தொடர்ந்து ஆட்டம் காணும் ஆம் ஆத்மி.. மீண்டும் ஒரு எம்எல்ஏ பாஜகவிற்கு தாவினார்.. கெஜ்ரிவால் அதிர்ச்சி

டெல்லி: டெல்லியில் ஆம் ஆத்மி கட்சியை சேர்ந்த எம்எல்ஏ தேவேந்திர குமார் ஷெராவத் பாஜகவில் இணைந்துள்ளார். கடந்த வெள்ளி அன்றுதான் ஆம் ஆத்மி எம்எல்ஏ அணில் பாஜ்பாய் பாஜகவில் இணைந்தார்.

ஆம் ஆத்மி கட்சிக்கு இது போதாத நேரம் என்றுதான் சொல்ல வேண்டும். வரிசையாக அந்த கட்சி நிறைய பிரச்சனைகளை சந்தித்து வருகிறது. காங்கிரஸ் உடன் கூட்டணி வைக்க முடியாதது, அரவிந்த் கெஜ்ரிவாலை சாலையில் நபர் ஒருவர் கன்னத்தில் அறைந்தது என்று வரிசையாக நிறைய சோதனைகளை அக்கட்சி சந்தித்து வருகிறது.

ஏற்கனவே கட்சியில் உட்கட்சி பூசல் இருப்பதாக தகவல் வருகிறது. பாஜக ஆம் ஆத்மி எம்எல்ஏக்களை காசு கொடுத்து வாங்க பார்க்கிறது என்று டெல்லி முதல்வரும் ஆம் ஆத்மி கட்சி தலைவருமான அரவிந்த் கெஜ்ரிவால் குறிப்பிட்டு இருந்தார்.

நேரடியாக செய்தியாளர் சந்திப்பில் அவர் இப்படி குறிப்பிட்டு இருந்தார். ஆம் ஆத்மி எம்எல்ஏக்களுக்கு 10 கோடி கொடுப்பதாக அமித் ஷா பேரம் பேசி இருக்கிறார் என்று கெஜ்ரிவால் குறிப்பிட்டு இருந்தார். இந்த நிலையில்தான் கடந்த வெள்ளிக்கிழமை ஆம் ஆத்மி கட்சியை சேர்ந்த எம்எல்ஏ அணில் பாஜ்பாய் பாஜகவில் இணைந்தார்

இதையடுத்து தற்போது டெல்லியில் ஆம் ஆத்மி கட்சியை சேர்ந்த எம்எல்ஏ தேவேந்திர குமார் ஷெராவத் பாஜகவில் இணைந்துள்ளார். டெல்லியில் மத்திய பாஜக அமைச்சர் விஜய் கோயல் முன் அவர் பாஜகவில் இணைந்தார். 3 நாட்களில் 2 எம்எல்ஏக்கள் கட்சி மாறியது அரவிந்த் கெஜ்ரிவாலுக்கு அதிர்ச்சியை அளித்துள்ளது.

English summary

Aam Aadmi Party Devinder Kumar Sehrawat joins BJP after MLA Anil Bajpai made a switch to saffron.