ஆன்லைன் ரம்மியை பாஜக எதிர்க்கிறது.. அதுவே எங்களின் நிலைப்பாடு.. அண்ணாமலை பேட்டி!
ஆன்லைன் ரம்மி தமிழ்நாடு பாஜக எதிர்ப்பதாக அண்ணாமலை கூறியுள்ளார்.
கோவை: ஆன்லைன் ரம்மியை தமிழ்நாடு பாஜக எதிர்ப்பதாகவும், அதுதான் பாஜகவின் நிலைப்பாடு என்று அக்கட்சியின் மாநில தலைவர் அண்ணாமலை தெரிவித்துள்ளார். அதேபோல் ஆளுநர் திருப்பி அனுப்பிய ஆன்லைன் ரம்மி சட்ட மசோதாவை பொதுவெளியில் வெளியிட வேண்டும் என்றும் அண்ணாமலை வலியுறுத்தியுள்ளார்.
தமிழ்நாட்டில் ஆன்லைன் சூதாட்டங்களுக்கு தடை விதிக்கும் சட்ட மசோதாவை கடந்த ஆண்டு அக்.19ம் தேதி சட்டப்பேரவைக் கூட்டத் தொடரில் தமிழ்நாடு அரசு நிறைவேற்றியது.
ஆன்லைன் சூதாட்டங்களுக்கு எதிரான தமிழ்நாடு அரசின் அவசர சட்டத்துக்கு ஏற்கெனவே ஆளுநர் ஒப்புதல் அளித்திருந்தார். இதனைத் தொடர்ந்து, இந்த அவசர சட்டத்தை சட்டமாக்குவதற்கான சட்ட மசோதாவைத்தான் தமிழ்நாடு அரசு சட்டப்பேரவையில் தாக்கல் செய்திருந்தது.
ஆன்லைன் ரம்மி தடை மசோதா
இந்த சட்ட மசோதாவுக்கு ஆளுநரின் ஒப்புதல் கோரி அனுப்பப்பட்டது. இந்த சட்ட மசோதா ஆளுநரிடம் கடந்த 4 மாதங்களாக பரிசீலனையில் இருந்தது. இந்த நிலையில், இரண்டாவது முறையாக அந்த சட்ட மசோதாவில் சில விளக்கங்களைக் கேட்டு ஆளுநர் ஆர்.என்.ரவி திருப்பி அனுப்பியுள்ளார். ஏற்கனவே ஆளுநர் கேட்ட விளக்கங்களுக்கு தமிழ்நாடு அரசு உரிய பதில் அளித்த நிலையில், மசோதாவை திருப்பி அனுப்பியுள்ளது அதிர்ச்சியை ஏற்படுத்தியுள்ளது.
பாஜக எதிர்க்கிறது
இந்த நிலையில் தமிழ்நாடு பாஜக தலைவர் அண்ணாமலை கோவையில் செய்தியாளர்களை சந்தித்தார். அப்போது ஆன்லைன் சூதாட்ட தடை சட்டத்தை ஆளுநர் ஆர்.என்.ரவி திருப்பி அனுப்பியது பற்றி எழுப்பப்பட்ட கேள்விக்கு, ஆன்லைன் ரம்மியை பாஜக எதிர்க்கிறது. அதுதான் கட்சியின் நிலைப்பாடு. நான் கடைசியாக ஆளுநர் ஆர்.என்.ரவியை சந்தித்த போது கூட ஆன்லைன் ரம்மி விவகாரம் குறித்து வேண்டுகோள் வைத்தேன். ஆளுநரை பொறுத்தவரை ஆன்லைன் ரம்மி தடை சட்டத்தில் தான் தவறு உள்ளது என்று சொல்லி இருக்கிறார்.
சட்டப்பேரவைக்கு வாய்ப்பு
இதன் மூலம் ஆன்லைன் ரம்மி தடை சட்டத்தை சரி செய்ய சட்டப்பேரவைக்கு வாய்ப்பு கிடைத்துள்ளது. ஒருவேளை மீண்டும் அதே மசோதாவை தமிழ்நாடு அரசு அனுப்பினால், ஆளுநருக்கு வேறு வழியில்லை. அதில் கையெழுத்து போட்டுதான் ஆக வேண்டும். அரசியலமைப்பு சட்டம் அதுதான். இரண்டாவது முறையாக ஆளுநர் கையெழுத்து போட மாட்டேன் என்று சொல்ல முடியாது. ஆனால் இதே சட்டத்தில் ஆளுநர் அது உயர்நீதிமன்றத்திலோ அல்லது உச்சநீதிமன்றத்திலோ தடை செய்யப்படும்.
ஆளுநர் கருத்து என்ன?
ஏனென்றால் இதுவொரு தவறான தடை சட்டம். யாரையோ சமாதானம் செய்வதற்காக தவறான சட்டத்தை கொண்டு வந்து ஆளுநரை நிர்பந்திக்கக் கூடாது. ஆளுநர் திருப்பி அனுப்பிய ஆன்லைன் ரம்மி சட்ட மசோதாவை பொதுவெளியில் வெளியிட வேண்டும். ஆளுநர் என்ன கருத்து சொல்லி இருக்கிறார் என்பதை பார்க்க வேண்டும் என்று தெரிவித்துள்ளார்.
Click it and Unblock the Notifications
Sign in with Google