"சுக்குமி + லகுதி + ப்பிலி".. பிடிஆரின் தமிழை கிண்டலடித்த எச்.ராஜா.. கிளம்பி வந்த "உடன்பிறப்புகள்"

பாஜக மூத்த தலைவர் எச்.ராஜா, தமிழக நிதியமைச்சரின் பேச்சுகுறித்து கமெண்ட் ஒன்றை பதிவிட்டுள்ளார்

Updated: Monday, March 20, 2023, 17:58 [IST]

Subscribe to Oneindia Tamil

சென்னை: பாஜக மூத்த தலைவர் எச்.ராஜா, தமிழக நிதியமைச்சரின் பேச்சுகுறித்து கமெண்ட் ஒன்றை பதிவிட்டுள்ளார்.. இதுகுறித்த ட்வீட்தான் இணையத்தில் ஷேர் ஆகிவருகிறது.

தமிழக அரசின் சார்பில் 2023 - 24-ம் ஆண்டுக்கான நிதிநிலை அறிக்கை நிதியமைச்சர் பிடிஆர் பழனிவேல் தியாகராஜனால் இன்று தமிழக சட்டமன்றத்தில் தாக்கல் செய்யப்பட்டது... இதில் பல்வேறு முக்கிய அறிவிப்புகளை நிதியமைச்சர் வெளியிட்டிருந்தார்.

இதில் தமிழக மக்களால் பெரிதும் எதிர்பார்க்கப்பட்ட, மிக முக்கிய அறிவிப்பாக மகளிருக்கான உரிமைத்தொகை அறிவிப்பும் வெளியிடப்பட்டுள்ளது...

புரட்சி திட்டம்

திமுக தேர்தல் அறிக்கையில் சொன்னபடி மகளிருக்கு மாதம் 1000 ரூபாய் உரிமைத்தொகை எப்போது வழங்கப்படும் என்று, கடந்த 2 வருட காலமாகவே, பெரும் எதிர்பார்ப்பு நிலவிக்கொண்டே இருந்தது.. இந்நிலையில், மகளிர் உரிமைத்தொகை வரும் நிதியாண்டு முதல் வழங்கப்படும் என்று பிடிஆர் இன்றைய தினம் அறிவித்துள்ளார்... அண்ணா பிறந்தநாள் செப்டம்பர் மாதம் 15-ம் தேதி அன்று மகளிர் உரிமைத்தொகை வழங்கும் திட்டத்தை முதல்வர் ஸ்டாலின் தொடங்கி வைக்கிறார் என்று நிதியமைச்சர் இதுகுறித்து தெரிவித்துள்ளார். புரட்சி ஏற்படுத்தும் இந்த திட்டத்திற்காக 7 ஆயிரம் கோடி ஒதுக்கீடு செய்யப்படுகிறது என்றும் மகளிர் உதவித் தொகைக்கு தகுதியானவர்கள் குறித்த வரைமுறைகள் விரைவில் அறிவிக்கப்படும் என்றும் அமைச்சர் மேலும் தெரிவித்துள்ளார்.

1000 ரூபாய்

தமிழகத்தில் 2 கோடிக்கு மேல் ரேஷன் கார்டுகள் இருக்கிறது... ஆனால் அரசோ வெறும் 7 ஆயிரம் கோடி மட்டுமே ஒதுக்கீடு செய்திருப்பதால் அனைத்து குடும்பத் தலைவிகளுக்கு கிடைக்க வாய்ப்பில்லை என்று அதிமுக இதுகுறித்து கேள்வியை எழுப்பி வருகிறது.. இதையே பாஜக, அமமுக உள்ளிட்ட கட்சிகளும் கேள்வி எழுப்பி கொண்டிருக்கின்றன.. இப்படி பட்ஜெட் குறித்து, கட்சி தலைவர்கள் விமர்சித்து வரும்நிலையில், பாஜகவின் மூத்த தலைவர் எச்.ராஜா மட்டும், நிதிநிலை அறிக்கை குறித்து வாசிக்கும் நிதியமைச்சர் பழனிவேல் தியாகராஜனின் தமிழை, கிண்டல் செய்துள்ளார்.

கிடுக்கிப்பிடி

பிடிஆரை பொறுத்தவரை நிறைய படித்தவர்.. அதிலும் வெளிநாட்டில் படித்து அங்கேயே பணிபுரிந்தவரும்கூட.. மிகச்சிறந்த அறிவாளி.. திமுக அரசு பொறுப்பேற்றதுமே நியமிக்கப்பட்ட அமைச்சரவையில், அதிக அளவு பேசப்பட்டவர் அநேகமாக பிடிஆராகத்தான் இருக்கும்.. மத்திய அரசையும், முந்தைய அதிமுக அரசையும் ஏராளமான கிடுக்கிப்பிடி கேள்விகளை கேட்டவரும் பிடிஆராகத்தான் இருக்க முடியும்.. அந்த அளவுக்கு இவரது செயல்பாடுகள் மக்களை கவனிக்க வைத்து வருகின்றன.. மேலும், தமிழில் சரளமாகவும், திடமாகவும் பேசக்கூடியவர். எனவே, புள்ளிவிவரங்கள் மற்றும் தரவுகளுடன் பிடிஆரின் நறுக் பேச்சு இந்திய அளவில் பிரபலமாவது வழக்கமான ஒன்று.. ஆனாலும் தமிழ் வாசிப்பில் சற்றுத் தடுமாறுவதாக கூறப்படுகிறது.

சாப்பா டுபோ டப்ப டும்

இதைதான், பாஜக கிண்டல் செய்தும் வருகிறது.. நிதியமைச்சரின் இந்த தமிழ் தடுமாற்றத்தை பாஜக மூத்த தலைவர்களில் ஒருவரான எச்.ராஜா, ஒரு ட்வீட்டையே பதிவிட்டுவிட்டார்.. அதில், "சுக்குமி, லகுதி, ப்பிலி" என்று கிண்டலடித்துள்ளார்.. உடனே இதை பார்த்த பாஜகவினர் திரண்டு வந்து, 'சாப்பா டுபோ டப்ப டும்' என்றெல்லாம் கமெண்ட்களை பதிவிட்டு, எச்.ராஜாவின் ட்வீட்டை வழிமொழிந்து வருகின்றனர்... இதை பார்த்ததும் டென்ஷனாகிவிட்ட திமுகவினர், எச்.ராஜாவின் "சுக்கு மிலகு திப்பிலி" என்பதை "ஐயா அது, சுக்கு மிளகு திப்பிலி. போய் ஒழுங்கா தமிழ் மொழியை படித்து வாங்க" என்று பதிலுக்கு கிண்டலடித்து வருகின்றனர்.