டார்கெட் மு.க. ஸ்டாலின் .. வட தமிழகத்தின் 80 தொகுதிகள்... ரஜினியுடன் பாமக கைகோர்ப்பதன் பின்னணி
Recommended Video
சென்னை: தமிழக சட்டசபை தேர்தலுக்கான களம் பரபரக்கத் தொடங்கியிருக்கிறது. பரம வைரிகளாக இருந்த ரஜினிகாந்தும் பாமகவும் இம்முறை கூட்டணி அமைப்பது உறுதியாகி இருக்கிறது. இந்த கூட்டணியின் பிரதான இலக்கே மு.க.ஸ்டாலின் முதல்வராவதை தடுப்பதுதான் என்கின்றனர் அரசியல் பார்வையாளர்கள்.
ரஜினிகாந்த் தலைமையிலான கூட்டணியில் பாமக இடம் பெறும் என்று அவரது ஆலோசகர்களில் ஒருவரான தமிழருவி மணியன் வெளிப்படையாக அறிவித்தார். இந்த அறிவிப்பு வெளியான உடனேயே சமூக வலைதளங்களில் ஞாபகம் வருதே! ஞாபகம் வருதே என ரஜினிகாந்த் நடித்த பாபா படம் வெளியான போது அதற்கு எதிர்ப்பு தெரிவித்து முந்திரி காடுகளுக்குள் அப்படத்தின் பெட்டியை பாமகவினர் தூக்கிக் கொண்டு மறைத்து வைத்த சம்பவங்கள் நினைவுகூறப்பட்டு வருகின்றன.
ரஜினி குறித்து பாமக மவுனம்
பொதுமேடைகளில் ரஜினிகாந்தை ஒருமையில் பாமகவினர் விமர்சித்த காலங்களும் உண்டு. ஆனால் அண்மைக் காலமாக ரஜினிகாந்த் பல்வேறு சர்ச்சைக்குரிய விஷயங்கள் பேசுகிற போதும் பாமக மவுனமாகவே அதை கடந்து சென்றது. குறிப்பாக தந்தை பெரியார் குறித்து ரஜினிகாந்த் அவதூறாக பேசிய போது பாமக எந்த எதிர்வினையையும் வெளிப்படுத்தவில்லை.ஆனால் தந்தை பெரியார் சிலை உடைக்கப்பட்ட போது அதை ஆவேசமாக கண்டித்தார் பாமக நிறுவனர் டாக்டர் ராமதாஸ். அப்போதே பாமகவின் இந்த மவுனம் குறித்து விவாதங்கள் எழுந்தன.
ரஜினிகாந்த் கூட்டணியில் பாமக
இந்நிலையில்தான் ரஜினிகாந்த் தலைமையிலான கூட்டணியில் பாமக இணையும் என்று தமிழருவி மணியன் அறிவித்திருக்கிறார். இது தொடர்பாக ரஜினி மற்றும் பாமக வட்டாரங்களில் விசாரித்த போது, பாமகவைப் பொறுத்தவரை வட தமிழகத்தின் 120 தொகுதிகளில் ஆதிக்கம் செலுத்துகிறது. இருப்பினும் இங்குதான் திமுகவுக்கு கணிசமான இடங்களும் கிடைத்து வருகிறது.
திமுகதான் பிரதான இலக்கு
ரஜினிக்கு பாஜக தரப்பு கொடுக்கப்பட்ட பிரதான அசைன்மென்ட்டே திமுக வெல்லக் கூடாது; மு.க. ஸ்டாலின் முதல்வராகக் கூடாது என்பதுதான். இதனையே பாமக தரப்பும் விரும்புகிறது. இருவருக்கும் பொது எதிரி திமுகவும் மு.கஸ்டாலினும். இதனால் இயல்பாகவே ரஜினியும் பாமகவும் இந்த புள்ளியில் இணைந்துள்ளனர்.
80 தொகுதிகளுக்கு குறி
பாமகவும் ரஜினிகாந்தும் இணைகின்ற போது வட தமிழகத்தின் சுமார் 80 தொகுதிகளில் வெற்றி வாய்ப்பு இருக்கிறது என சில கணிப்புகள் தெரிவிக்கின்றன. இந்த 80-ம் கிடைக்காமல் போனாலும் திமுகவுக்கு போகக் கூடிய இடங்களை ஆகக் குறைந்தபட்சம் தடுத்துவிட முடியும் என்பதும் ஒரு கணக்கு. கொங்கு மண்டலத்தில் திமுகவை அதிமுக எதிர்கொள்ளும்; வட தமிழகத்தில் திமுகவை பாமக- ரஜினி அணி எதிர்கொள்ளும். எங்களது எல்லோரது இலக்கும் திமுக ஆட்சி அமைத்துவிடக் கூடாது என்பது மட்டும்தான் என விவரித்தனர். இதனால் தேர்தல் நேரத்தில் வடதமிழகத்தில் அதிருப்தியில் இருக்கும் சில திமுக மூத்த தலைவர்கள் ரஜினி அணிக்கு தாவினாலும் ஆச்சரியப்படுவதற்கில்லை. அதற்கான வேலைகளும் கனகச்சிதமாக நடைபெறுகிறது என்றும் சிமிட்டுகின்றனர்.
Click it and Unblock the Notifications
Sign in with Google