மோடி அரசையே பின்வாங்க வைத்த Gen Z போராட்டம்.. இந்தியாவுக்கு உணர்த்தும் 6 முக்கிய பாடங்கள்!
டெல்லி: நீட் தேர்வு முறைகேட்டை எதிர்த்து டெல்லி ஜந்தர் மந்தரில் தொடங்கிய மாணவர் போராட்டம், மத்திய கல்வி அமைச்சர் தர்மேந்திர பிரதானின் ராஜினாமாவுடன் முடிந்துள்ளது. இந்த சம்பவம் இந்திய அரசியலுக்கே கூட புதியது. இந்த இளைஞர்கள் போராட்டம் நமக்கு உணர்த்தியது என்ன என்பது குறித்தும் இது கற்று கொடுத்த 6 முக்கிய பாடங்களையும் நாம் பார்க்கலாம்!
ஒரு மாதத்திற்கும் மேலாக நீடித்த மாணவர் போராட்டம் தர்மேந்திர பிரதான் ராஜினாமாவுடன் முடிந்துள்ளது. இது கல்வி சீர்திருத்தம் குறித்து தேசிய அளவில் விவாதத்தை ஏற்படுத்தியதோடு, பிரதமர் நரேந்திர மோடி தலைமையிலான அரசையும் முக்கிய முடிவுகளை எடுக்க வைத்தது. இந்த போராட்டம் கற்று தந்த 6 முக்கிய விஷயங்கள் குறித்து நாம் பார்க்கலாம்!
1. இளைஞர்கள் சக்தி
இன்றைய தலைமுறை சமூக வலைத்தளங்களில் மட்டுமே நேரத்தை செலவிடுகிறது என்ற பொதுவான கருத்தை இந்த போராட்டம் உடைத்தெறிந்தது. இன்ஸ்டாகிராம் ரீல்ஸ், வாட்ஸ்அப் குழுக்கள், யூடியூப் லைவ் போன்ற டிஜிட்டல் தளங்கள் மூலமாக ஆயிரக்கணக்கான மாணவர்கள் நாடு முழுவதும் ஒன்றிணைந்தனர். அரசியல் கட்சிகள் போன்ற கட்டமைப்பு இல்லாமலேயே, இளைஞர்கள் தேசியளவில் ஒரு இயக்கத்தை உருவாக்க முடியும் என்பதை இந்த போராட்டம் நிரூபித்தது.
2. கல்வி பிரச்சினை
நீட் கேள்வித்தாள் லீக், தேர்வு தாமதம், பயிற்சி மையங்களின் ஆதிக்கம் போன்ற பிரச்சினைகள் பல ஆண்டுகளாக இருந்து வந்தாலும், அவை பெரிய அரசியல் விவாதமாக மாறவில்லை. ஆனால் இந்த முறை, கல்வி அமைப்பின் நம்பகத்தன்மை மற்றும் மாணவர்களின் எதிர்காலம் தேசிய அரசியல் விவாதமாக மாறியது. இனி கல்வி தொடர்பான பிரச்சினைகள் தேர்தல் அரசியலிலும் தாக்கத்தை ஏற்படுத்தும் என்பதை இந்த போராட்டம் உணர்த்தியுள்ளது.
3. பிரச்சினையை மறுப்பது தீர்வாகாது
ஆரம்பத்தில் போராட்டக்காரர்களைக் கண்டு கொள்ளாமல் இருந்தனர். பிறகு அரசியல் நோக்கம் கொண்டவர்கள் என்று சித்தரிக்கும் முயற்சிகளும் நடந்தன. ஆனால் மாணவர்கள் தங்கள் நிலைப்பாட்டில் உறுதியாக இருந்தனர். அவர்கள் கோரிக்கைகளுக்கு பொதுமக்களின் ஆதரவும் அதிகரித்ததால், மத்திய அரசு இறுதியில் பேச்சுவார்த்தை நடத்த வேண்டிய சூழல் ஏற்பட்டது. சரியான நேரத்தில் பேச்சுவார்த்தைக்கு வருவது எந்தளவுக்கு முக்கியம் என்பதை இது மீண்டும் உணர்த்தியுள்ளது.
4. தலைவர் இல்லாத இயக்கம்
இந்த போராட்டத்தின் தனிச்சிறப்பு, இதற்கு என தனி தலைவர் இல்லாததே. மாணவர்கள், ஆராய்ச்சியாளர்கள், தன்னார்வலர்கள் மற்றும் இளைஞர்கள் இணைந்து பொறுப்புகளைப் பகிர்ந்து கொண்டு இயக்கத்தை முன்னெடுத்தனர். சமூக வலைத்தளங்கள் தான் இந்த இளைஞர்களை ஒரே தளத்திற்கு அழைத்து வந்து ஒருங்கிணைப்பதில் முக்கிய பங்கு வகித்தன. அதிகாரம் என்பது ஒருவரிடம் மட்டுமே இருக்க வேண்டிய அவசியமில்லை என்பதை Gen Z தலைமுறை நிரூபித்துள்ளது.
5. அமைதியான போராட்டம்
ஒரு அமைச்சரின் ராஜினாமாவால் கல்வி அமைப்பின் அனைத்து பிரச்சினைகளும் தீர்ந்துவிடாது. இருப்பினும், அமைதியாகவும் தொடர்ச்சியாகவும் முன்னெடுக்கப்பட்ட மக்கள் இயக்கம் அரசை பேச்சுவார்த்தை வரவழைத்தது. மாணவர்களின் கோரிக்கையை ஏற்கவும் வைத்தது. ஜனநாயகத்தில் மக்கள் குரலுக்கு இன்னும் மதிப்பு இருக்கிறது என்பதையும் இந்த போராட்டம் மீண்டும் நினைவூட்டியுள்ளது.
6. அதிகாரம் மாறிவிட்டது
இந்த போராட்டத்தின் தொடக்கத்தில் பல ஊடகங்களில் இதற்கு பெரிய முக்கியத்துவம் கிடைக்கவில்லை. ஆனால் இன்ஸ்டாகிராம், எக்ஸ், யூடியூப், வாட்ஸ்அப் போன்ற சமூக வலைத்தளங்கள் போராட்டத்தை நாடு முழுவதும் கொண்டு சென்றன. ஒரு 30 வினாடி ரீல் கூட லட்சக்கணக்கான மக்களை சென்றடைந்து அரசியல் விவாதத்தை உருவாக்கும் காலம் இது. அதை இந்த போராட்டம் மீண்டும் உறுதி செய்துள்ளது.
தர்மேந்திர பிரதானின் ராஜினாமா ஒரு அமைச்சரின் பதவி விலகல் என்பதைத் தாண்டி, இந்திய இளைஞர்களின் குரலை எந்த அரசும் நிரந்தரமாகப் புறக்கணிக்க முடியாது என்பதை உணர்த்திய நிகழ்வாக மாறியுள்ளது. கல்வி, வேலைவாய்ப்பு, நிர்வாக வெளிப்படைத்தன்மை போன்றவை இனி தேசிய அரசியலின் மையத்தில் இருக்கும் என்பதையே இந்த போராட்டம் காட்டுகிறது.
Click it and Unblock the Notifications
Sign in with Google
