மீண்டும் ம.பி.யில் இருந்து ராஜ்யசபா எம்பியாகிறார் மத்திய அமைச்சர் எல்.முருகன்- நீலகிரியில் போட்டி இல்லை!
டெல்லி: மத்திய இணை அமைச்சர் எல்.முருகன் மீண்டும் மத்திய பிரதேச மாநிலத்தில் இருந்து ராஜ்யசபா எம்.பி.யாகிறார். இதற்கான அதிகாரப்பூர்வ அறிவிப்பை டெல்லி பாஜக மேலிடம் வெளியிட்டுள்ளது. இதனையடுத்து நீலகிரி லோக்சபா தொகுதியில் எல்.முருகன் போட்டியிடமாட்டார் என்பது உறுதியாகி உள்ளது.
தமிழ்நாடு பாஜக தலைவராக பதவி வகித்தவர் எல்.முருகன். 2021-ம் ஆண்டு சட்டசபை தேர்தலில் தாராபுரம் தொகுதியில் போட்டியிட்டு தோல்வியடைந்தார். தம்மை எதிர்த்து போட்டியிட்ட திமுகவின் கயல்விழியிடம் 1,393 வாக்குகள் வித்தியாசத்தில் தோல்வியைத் தழுவினார் எல். முருகன். தமிழ்நாடு அமைச்சராக தற்போது பதவி வகிக்கிறார் எல்.முருகனை வீழ்த்திய திமுகவின் கயல்விழி.
இதனைத் தொடர்ந்து 2021-ம் ஆண்டு மத்திய பிரதேச மாநிலத்தில் இருந்து ராஜ்யசபா எம்.பி.யாக எல்.முருகன் தேர்வு செய்யப்பட்டார். ராஜ்யசபா எம்பியான எல்.முருகன், பிரதமர் மோடி தலைமையிலான அமைச்சரவையில் மத்திய இணை அமைச்சரானார். மத்திய தகவல் ஒலிபரப்புத்துறை, மீன்வளம், கால்நடை மற்றும் பால்வளத்துறை இணை அமைச்சராக இருந்து வருகிறார் எல்.முருகன்.
2024-ம் ஆண்டு லோக்சபா தேர்தலில் தமிழ்நாட்டின் நீலகிரி லோக்சபா தொகுதியில் எல்.முருகன் போட்டியிடுவார் என்பது சில ஆண்டுகளாக உறுதியாக கூறப்பட்டு வந்தது. மத்திய அமைச்சர் எல்.முருகன், தமிழ்நாடு பாஜக தலைவர் அண்ணாமலை மற்றும் மத்திய அமைச்சர்கள் பலரும் நீலகிரி தொகுதியில் பல்வேறு திட்டங்களை முன்னெடுத்தனர்; பல்வேறு போராட்டங்களை நடத்தினர். நீலகிரி லோக்சபா தொகுதியில் திமுக மூத்த தலைவரும் அக்கட்சியின் துணைப் பொதுச் செயலாளருமான முன்னாள் மத்திய அமைச்சர் ஆ.ராசா தற்போது எம்பியாக இருந்து வருகிறார். பாஜகவை மிக கடுமையாக கொள்கையாக விமர்சித்து வருகிறவர் ஆ.ராசா. நீலகிரி தொகுதியில் ஆ.ராசா மீண்டும் போட்டியிடவே வாய்ப்புகள் அதிகம்.
இதனால் ஆ.ராசாவுக்கு கடும் போட்டியை உருவாக்கவே எல்.முருகனை களத்தில் நிறுத்த இத்தனை முயற்சிகளையும் பாஜக மேற்கொண்டு வருவதாகவும் கூறப்பட்டு வந்தது.
தற்போது நாட்டின் பல மாநிலங்களில் ராஜ்யசபா தேர்தல் நடைபெறுகிறது. மத்திய இணை அமைச்சர் எல். முருகனின் ராஜ்யசபா எம்பி பதவி காலம் வரும் ஏப்ரல் மாதத்துடன் முடிவடைகிறது. லோக்சபா தேர்தலில் எல்.முருகன் போட்டியிடுவதால் எல்.முருகன் குறித்த விவாதங்கள் எதுவும் உருவாகவில்லை. இந்த நிலையில் இன்று டெல்லி பாஜக மேலிடம் வெளியிட்ட அதிகாரப்பூர்வ அறிவிப்பில், மத்திய பிரதேசத்தில் இருந்து எல்.முருகன் மீண்டும் ராஜ்யசபா எம்பியாக போட்டியிடுவார் என அறிவிக்கப்பட்டுள்ளது. இதனால் நீலகிரி லோக்சபா தொகுதியில் எல்.முருகன் மீண்டும் போட்டியிடமாட்டார் என்பது உறுதியாகி இருக்கிறது.
Click it and Unblock the Notifications
Sign in with Google