அன்று அக்கா மட்டுமில்லேன்னா! பவதாரிணி குறித்து இலங்கையில் யுவன் உருக்கம்

கொழும்பு: தனது இசைப் பயணத்தில் அக்கா பவதாரிணி மிக முக்கியமானவர் என இசையமைப்பாளர் யுவன் சங்கர் ராஜா உருக்கமாக தெரிவித்துள்ளார்.

இசைஞானி இளையராஜாவின் செல்ல மகள் பவதாரிணிக்கு கல்லீரல் புற்றுநோய் ஏற்பட்டு அது மிகவும் மோசமான கட்டத்தை எட்டியது. இதற்கு சிகிச்சை அளிப்பதற்காக இலங்கையில் ஆயுர்வேத மருத்துவ சிகிச்சைக்காக பவதாரிணியும் அவருடைய கணவர் சபரியும் சென்றிருந்தனர்.

அங்கு பவதாரிணிக்கு ஆயுர்வேத சிகிச்சை அளிக்கப்பட்டது. இதையடுத்து இலங்கையில் வாடகை அபார்ட்மென்டில் குடியிருந்த பவதாரிணிக்கு திடீரென உடல்நிலை மோசமடைந்தது. இதையடுத்து ஆயுர்வேத மருத்துவரிடம் ஆலோசனை பெறப்பட்டது.

அதன பேரில் பவதாரிணி லங்கா மருத்துவமனையில் சிகிச்சைக்காக சேர்க்கப்பட்டார். அங்கு அவரது உடல் நிலை மோசமடைந்த நிலையில் அவர் இலங்கையில் ஜனவரி 25ஆம் தேதி உயிரிழந்தார். அவரது இறப்பால் திரையுலகமே சோகத்தில் மூழ்கியது.

இளையராஜா இலங்கைக்கு இசைக் கச்சேரிக்காக சென்ற நிலையில் அங்கு மருத்துவமனைக்கு சென்று தனது மகளின் உடலை பார்த்து கண்ணீர் விட்டார். இதையடுத்து பவதாரிணியின் உடல் இலங்கையிலிருந்து சென்னைக்கு கொண்டு வரப்பட்டது. அங்கிருந்து இளையராஜாவின் சொந்த ஊரான தேனியில் பண்ணையபுரத்திற்கு கொண்டு செல்லப்பட்டது.

அங்கு இளையராஜாவின் தாய், மனைவி ஆகியோர் அடக்கம் செய்யப்பட்ட பண்ணை வீட்டில் பவதாரிணியும் விதைக்கப்பட்டார். இந்த நிலையில் கொழும்புவில் வரும் 24 ஆம் தேதி யுவன்சங்கர் ராஜாவின் இசை நிகழ்ச்சி நடைபெறுகிறது. இந்த நிகழ்ச்சியையொட்டி யுவன் செய்தியாளர்களை கொழும்புவில் சந்தித்தார்.

அவர் கூறுகையில் எனக்கு பியானோ இசைக்க கற்று கொடுத்ததே பவதாரிணிதான். எனது இசை வாழ்வில் எனது அக்கா மிக முக்கியமானவர். இவ்வாறு யுவன் சங்கர் ராஜா தெரிவித்தார். இலங்கையில் லங்கா மருத்துவமனையில் கூட பவதாரிணி தனது தந்தை இளையராஜா, தனது அண்ணன் கார்த்திக் ராஜா, தம்பி யுவன் சங்கர் ராஜா ஆகியோர் பற்றிதான் அதிகம் பேசினாராம்.

அது போல் சித்தப்பா கங்கை அமரனின் மகன்கள் பிரேம்ஜி, வெங்கட் பிரபு ஆகியோர் இவர்கள் மூவர் சேர்ந்தாலே அங்கு ஒரு இசை கச்சேரியே நடக்கும் அளவுக்கு கலாட்டாக்கள், கேலிகள், கிண்டல்கள் என ஜாலியாக இருக்கும். பவதாரிணியின் இறப்பால் இளையராஜாவும் மிகவும் உடைந்து போயுள்ளார்.

English summary

Music director Yuvan Shankar Raja emotionally recalls about her sister Bhavatharini.