பட்டினப்பாக்கத்தை விட மறுக்கும் விஜய்? காரணம் வாஸ்துவா? மாற்று இடங்களை நிராகரிக்கும் பின்னணி?
சென்னை: சென்னை பட்டினப்பாக்கம் போர்ஷோர் எஸ்டேட் பகுதியில் ₹1,200 கோடி செலவில் புதிய தலைமைச் செயலகம் அமைக்கும் திட்டத்திற்கு, உள்ளூர் மீனவ மக்கள் மற்றும் எதிர்க்கட்சிகள் மத்தியில் நாளுக்கு நாள் எதிர்ப்பு அனல் பறந்து வருகிறது. ஆனாலும், இந்த இடத்தை மாற்றுவதற்கு முதலமைச்சர் விஜய் பிடிவாதமாக மறுத்து வருவதாகவும், இதற்குப் பின்னால் தீவிரமான 'வாஸ்து' நம்பிக்கைகள் இருப்பதாகவும் தலைமைச் செயலக வட்டாரங்கள் மற்றும் அரசியல் களத்தில் தகவல்கள் கசிந்து பெரும் புயலைக் கிளப்பியுள்ளன.
எதிர்ப்புகளுக்கு நடுவிலும் பட்டினப்பாக்கம் மீது பிடிவாதம் ஏன்?
சுமார் 26 ஏக்கர் பரப்பளவில் கடலை நோக்கியபடி அமையவுள்ள புதிய தலைமைச் செயலகத்திற்கு மீனவர்கள் தங்களது கடுமையான எதிர்ப்பைப் பதிவு செய்து வருகின்றனர். "எங்கள் வாழ்வாதாரமும் மீன் விற்பனையும் பாதிக்கப்படும்" என எச்சரித்து போராட்டம் நடத்தும் நிலைக்கு மக்கள் தள்ளப்பட்டுள்ளனர். பொதுவாக மக்களிடம் இவ்வளவு கடுமையான எதிர்ப்பு கிளம்பினால், அரசு உடனடியாக மாற்று இடத்தைத் தேர்வு செய்வது வழக்கம். ஆனால், பட்டினப்பாக்கம் இடத்தை விட்டுக்கொடுக்க அரசு தரப்பு தொடர்ந்து தயங்குவது ஏன் என்ற கேள்வி எழுந்தது.
பொதுப்பணித்துறை வட்டாரங்களில் விசாரித்தபோது, புதிய தலைமைச் செயலகத்திற்காக சென்னைக்குள் பல மாற்று இடங்கள் ஆரம்பத்திலேயே ஆய்வு செய்யப்பட்டன. கிண்டி நெடுஞ்சாலைத்துறை வளாகம், கிண்டி ரேஸ் கோர்ஸ், தீவுத்திடல், சேப்பாக்கம் எழிலகம் வளாகம், சிந்தாதிரிப்பேட்டை பல்லவன் இல்லம் எனப் பல்வேறு பகுதிகள் அதிகாரிகளால் பரிந்துரைக்கப்பட்டன. ஆனால், ஒவ்வொரு இடத்தையும் பரிசீலிக்கும்போது கடுமையான வாஸ்து விதிகளை முன்வைத்து முதல்வர் அலுவலகம் பல இடங்களை நிராகரித்துவிட்டதாகக் கூறப்படுகிறது.
நிராகரிக்கப்பட்ட மாற்று இடங்கள்: பின்னணியில் வாஸ்து காரணங்கள்
பொதுப்பணித்துறை அதிகாரிகள் சுட்டிக்காட்டிய மாற்று இடங்கள் ஒவ்வொன்றிலும் முன்வைக்கப்பட்டதாகக் கூறப்படும் வாஸ்து குறைபாடுகள் அரசியல் வட்டாரத்தில் பேசுபொருளாகியுள்ளன:
1. சிந்தாதிரிப்பேட்டை பல்லவன் இல்லம்: அரசுக்குச் சொந்தமான பரந்த நிலம் இங்கு இருந்தபோதும், அந்த இடத்தின் மிக அருகில் சுடுகாடு/கல்லறைத் தோட்டம் அமைந்துள்ளது. வாஸ்து சாஸ்திரப்படி சுடுகாட்டின் அருகில் அரசு தலைமைச் செயலகம் அமைந்தால் நெகட்டிவ் எனர்ஜி ஏற்படும் என்றும், அது அரசுக்குச் சாதகமாக இருக்காது என்றும் கூறி அந்த இடம் நிராகரிக்கப்பட்டதாகக் கூறப்படுகிறது.
2. சேப்பாக்கம் எழிலகம் வளாகம்: அரசு நிலமான எழிலகம் வளாகத்தின் பின்பகுதியில் கட்டலாம் என அதிகாரிகள் ஆலோசனை கூறியபோது, அங்கு கிழக்கு திசை நோக்கி பிரதான கட்டிடத்தின் முகப்பை அமைப்பதில் சிக்கல் இருப்பதாகக் கூறி அதுவும் தள்ளுபடி செய்யப்பட்டது.
3. ஓமந்தூரார் வளாகம்: ஏற்கனவே கருணாநிதி ஆட்சியில் கட்டப்பட்டு, தற்போது பன்னோக்கு மருத்துவமனையாக இயங்கும் ஓமந்தூரார் தோட்டத்தையே மீண்டும் தலைமைச் செயலகமாக மாற்றலாம் என எதிர்க்கட்சிகள் குரல் கொடுத்தன. ஆனால், அந்த இடமும் பரிசீலனைக்கே எடுத்துக்கொள்ளப்படவில்லை.
கடல் பார்த்த அலுவலகம்: ஜோதிடர்களின் வழிகாட்டலா?
எல்லா இடங்களையும் தவிர்த்துவிட்டு பட்டினப்பாக்கத்தையே தேர்வு செய்ய மிக முக்கியக் காரணம், வாஸ்து ரீதியாக 'கடல் பார்த்த' இடம் அதிகாரத்திற்கு யோகத்தைத் தரும் என்ற ஆலோசனைதான் என்று எதிர்க்கட்சித் தலைவர் மு.க. ஸ்டாலின் பகிரங்கமாகக் குற்றம் சாட்டியுள்ளார். "முதலமைச்சரின் அறை கடல் அலைகளைப் பார்த்தபடி அமைந்தால் ஆட்சிக்கும் அவருக்கும் அதிர்ஷ்டம் கூடும் என ஜோதிடர்கள் கூறியதாலேயே பட்டினப்பாக்கத்தை அரசு தேர்வு செய்துள்ளது; அரசு அலுவலகம் மக்கள் பணியாற்றவே தவிர, கடலைப் பார்த்து ரசிப்பதற்கு அல்ல" என்று அவர் சாடியுள்ளார்.
அரசியல் மாற்றம், புதிய சிந்தனை, எளிய மக்களுக்கான ஆட்சி என்று பேசிவிட்டு, இப்போது அரசு அதிகார மையத்தைத் தேர்வு செய்வதில் வாஸ்துவிற்கும் மூடநம்பிக்கைகளுக்கும் இவ்வளவு முக்கியத்துவம் கொடுக்கப்படுவதா என்ற விமர்சனம் நடுநிலையாளர்கள் மத்தியிலும் எழுந்துள்ளது.
மக்களின் வாழ்க்கையா? தனிநபரின் வாஸ்துவா?
ஒருபுறம், "மாநிலத்தின் நிதி நிலைமை மோசமாக இருக்கிறது" என்று சொல்லிவிட்டு, எம்.எல்.ஏ.க்களுக்கு கார்கள் வழங்குவதும், ₹1,200 கோடியில் கடலோரத்தில் ஆடம்பரக் கட்டிடம் கட்டுவதும் பெரும் விமர்சனத்திற்கு உள்ளாகியுள்ளது. மறுபுறம், தலைமுறை தலைமுறையாக கடலோரம் வாழும் மீனவர்களின் வாழ்வாதாரத்தை விட வாஸ்து பலன்களுக்கு அரசு முன்னுரிமை தருகிறதா என்ற ஆதங்கம் கடலோர மக்களிடையே கொழுந்துவிட்டு எரிகிறது.
மக்கள் வரிப்பணத்தில் இயங்கும் ஒரு ஜனநாயக அரசு, மக்களின் நிஜமான கண்ணீருக்கும் எதிர்ப்பிற்கும் மதிப்பளிக்கப் போகிறதா அல்லது வாஸ்து பிடிவாதத்திலேயே நின்று பட்டினப்பாக்கத்தைத் திணிக்கப் போகிறதா என்பதை பொறுத்திருந்துதான் பார்க்க வேண்டும்.
Click it and Unblock the Notifications
Sign in with Google
