கோவையில் தோட்டம்.. சென்னையில் பிளாட்.. வானதி சீனிவாசன் சொத்து பட்டியல்
கோவை: தமிழ்நாடு சட்டமன்ற தேர்தல் அறிவிப்பு வெளியாகிவிட்டது. வருகிற ஏப்ரல் 23 ஆம் தேதி வாக்குப்பதிவு நடைபெறவுள்ளது. தொகுதி பங்கீடு, வாக்குறுதிகள், பிரச்சாரம் ஆகியவற்றால் அரசியல் களம் சூடுபிடிக்க தொடங்கியுள்ளது. வேட்புமனு தாக்கல் செய்தவர்களின் மனுக்கள் இன்று பரிசீலனை செய்யப்பட்டது. பாஜக சிட்டிங் எம்எல்ஏ வானதி சீனிவாசன் தனக்கு கோவையில் ஒரு தோட்டமும், சென்னையில் ஒரு பிளாட்டும் இருப்பதாக பிரமாண பத்திரத்தில் குறிப்பிட்டுள்ளார். அவர் கணவர் பெயரிலும் ஏராளமான சொத்துகள் உள்ளன.
பாஜக தேசிய மகளிரணி தலைவரும், கோவை தெற்கு தொகுதி எம்எல்ஏவுமான வானதி சீனிவாசன், இந்தமுறை கோவை வடக்கு தொகுதியில் போட்டியிடுகிறார். வானதி சீனிவாசன் நேற்று வேட்புமனு தாக்கல் செய்தார். ராஜஸ்தான் முதல்வர் பஜன்லால் சர்மா மற்றும் பாஜக முன்னாள் மாநில தலைவர் அண்ணாமலைவுடன் சென்று அவர் வேட்பு மனுத்தாக்கல் செய்தார்.
வானதி சொத்து
அவரின் சொத்துப்பட்டியல் விவரம் வெளியாகியுள்ளது. கடந்த 2021 தேர்தலில், கோவை தெற்கு தொகுதியில் போட்டியிட்டபோது வானதி சீனிவாசன், தன்னிடம் ரூ.1.13 கோடி மதிப்பிலான அசையும் சொத்து இருப்பதாகவும், ரூ.5.03 கோடி அசையா சொத்து இருப்பதாகவும் தெரிவித்திருந்தார். இந்நிலையில் தற்போது தன்னிடம் ரூ.2.16 கோடி மதிப்பிலான அசையும் சொத்துகளும், ரூ.3.50 கோடி மதிப்பிலான அசையா சொத்துகளும் இருப்பதாகத் தெரிவித்துள்ளார்.
கணவர் பெயரிலும்
கடந்த தேர்தலின்போது ரூ.22 லட்சம் கடன் இருப்பதாகத் தெரிவித்திருந்த நிலையில், தற்போது ரூ.83 லட்சம் கடன் இருப்பதாகத் தெரிவித்துள்ளார். இனோவா, போக்ஸ்வேகன் என்று 2 கார்கள் இருப்பதாக தெரிவித்துள்ளனர். 95 சவரன் தங்கம், வைர நகையும், ஒரு கிலோ வெள்ளியும், சட்டம் தொடர்பாக ரூ.2 லட்சம் மதிப்பிலான புத்தகங்களும் இருப்பதாக குறிப்பிட்டுள்ளார்.
மாதம்பட்டி பகுதியில் ரூ.20 லட்சம் மதிப்பில் விவசாய தோட்டம், சென்னை கிளாம்பாக்கத்தில் ரூ.3.5 கோடி மதிப்பிலான ஒரு பிளாட் ஆகியவை வானதிக்கு சொந்தமாக உள்ளன. கணவர் பெயரில் 2 இனோவா கார்கள், ரூ.7 லட்சம் மதிப்பிலான சட்ட புத்தகங்கள், ரூ.3.62 கோடி மதிப்பிலான அசையும் சொத்துகள், மதுராந்தகத்தில் 78 சென்ட் நிலம், காந்திபுரத்தில் ரூ.4.5 கோடி மதிப்பில் ஒரு பிளாட் வீடு உள்ளதாக தெரிவித்துள்ளார்.
Click it and Unblock the Notifications
Sign in with Google