தமிழ்நாடு நாள்: தாய்நிலத்துக்கு தமிழ்நாடு என தலைமகன் அண்ணா பெயர் சூட்டிய நாள் ஜூலை 18

சென்னை: சென்னை மாகாணம், மதராஸ் மாகாணம், மெட்ராஸ் மாகாணம் என பல்வேறு பெயர்களில் அழைக்கப்பட்ட நமது தாய்நிலத்துக்கு தமிழ்நாடு என தமிழினத்தின் தலைமகனாக கொண்டாடப்படும் மறைந்த முதல்வர் பேரறிஞர் அண்ணா தமிழ்நாடு என பெயர் சூட்டிய நாள் ஜூலை 18.

மொழிவாரியாக மாநிலங்கள் பிரிக்கப்பட்ட நவம்பர் 1-ந் தேதியை பல்வேறு மாநிலங்கள் தங்களது மாநில நாளாக கொண்டாடி வருகின்றன. ஆனால் தமிழ்நாட்டைப் பொறுத்தவரை நவம்பர் 1 என்பது போராட்ட நாள்.. ஆம் பிற மாநிலங்கள் உருவாக்கப்பட்ட போது தாய்நிலமான தமிழ்நாடு பல பகுதிகளைப் பறிகொடுத்தது. அதனை மீட்டெடுக்க தமிழாய்ந்த தமிழர்கள் போராடினார்கள். ஆகையால் நவம்பர் 1-ந் தேதி நமக்குப் போராட்ட நாள்.. தமிழ்நாடு என நமது மாநிலத்துக்கு பேரறிஞர் அண்ணா பெயரிட்ட ஜூலை 18-ந் தேதி தான் தமிழ்நாடு நாள் என்று முதல்வர் மு.க.ஸ்டாலின் பிரகடனம் செய்தார். தமிழ்நாடு நாள் இன்று பேரெழுச்சியுடன் கொண்டாடப்படுகிறது.

தமிழ்நாடு நாள் கொண்டாட்டம் ஏன்?

• நாடு விடுதலைக்குப் பின்னர் 1956-ல் மக்கள் பேசும் மொழிகளின் அடிப்படையில் மாநிலங்கள் உருவாக்கப்பட்டன
• மொழிகள் அடிப்படையில் மாநிலங்கள் பிரிக்கப்பட்ட போது சென்னை மாகாணப் பகுதிகள் சில
• ஹைதராபாத், திருவிதாங்கூர், மைசூர் மாகாணங்களின் பல பகுதிகளுடன் இணைக்கப்பட்டு
• ஆந்திரா, கேரளா, கர்நாடகா என புதிய மாநிலங்கள் உருவாகின
• எஞ்சிய நிலப் பகுதிகளைக் கொண்ட நமது மாநிலம் சென்னை மாகாணம், மெட்ராஸ் மாகாணம், மதராஸ் மாகாணம் என அழைக்கப்பட்டது.
• 1967-ம் ஆண்டு ஜூலை 18-ம் நாள் நமது சென்னை மாகாணம் என்ற மாநிலத்துக்கு தமிழ்நாடு என பெயர் சூட்டினார் மறைந்த முதல்வர் பேரறிஞர் அண்ணா
• நமது மாநிலத்துக்கு தமிழ்நாடு எனப் பெயர் சூட்டப்பட்ட ஜூலை 18 ஆண்டுதோறும் தமிழ்நாடு நாள் என கொண்டாடப்படும் என பிரகடனம் செய்தார் முதல்வர் மு.க.ஸ்டாலின்

தமிழ்நாடு என பெயர் சூட்டப்பட்ட வரலாறு

• 1956-ல் சென்னை மாகாணத்துக்கு தமிழ்நாடு எனப் பெயர் சூட்ட கோரி சங்கரலிங்கனார் 73 நாட்கள் உண்ணாவிரதப் போராட்டம் நடத்தி உயிர் நீத்தார்
• 1960, 1961-ல் சென்னை மாகாணத்துக்கு தமிழ்நாடு எனப் பெயர் சூட்டக் கோரி போராட்டங்கள் நடைபெற்றன
• 1962-ல் நாடாளுமன்றத்தின் மாநிலங்களவையில் பூபேஷ் குப்தா எம்.பி, சென்னை மாகாணத்துக்கு

• தமிழ்நாடு என மாற்றம் செய்ய மசோதா தாக்கல் செய்தார். இம்மசோதா தோற்கடிக்கப்பட்டது
• 1964-ல் சென்னை மாகாண சட்டசபையில் திமுகவின் ராம.அரங்கண்ணல் எம்.எல்.ஏ. தமிழ்நாடு பெயர் சூட்டும் தீர்மானம் கொண்டுவந்தார். இத்தீர்மானமும் நிராகரிக்கப்பட்டது
• 1967-ல் திமுக ஆட்சி அமைந்ததும் முதல்வர் பேரறிஞர் அண்ணா அவர்களால் ஜூலை 18-ல் தமிழ்நாடு என சென்னை மாகாணத்தின் பெயர் மாற்றி அமைக்கப்பட்டது.
• ஆகையால் ஜூலை 18 தமிழ்நாடு நாள் என முதல்வர் மு.க.ஸ்டாலினால் அறிவிக்கப்பட்டது.

English summary

Tamilnadu today celebrated Tamilnadu Day (July 18)