிவிக்கும் தீர்மானத்தின் மீது முதல்வர் ஸ்டாலின் பதில் உரை ஆற்றினார். இதையடுத்து தமிழக நிதிநிலை அறிக்கை தடைகளைத் தாண்டி என்ற தலைப்பில் கடந்த 19 ஆம் தேதி நிதியமைச்சர் தங்கம் தென்னரசு தமிழகத்தின் நிதி நிலை அறிக்கையை தாக்கல் செய்திருந்தார்.

இதையடுத்து வரவு செலவு குறித்த விவரங்களையும் அமைச்சர் தங்கம் தென்னரசு வெளியிட்டிருந்தார். இந்த நிலையில் நேற்றைய தினம் வேளாண் நிதி நிலை அறிக்கையை தாக்கல் செய்ய சட்டசபை கூட்டம் காலை 10 மணிக்கு கூடியது. இந்த வேளாண் பட்ஜெட்டை உழவர் துறை அமைச்சர் எம்.ஆர்.கே. பன்னீர் செல்வம் தாக்கல் செய்திருந்தார்.

முன் பண மானிய கோரிக்கைகள் மீது விவாதமின்றி வாக்கெடுப்பு நடத்தப்பட்டு நிதி ஒதுக்கப்பட்டது. இந்த நிலையில் சட்டசபையில் தாக்கலான பொது பட்ஜெட் மற்றும் வேளாண் பட்ஜெட் மீது நேற்றைய தினம் காலை, மாலை இரு வேளைகளும் விவாதம் நடத்தப்பட்டது.

நேற்று நடந்த பட்ஜெட் மீதான விவாதத்திற்கு இன்று (பிப்ரவரி 22 ஆம் தேதி) துறை அமைச்சர்கள் தங்கம் தென்னரசுவும் எம்.ஆர்.கே. பன்னீர் செல்வமும் பதில் அளிக்கிறார்கள். அத்துடன் இந்த தமிழக சட்டசபை கூட்டத் தொடர் நிறைவு பெறுகிறது.

English summary

Tamilnadu Assembly: Today is the last day for Assembly session where Ministers will answer on budget discussion.