தமிழ்நாட்டில் இளம் வயதிலேயே உயிரிழக்கும் ஆண்கள்.. நாளுக்கு நாள் அதிகரிக்கும் எண்ணிக்கை! ஷாக் காரணம்

Updated: Tuesday, September 29, 2026, 13:28 [IST]

Subscribe to Oneindia Tamil

சென்னை: தமிழ்நாட்டில் பெண்களை விட ஆண்கள் மிகக் குறைந்த வயதிலேயே உயிரிழப்பது அதிகரித்துள்ளது. இதனால் பல குடும்பங்கள் தங்களின் வாழ்வாதாரத்தை இழந்து, பெண்கள் விதவைகளாகவும், பிள்ளைகள் ஆதரவற்ற நிலைக்குத் தள்ளப்படும் சூழலும் உருவாகி வருகிறது. குடும்பத்தைக் காப்பாற்ற வேண்டிய உழைக்கும் வயதிலேயே ஆண்கள் உயிரிழப்பது பெரும் சமூகப் பிரச்சனையாக உருவெடுத்துள்ளது.

அதிர்ச்சி தரும் புள்ளிவிவரங்கள்

கடந்த 2025-ஆம் ஆண்டில் மட்டும் தமிழ்நாட்டில் 4,01,860 ஆண்களும், 2,91,347 பெண்களும் உயிரிழந்துள்ளனர். அதாவது, பெண்களை விட ஆண்கள் 1.10 லட்சம் பேர் அதிகமாக இறந்துள்ளனர்.

கடந்த மூன்று ஆண்டுகளாகவே இந்த இடைவெளி 1 லட்சத்துக்கும் அதிகமாகவே நீடிக்கிறது:

2023-ல் 1.10 லட்சம் அதிகம்
2024-ல் 1.07 லட்சம் அதிகம்
2025-ல் 1.11 லட்சம் அதிகம்

இதில் மிகவும் கவலைக்குரிய விஷயம் என்னவென்றால், இந்த கூடுதல் மரணங்களில் சுமார் 86% மரணங்கள் 15 முதல் 64 வயதுக்கு உட்பட்ட ஆண்களுக்குள் தான் நிகழ்ந்துள்ளன. இது அவர்கள் உழைத்து, குடும்பத்தைக் காப்பாற்றி, பிள்ளைகளை வளர்க்க வேண்டிய முக்கியமான பொற்காலம் ஆகும்.

வயது வாரியாக ஆண்கள் மற்றும் பெண்கள் மரணங்கள் (2025)

15 முதல் 24 வயது வரை: ஆண்கள் 9,167, பெண்கள் 4,461
25 முதல் 34 வயது வரை: ஆண்கள் 17,135, பெண்கள் 6,177
35 முதல் 44 வயது வரை: ஆண்கள் 31,585 , பெண்கள் 11,406
45 முதல் 54 வயது வரை: ஆண்கள் 54,743, பெண்கள் 26,269
55 முதல் 64 வயது வரை: ஆண்கள் 81,840, பெண்கள் 51,365
70 வயதுக்கு மேல்: ஆண்கள் 1,55,093 , பெண்கள் 1,50,545 (70 வயது கடந்த பிறகு இந்த இடைவெளி மிகக் குறைவு)

ஆண்கள் இளம் வயதில் இறக்க முக்கியக் காரணங்கள் என்ன?

மருத்துவர்கள் மற்றும் பொது சுகாதாரத்துறை அதிகாரிகள் இதற்குப் பல காரணங்களை முன்வைக்கின்றனர்:

சாலை விபத்துகள்: தமிழ்நாட்டில் நாள்தோறும் விபத்துகளில் குறைந்தது 50 பேர் உயிரிழக்கிறார்கள், இதில் பெரும்பாலானவர்கள் ஆண்களே. வேலைக்குச் செல்ல இருசக்கர வாகனங்களைப் பயன்படுத்துவது அதிகமாக இருப்பதால் ஆண்களுக்கு விபத்து ஆபத்து அதிகம்.

தற்கொலைகள்: விபத்துகளைப் போலவே தற்கொலைகளாலும் தினசரி பலர் இறக்கின்றனர். மன அழுத்தம் மற்றும் குடும்பச் சுமைகள் இளைஞர்களை அதிகம் பாதிக்கின்றன.

புகை மற்றும் மதுப்பழக்கம்: மது மற்றும் புகையிலை பழக்கவழக்கங்கள் நடுத்தர வயது ஆண்களின் உடலை வேகமாகச் சிதைக்கின்றன.

கண்டறியப்படாத நோய்கள்: மாரடைப்பு, பக்கவாதம், சர்க்கரை நோய், உயர் ரத்த அழுத்தம் மற்றும் சிறுநீரகக் கோளாறுகள் ஆரம்பத்திலேயே கவனிக்கப்படாமல் போவது முக்கியக் காரணம்.

உடல்நலப் பரிசோதனையைத் தவிர்க்கும் ஆண்கள்

பெண்கள் கர்ப்பக் காலத்திலும் பிரசவத்தின்போதும் தொடர்ச்சியாக மருத்துவப் பரிசோதனைகளை மேற்கொள்கின்றனர். ஆனால், ஆண்கள் 40 வயது வரை எந்த ஒரு பொது உடல் பரிசோதனைக்கும் செல்வதில்லை.

தினக்கூலி வேலைக்குச் செல்லும் ஆண்கள், மருத்துவமனைக்குச் சென்றால் அன்றைய நாள் சம்பளம் போய்விடும் என்ற அச்சத்தில் ஆரம்பக்கட்ட அறிகுறிகளை கண்டுகொள்ளாமல் விடுகிறார்கள்.. ஆரம்பத்திலேயே ரத்த அழுத்தம், சர்க்கரை அளவு கண்டறியப்பட்டால் எளிய மாத்திரைகள் மூலமே நீண்ட ஆயுளைப் பெற முடியும் என்று மருத்துவர்கள் சுட்டிக்காட்டுகின்றனர்.

சுவீடன் நாட்டுடன் ஒரு ஒப்பீடு

வெளிநாடுகளுடன் ஒப்பிடும்போது தமிழ்நாட்டின் நிலை கவலையளிக்கிறது. உதாரணமாக, சுவீடன் நாட்டில் 2025-ல் ஆண்கள் மற்றும் பெண்கள் மரணம் ஏறத்தாழ சமமாக இருந்தது (46,000 ஆண்கள், 46,200 பெண்கள்).

சுவீடனில் 65 வயதுக்குக் கீழ் நிகழும் மரணங்கள் வெறும் 10% மட்டுமே. ஆனால் தமிழ்நாட்டில் 65 வயதுக்குக் கீழே நிகழும் மரணங்கள் 42% ஆக உள்ளது. அதாவது, அங்கு முதுமையில் நிகழும் மரணங்கள், தமிழ்நாட்டில் உழைக்கும் இளமைப் பருவத்திலேயே நிகழ்ந்து விடுகின்றன.

மருத்துவச் சான்றிதழ் குறைபாடு

தமிழ்நாட்டில் பதிவாகும் மொத்த மரணங்களில் (சுமார் 6.93 லட்சம்) வெறும் 41% மரணங்களுக்கு மட்டுமே முறையான மருத்துவச் சான்றிதழ் வழங்கப்படுகிறது. 10-ல் 6 மரணங்கள் மருத்துவமனைக்கு வெளியே வீடுகளிலேயே நிகழ்கின்றன. இதனால் அவர்கள் எந்த நோயால் இறந்தார்கள் என்பதைத் தெளிவாகக் கண்டறிந்து அதற்குரிய சிறப்புத் திட்டங்களை வகுப்பதில் அரசுக்குச் சவால் உள்ளது.

அரசின் புதிய முன்னெடுப்புகள்

இந்த இடைவெளியைக் குறைக்கத் தமிழ்நாடு அரசு பல திட்டங்களைச் செயல்படுத்தி வருகிறது:மக்களைத் தேடி மருத்துவம் மூலம் வீடுகளிலேயே சர்க்கரை மற்றும் ரத்த அழுத்தப் பரிசோதனை.விபத்து அவசர சிகிச்சைத் திட்டங்கள். கட்டுமானத் தொழிலாளர்களுக்கான சிறப்பு மருத்துவ முகாம்கள்.

கூலி வேலைக்குச் செல்லும் ஆண்களுக்காக ஆரம்ப சுகாதார நிலையங்களில் மாலை நேர கிளினிக்குகள். இதன் மூலம் வேலை நேரம் பாதிக்கப்படாமல் ஆண்கள் சிகிச்சை பெற முடியும்.

ஆண்களின் உடல்நலத்தைப் பாதுகாப்பது என்பது குடும்பத்தின் வாழ்வாதாரத்தையும், குழந்தைகளின் எதிர்காலத்தையும் காப்பாற்றும் மிக முக்கியமான நடவடிக்கையாகும். சாலையில் செல்லும் போது தலைக்கவசம் அணிவது, மது மற்றும் புகையைத் தவிர்ப்பது, அவ்வப்போது ரத்த அழுத்தம், சர்க்கரை அளவைச் சோதித்துக் கொள்வது போன்ற எளிய பழக்கங்களே குடும்பத் தலைவர்களின் உயிரைப் பாதுகாக்கும்.