"நியாயம் கிடைக்கவில்லை" அரசின் அறிவிப்பை ஆராய வேண்டியுள்ளது.. அடுத்த நடவடிக்கை பற்றி ஆசிரியர்கள்!

Updated: Sunday, January 1, 2023, 14:56 [IST]

Subscribe to Oneindia Tamil

சென்னை: சம வேலை சம ஊதியம் கோரிக்கையை வலியுறுத்தி இடைநிலை ஆசிரியர்களின் போராட்டம் 6ம் நாளாக தொடர்ந்து வருகிறது. இதனிடையே ஆசிரியர்களின் கோரிக்கைகள் குறித்து ஆராய குழு அமைத்து முதலமைச்சர் மு.க.ஸ்டாலின் உத்தரவிட்டுள்ளார். தமிழக அரசின் அறிவிப்பு குறித்து ஆராய வேண்டி உள்ளதாகவும், அதன் பின்னரே முடிவு எடுக்கப்படும் என்றும் இடைநிலை ஆசிரியர்கள் சங்கத்தின் பொதுச்செயலர் ராபர்ட் தெரிவித்துள்ளார்.

அரசு தொடக்கப் பள்ளிகளில் பணியாற்றக் கூடிய இடைநிலை ஆசிரியர்கள் சம வேலைக்கு சம ஊதியம் வழங்கக் கோரி சென்னை நுங்கம்பாக்கத்தில் உள்ள பள்ளிக்கல்வித் துறை வளாகத்தில் தொடர் உண்ணாவிரதப் போராட்டத்தில் ஈடுபட்டு வருகின்றனர்.

அரசு அதிகாரிகள், பள்ளிக்கல்வித்துறை அமைச்சர் என இரு கட்டங்களாக நடத்தப்பட்ட பேச்சுவார்த்தையும் தோல்வியில் முடிவடைந்தது. முதல்வர் மு.க.ஸ்டாலினை நேரில் சந்தித்து தங்கள் கோரிக்கைகளை முன்வைக்கும் வரை போராட்டம் தொடரும் என்று தெரிவித்திருந்தனர்.

6ம் நாளாக தொடரும் போராட்டம்

இதனிடையே உண்ணாவிரதப் போராட்டம் 6வது நாளை எட்டியுள்ள நிலையில், போராட்டத்தில் ஈடுபட்டுள்ள 150க்கும் மேற்பட்ட ஆசிரியர்கள் பலரும் உடல்நிலை பாதிக்கப்பட்டு மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர். இந்த நிலையில், முதல்வர் மு.க.ஸ்டாலின் வெளியிட்ட அறிக்கையில், போராட்டத்தில் ஈடுபட்டுள்ள இடைநிலை ஆசிரியர்களின் கோரிக்கைகளை ஆய்வு செய்வதற்காக குழு அமைக்கப்படும் என்று தெரிவித்தார்.

முதல்வர் ஸ்டாலின் அறிக்கை

அந்த அறிக்கையில், நிதித்துறை செயலர் தலைமையில் அமைக்கப்படும் குழுவில் பள்ளிக்கல்வித் துறை முதன்மைச் செயலர் மற்றும் தொடக்கக் கல்வி இயக்குநர் உள்ளிட்டோர் இடம்பெறுவார்கள். இந்த குழு அளிக்கும் பரிந்துரையின் பெயரில் அடுத்தக்கட்ட நடவடிக்கைகள் மேற்கொள்ளப்படும் என்று முதல்வர் தனது அறிக்கையில் குறிப்பிட்டுள்ளார்.

குழு அமைத்த அரசு

இந்த குழு ஆய்வு செய்து அளிக்கும் பரிந்துரைகளை சம வேலை சம ஊதியம் கோரிக்கை தொடர்பாக நடவடிக்கை மேற்கொள்ளப்படும். அரசு அலுவலர்கள் மற்றும் ஆசிரியர்கள் 2023ம் ஆண்டின் தொடக்கத்தினை உவகையுடன் கொண்டாடுங்கள். மக்கள் வாழ்வை வளம் பெற செய்வதற்கான பெரும் பணியில் அரசுடன் ஒத்துழைத்து செயல்பட வேண்டும் என்று தெரிவிக்கப்பட்டுள்ளது.

ஆராய வேண்டியுள்ளது

இதுகுறித்து இடைநிலை ஆசிரியர்கள் சங்கத்தின் பொதுச்செயலர் ராபர்ட் செய்தியாளர்களை சந்தித்து கூறுகையில், சம வேலை சம ஊதியம் தொடர்பாக அமைக்கப்பட்ட குழு குறித்த அரசின் அறிவிப்பை ஆராய வேண்டியுள்ளது. அரசு தரப்பில் அமைக்கப்பட்ட குழு அளிக்கும் அறிக்கையை ஆராய்ந்த பிறகே அடுத்தக்கட்ட நடவடிக்கை குறித்து முடிவு செய்யப்படும் என்று தெரிவித்தார்.

சரியான முடிவு தேவை

தொடர்ந்து, சம ஊதிய கோரிக்கையை வலியுறுத்தி தொடர்ந்து போராடியும் எங்களுக்கான நியாயம் கிடைக்கவில்லை. இதுவரை மூன்று குழுக்களை சந்தித்துள்ளோம். எந்த குழுவிலும் எங்கள் கோரிக்கைக்கான தீர்வு எட்டப்படவில்லை. இதனால் சம ஊதியம் தொடர்பான விவகாரத்தில் முதலமைச்சர் சரியான முடிவு எடுக்க வேண்டும் என்று தெரிவித்துள்ளார்.