குடும்பத்தை பார்க்காதவர் எப்படி மக்களை பார்ப்பார்..சுத்து போட்ட மக்கள்..தெறித்து ஓடிய தவெக வேட்பாளர்

Updated: Sunday, April 12, 2026, 13:05 [IST]

Subscribe to Oneindia Tamil

கோவை: தமிழ்நாடு சட்டமன்றத்துக்கு வருகிற ஏப்ரல் 23 ஆம் தேதி வாக்குப்பதிவு நடைபெறவுள்ளது. வாக்குறுதிகள், பிரச்சாரம் ஆகியவற்றால் அரசியல் களம் சூடுபிடிக்க தொடங்கியுள்ளது. திமுக, அதிமுக, நாம் தமிழர் களத்தில் வேகம் காட்டி வருகிறார்கள். தவெக வேகம் காட்டுவதில்லை. கோவையில் பிரச்சாரத்திற்கு சென்ற தவெக வேட்பாளர்களை பெண்கள் சுற்றி வளைத்து கேள்விகளால் திணறிடித்தனர். பதில் சொல்ல முடியாமல் அவர் அங்கிருந்து எஸ்கேப் ஆகியுள்ளார்.

கோவை மாவட்டம், சூலூர் சட்டமன்ற தொகுதிக்குட்பட்ட கண்ணம்பாளையம் வாரச்சந்தையில் தமிழக வெற்றிக் கழகத்தின் வேட்பாளர் என்.எம் சுகுமார் தீவிர வாக்கு சேகரிப்பில் ஈடுபட்டிருந்தார். வாரச்சந்தை என்பதால் கூட்டம் அலைமோதிய நிலையில், வேட்பாளர் பொதுமக்கள் காய்கறி வியாபாரிகளிடம் துண்டுப் பிரசுரங்களை வழங்கி ஆதரவு திரட்டினார்.

TVK Coimbatore Assembly election 2026 Vijay

பெண்கள் பாதுகாப்பு

அப்போது அங்கிருந்த ஒரு காய்கறி கடையில் வியாபாரத்தில் ஈடுபட்டிருந்த ஒரு பெண்மணி மற்றும் இரண்டு இளம்பெண்களிடம் தனக்கு வாக்களிக்க வேண்டும் என்றும், தங்களது தலைவர் விஜய் ஆட்சிக்கு வந்தால் தமிழக மக்கள் மற்றும் பெண்கள் பாதுகாக்கப்படுவார்கள் என்றும் சுகுமார் கூறினார். அதை ஆமோதித்த காய்கறி கடையில் விற்பனையில் ஈடுபட்டிருந்த ஒரு பெண்மணி மற்றும் இரண்டு இளம் பெண்கள் சராமரி கேள்விகளை எழுப்பத் தொடங்கினர். "உங்கள் தலைவர் விஜய் அவரது சொந்தக் குடும்பத்தினரையே சந்திப்பதில்லை, பேசுவதில்லை எனச் செய்திகள் வருகிறதே.

இட்ஸ் வெரி ராங் புரோ

தன்னுடைய ரத்த உறவுகளையே பார்க்காத ஒருவர், எப்படி தமிழ்நாட்டு மக்களைப் பாதுகாப்பார் என்று நம்ப முடியும். இதற்கு உங்களிடம் என்ன பதில் இருக்கிறது. அதே போல் உங்கள் கட்சியில் இருக்கும் சிறு வயதுடையவர்கள் மற்ற கட்சிகளின் வயது மூத்த நிர்வாகிகளை அசிங்கமாக பேசுவதும், கேவலமாக பேசுவதும் எப்படி ஏற்றுக்கொள்ள முடியும்.

இது போன்ற செயல்களை ஏன் உங்கள் தலைவர் விஜய் கண்டிக்கவில்லை. அவ்வாறு பேசுபவர்கள் மீது உங்கள் தலைவர் என்ன நடவடிக்கை எடுத்துள்ளார்" என்று கேள்வி எழுப்பினர். இந்த அதிரடி கேள்விகளை சுகுமார் எதிர்பார்க்கவில்லை. நிலைகுலைந்து போன, தவெக வேட்பாளர் சுகுமார் என்ன பதில் சொல்வது என்று தெரியாமல் திருதிருவென முழித்தார்.

எஸ்கேப்பான வேட்பாளர்

அவருடன் இருந்த தவெக நிர்வாகிகள் கேள்வி கேட்ட பெண்களை சமாதானம் செய்ய முயற்சித்தனர். ஆனால் பெண்கள் சமரசம் ஆகாமல் விடப்படியாக கேள்விகளை அடுக்கினார்கள். "எல்லா கேள்விகளையும் ஆதாரத்துடன் தானே கேட்கிறோம். நீங்களும் உரிய ஆதாரத்துடன் பதில் சொல்லுங்கள்" என அந்தப் பெண்கள் கூறியுள்ளனர்.

சிறிது நேரத்திலேயே அங்கு சுற்றுவட்டாரத்தில் இருந்த பொதுமக்களும் கூடத் தொடங்கினார்கள். நிலைமை விபரீதமாவதை உணர்ந்த தவெக வேட்பாளர், மேற்கொண்டு பேசத் துணிவில்லாமல் தனது ஆதரவாளர்களுடன் அங்கிருந்து மின்னல் வேகத்தில் புறப்பட்டுச் சென்றார். இந்த வீடியோ சமூகவலைதளங்களில் வைரலாகி வருகிறது.