இலங்கையின் புதிய பிரதமரானார் தினேஷ் குணவர்தன- ஜனாதிபதி ரணில் விக்கிரமசிங்கேவின் பள்ளிக்கூட சகா!

Updated: Friday, July 22, 2022, 14:13 [IST]

Subscribe to Oneindia Tamil

கொழும்பு: இலங்கையின் புதிய பிரதமராக தினேஷ் குணவர்தன இன்று பதவியேற்றார். இலங்கை ஜனாதிபதி ரணில் விக்கிரமசிங்கேவின் பள்ளிக்கூட சகா தினேஷ் குணவர்தன.

இலங்கையில் முன்னெப்போதும் இல்லாத அளவுக்கு மிக மோசமான பொருளாதார நிதி நெருக்கடி ஏற்பட்டு உள்ளது. கடந்த ஆண்டே நிலைமை கையை மீறிப் போகும் எனக் கூறப்பட்டது.

இருப்பினும், கடந்த ஆண்டு நிலைமையைச் சமாளித்துவிட்டனர். இந்த ஆண்டு நிலைமையைக் கட்டுக்குள் வைக்க முடியவில்லை..இந்த ஆண்டு தொடக்கம் முதலே இலங்கையின் நிலைக் கையைவிட்டுப் போகத் தொடங்கியது. எரிபொருள், மின்சாரத்திற்கு கடும் தட்டுப்பாடு ஏற்பட்டது. இதனால் இலங்கையில் பல பகுதிகளில் பல மணி நேரம் மின்வெட்டு நிலவுகிறது. தொடரும் மின்வெட்டால் இலங்கையின் தொழிற்துறை அடியோடு பாதிக்கப்பட்டு உள்ளது. உணவு, மருத்துவம் போன்ற அத்தியாவசிய பொருட்களுக்கும் கூட அங்குத் தட்டுப்பாடு ஏற்பட்டுள்ளது.

பதவி விலகிய தலைகள்

இதனால் மக்கள் சொல்லில் அடங்காத இன்னல்களை எதிர்கொண்டு வருகின்றனர். இந்த பொருளாதார நெருக்கடி அங்கு அரசியல் நெருக்கடிக்கும் வழிவகுத்து உள்ளது. இதனால் கடந்த சில மாதங்களாகவே இலங்கை மக்கள் தொடர்ச்சியாகப் போராட்டம் நடத்தி வருகின்றனர். முதலில் இலங்கை நாட்டின் பிரதமராக இருந்த மகிந்த ராஜபக்ச பதவி விலகினார். இதையடுத்து ரணில் விக்ரமசிங்க பிரதமராக நியமிக்கப்பட்டார். இருப்பினும், அவரால் நிலைமையைச் சரி செய்ய முடியவில்லை.

புதிய அதிபராக ரணில்

இதனால் மக்கள் போராட்டம் அடுத்த கட்டத்திற்குச் சென்றது. இதையடுத்து வேறுவழியின்றி இலங்கை அதிபராக இருந்த கோத்தபய ராஜபக்ச ராஜினாமா செய்து, வெளிநாட்டிற்கும் தப்பி ஓடி உள்ளார். இதனைத் தொடர்ந்து புதிய அதிபராக, ரணில் விக்கிரமசிங்கே எம்.பிக்களால் தேர்ந்தெடுக்கப்பட்டார். இதனால் ரணில் வசம் இருந்த பிரதமர் பதவி காலியானாது.

தினேஷ் குணவர்த்தன

இந்தச் சூழலில் இலங்கையின் புதிய பிரதமராக மூத்த நாடாளுமன்ற உறுப்பினர் தினேஷ் குணவர்தனவை இன்று நியமிக்கப்பட்டுள்ளார். அதிபர் ரணில் விக்கிரமசிங்கே முன்னிலையில் இன்று தினேஷ் குணவர்தன பதவியேற்றார். 1949-ம் ஆண்டு பிறந்த தினேஷ் குணவர்த்தன் அடிப்படையில் தொழிற்சங்கவாதியாவார். ரணில் விக்கிரமசிங்கே படித்த அதே ராயல் கல்லூரியில் படித்தவர். நெதர்லாந்து, அமெரிக்காவில் கல்வி பயின்றவர்.

யார் இந்த தினேஷ் குணவர்த்தன

பொதுஜன பெரமுன கட்சியை சேர்ந்த தினேஷ் குணவர்தன, 1973-ல் அரசியலில் நுழைந்தாலும் 1983ஆம் ஆண்டு முதல்முறையாக இலங்கை எம்பியாக தேர்வு செய்யப்பட்டார். 1994 தேர்தலில் அவர் தோல்வி அடைந்து இருந்த போதிலும், 2000 முதல் தொடர்ச்சியாக அவர் நாடாளுமன்ற உறுப்பினராக இருந்து வருகிறார். 73 வயதாகும் தினேஷ் குணவர்தன கடந்த காலங்களில் உள்துறை உள்ளிட்ட பல்வேறு துறைகளில் முக்கிய அமைச்சராகவும் இருந்தவர் என்பது குறிப்பிடத்தக்கது.