நான் போட்டில் ஏற மாட்டேன்.. சென்னை வெள்ளத்தில்.. படகில் ஏற மறுத்த நல்லகண்ணு.. ஏன் தெரியுமா?

சென்னை: 2015-ம் ஆண்டு சென்னை டிசம்பர் மழையில் தத்தளித்துக் கொண்டிருந்தபோது, ஒட்டுமொத்தத் தமிழகத்தையும் நெகிழ வைத்த ஒரு சம்பவம் சி.ஐ.டி நகரில் அரங்கேறியது. அது, நல்லகண்ணு என்கிற ஒரு மனிதர், எப்படி 'தலைவன்' என்கிற சொல்லுக்கு இலக்கணமாகத் திகழ்ந்தார் என்பதற்கான சாட்சி!

"என்னை விட அவசரமானவர்கள் அங்கே இருக்கிறார்கள்!"

அன்று சென்னை மாநகரமே ஒரு குட்டித் தீவாக மாறியிருந்தது. நந்தனம் சி.ஐ.டி நகரில் இருந்த நல்லகண்ணு வீட்டைச் சுற்றி மார்பளவுத் தண்ணீர். 90 வயதைக் கடந்த ஒரு முதியவர் வெள்ளத்தில் சிக்கியிருக்கிறார் என்ற செய்தி கேட்டு, மீட்புக்குழுவினர் ஒரு ரப்பர் படகோடு நல்லகண்ணுவின் வீட்டிற்கு விரைந்தார்கள்.

படகு ஜன்னல் அருகே வந்ததும், "அய்யா... சீக்கிரம் ஏறுங்கள், உங்களைத்தான் முதலில் மீட்கச் சொல்லி உத்தரவு" என்றார்கள் மீட்புப் பணியாளர்கள். ஆனால், அந்த நரைத்த மனிதரிடமிருந்து வந்த பதில் அவர்களை உறைந்து போகச் செய்தது.

"தம்பி... நான் இங்கே பாதுகாப்பாகத்தான் இருக்கிறேன். அங்கே பக்கத்து தெருவில் கைக்குழந்தையோடு ஒரு பெண் ஒருவர் இருக்கிறார். இன்னொரு வீட்டில் வயதான நோயாளி ஒருவர் இருக்கிறார். முதலில் அவர்களைக் காப்பாற்றுங்கள். இந்த ஏரியாவில் இருக்கும் கடைசி ஆளாக நான் வருகிறேன்!" - இதுதான் அய்யா சொன்ன வார்த்தை.

அதையும் மீறி அதிகாரிகள் அவரை ஏற சொன்ன போது.. நல்லகண்ணு சொன்ன வார்த்தைகள்.. இந்த ஏரியாவில் உள்ள எல்லோரும் ஏறட்டும்.. பின்னர் நான் ஏறுகிறேன் என்பதுதான்!

தண்ணீரில் நின்ற தார்மீகம்!

சொந்த உடல்நிலை, குளிர், நடுக்கம் எதைப் பற்றியும் அவர் கவலைப்படவில்லை. மற்றவர்கள் பாதுகாப்பாக வெளியேற்றப்படுவதை அந்த இடுப்பளவு நீரிலேயே நின்று உறுதி செய்தார். பல மணி நேரப் போராட்டத்திற்குப் பிறகு, அந்தப் பகுதியே காலியான பின்னர்தான், தன் கையில் ஒரு சிறிய பையைத் தூக்கிக்கொண்டு படகில் ஏறினார் அய்யா.

வீடியோவில் வராத விளம்பரம்!

இன்றைய காலத்தில் ஒரு சிறிய உதவி செய்தாலே கேமராவை முன்னால் நிறுத்தும் அரசியல்வாதிகளுக்கு மத்தியில், நல்லகண்ணு இதைப் பெரிய விஷயமாகவே கருதவில்லை. "எல்லோரும் என் பிள்ளைகள், அவர்களை விட எனக்கு என்ன முக்கியத்துவம் வேண்டியிருக்கிறது?" என்று சாதாரணமாகக் கடந்து போனார்.

மீட்கப்பட்ட பிறகு, அரசு விருந்தினர் மாளிகைக்கோ அல்லது நட்சத்திர விடுதிக்கோ செல்லாமல், ஒரு கம்யூனிஸ்ட் கட்சியின் சிறிய அலுவலகத்தில் தரையில் படுத்து உறங்கிய அந்த எளிமைதான் அய்யா நல்லகண்ணு!

வெறும் மேடைப் பேச்சோடு நின்றவர் அல்ல அவர். 85 வயதில், தாமிரபரணி ஆற்றில் மணல் கொள்ளையைத் தடுக்க நீதிமன்றம் சென்று போராடி, 5 ஆண்டுகளுக்குத் தடை வாங்கிக் கொடுத்தார். சி.ஐ.டி நகர் குடியிருப்பு காலி செய்யச் சொன்னபோது, ஒரு முகம் சுழிப்பு கூட இல்லாமல் பெட்டிப் படுக்கைகளைத் தூக்கிக்கொண்டு வாடகை வீட்டுக்குக் குடிபெயர்ந்த அந்த நிதானம், இன்றைய தலைமுறை அரசியல்வாதிகள் கற்க வேண்டிய பாடம்.

இந்தச் சம்பவத்தைப் படிக்கும்போது நமக்குத் தோன்றுவது ஒன்றுதான்: "அரசியல் கடந்து அவர் ஒரு அறத்தின் அடையாளம்!"

தமிழக அரசியலின் 'அறம்' என்கிற சொல்லுக்கு உருவம் கொடுத்தால், அது முதுபெரும் இந்திய கம்யூ. தலைவர் நல்லகண்ணுவாகத்தான் இருக்கும். 101-வது வயதில் அவர் இன்று விடைபெற்றிருப்பது, ஒரு கட்சியின் இழப்பல்ல; இந்த மண்ணின் அரசியல் எளிமையின் மறைவு!

English summary

When Nallakannu Stood in Floodwaters to Let Humanity Board the Boat First!